Саудиска Арабија неочекувано ги покачи цените на нафтата како за азискиот пазар, кој претставува нејзин главен регион за пласман на нафтата, така и за американските и европските купувачи.
Ваквиот потег следува и покрај тоа што цените на суровата нафта оваа година паднаа за околу седум проценти, бидејќи растечките каматни стапки во САД и Европа се спротивставуваат на оптимизмот од закрепнувањето на кинеската побарувачка по укинувањето на повеќегодишниот карантин како дел од политиката за нулта ковид на Кина.
Саудиската компанија „Арамко“, која е под државна контрола, ја зголеми цената на суровата нафта за испорака во март. Водечкиот производ на компанијата е покачен за два долара по барел над регионалниот стандард, а за 20 центи повеќе од овомесечната цена.
Тоа е прво покачување на цената на нафтата од септември и е спротивно на прогнозите од истражувањето на „Блумберг“, спроведено меѓу трговците и рафинериите, кои очекуваа намалување на цената на нафтата од 20 центи.
Кралството ги покачи цените за сите европски купувачи за два долара по барел, а за американските за 30 центи.
Поголемиот дел земји-членки на ОПЕК во последните денови звучеа оптимистички околу прашањето за Кина, чие отварање можеби е најголемиот фактор за одредување на движењето на цената на нафтата оваа година.
Генералниот секретар на ОПЕК, Хаитам ал-Гаис, рече дека е многу пооптимистичен во однос на Кина. Директорот на кувајтската државна енергетска компанија рече дека потрошувачката во најголемиот светски увозник за сурова нафта веќе е во пораст и дека тоа не е само импулсивен ефект.
„Голдман Сакс“, наведувајќи ги ниските резерви и слободните капацитети кај производителите, гледа дека нафтата брент повторно ќе порасне над 100 долари за барел во третиот квартал по отворањето на кинеската економија. И „Морган Стенли“ има слична прогноза.
Саудиска Арабија е многу внимателна
Сепак, министерот за енергетика на Саудиска Арабија, принцот Абдулазиз бин Салман, во саботата рече дека кралството ќе биде внимателно во поглед на зголемувањето на производството на нафта.
„Ќе верувам во тоа кога ќе видам дека навистина се случува, а тогаш ќе преземам акција“, рече принцот Абдулазиз, мислејќи на зголемувањето на побарувачка за нафта на глобално ниво.
Саудиска Арабија е најголем светски извозник на нафта. Во Азија продава околу 60 отсто од својата сурова нафта со долгорочни договори, за кои цените се ревидираат и коригираат секој месец. Најголемите купувачи се Кина, Јапонија, Јужна Кореја и Индија.
Потезите на Саудиска Арабија вообичаено автоматски ги следат и другите производители од Персискиот Залив, како што се Ирак и Кувајт.
.webp){kind=icon}
