Цената на европскиот природен гас расте поради знаците дека кинеската економија можеби го достигнала дното и закрепнувањето би можело да повлече снабдување од Запад.
Вредноста на референтните фјучерси порасна дури за 4,6 проценти, откако вчера падна дури за 14 отсто. Изгледите за кинеската побарувачка се клучни за Европа, бидејќи голем дел од зимата сè уште е пред нас, а краткиот студен бран се движи низ регионот оваа недела. Помалата понуда од Норвешка, исто така, придонесе за денешното зголемување на цените.
Трговците ќе се фокусираат на тоа колку брзо може да закрепне Кина од ограничувањата за ковид. Бруто-домашниот производ (БДП) таму се зголеми за три отсто минатата година, што е многу пониско од 8,4 проценти, колку што изнесуваше во 2021 година, но, сепак, е над прогнозите на економистите. Кина ги надмина и очекувањата за последниот квартал од годината.
Додека полните складишта со гас принудуваат некои кинески купувачи да размислуваат за пренасочување на товарот со течен природен гас, брзото економско закрепнување може да ги зголеми потрошувачката и конкуренцијата за снабдување со Европа, особено ако и таму залади. Другите држави во Азија, како Индија и Тајланд, исто така брзо се враќаат на пазарот на течен природен гас за да ги искористат пониските цени.
„Побарувачката во Кина дефинитивно ќе се врати, но се чини дека постои сомнеж дека ќе го достигне врвот од 2021 година. Општиот консензус е дека ќе се врати, но веројатно не толку високо како што беше претходно“, рече во интервју Роб Батлер, партнер во адвокатската фирма „Бејкер ботс“ (Baker Botts LLP).
Холандските фјучерси за месец однапред, кои се репер за вредноста на гасот во Европа, утрово беа за 2,8 отсто повисоки и се тргуваа по цена од 57 евра за мегават-час.
.webp){kind=icon}
