Намалувањето на производството на нафта е ризик за Саудиска Арабија

Планот на Саудиска Арабија да го намали производството на нафта за околу 10 отсто може тешко да ги погоди нејзините финансии.

Одлуката од неделата, со која кралството ќе го намали производството на нафта на 9 милиони барели дневно следниот месец, а можеби и подолго, не ги зголеми значително цените. Фјучерсите на нафтата пораснаа за помалку од еден процент откако министерот за енергетика принцот Абдулазиз бин Салман најави еднострано намалување по состанокот на ОПЕК+.

Принцот, говорејќи во Виена, чекорот го опиша како „бонбона“ за другите членови на производствениот картел.

Фискалната перспектива на кралството се влошуваше и пред овој викенд. Буџетот е во дефицит во последните два квартала, бидејќи цената на нафтата падна, додека трошоците за платите и огромните проекти во туризмот и инфраструктурата вртоглаво пораснаа.

Меѓународниот монетарен фонд (ММФ) проценува дека на Ријад ќе му треба цена на нафтата од речиси 81 долар за барел за да ги балансира своите финансии оваа година, што е над сегашното ниво на Брент од околу 77 долари.

Ситуацијата станува уште поизразена кога ќе се земат предвид проектите како што е новиот пустински град Неом, кој го лансира принцот Мохамед бин Салман. ММФ во принцип ги исклучува бидејќи главно се финансираат од државниот фонд и други државни субјекти, а не директно од државниот буџет.

Ако тие проекти се реализираат, според „Блумберг економикс“, на Саудиска Арабија ќе ѝ треба цена на нафтата од 95 долари за барел за да ги балансира своите финансии.

Саудиската влада е пооптимист и очекува годинава да оствари годишен фискален суфицит од 4,3 милијарди долари.

Кралството беше најбрзорастечката економија на Г-20 минатата година, додека руската инвазија на Украина ги потресе енергетските пазари и ја крена цената на нафтата над 125 долари за барел. Исто така, испумпуваше просечно 10,5 милиони барели нафта дневно, поставувајќи годишен рекорд.

Најновото намалување на производството значи дека економијата најверојатно ќе порасне за 0,7 проценти во 2023 година наместо еден процент, според Моника Малик, главна економистка во „Абу Даби Комершал“ (Abu Dhabi Commercial Bank PJSC).

„Тоа, исто така, ќе го подигне нивото на цените за да се балансира буџетот на Саудиска Арабија ако сè друго остане исто“, рече Малик.

Bloomberg Chartmaker

Многу енергетски аналитичари, како и Организацијата на земјите извознички на нафта (ОПЕК), очекуваат затегнување на пазарот на нафта во втората половина од годината, бидејќи побарувачката во Кина и Индија се зголемува. Тоа би можело да ги зголеми цените, надминувајќи го финансиското влијание врз Саудиска Арабија од намалувањето на производството.

Но, многу трговци се песимисти и веруваат дека високите каматни стапки и економската слабост во САД и Европа ќе ги притиснат цените на нафтата барем до крајот на годината.

Потегот на Ријад да го намали производството „малку е веројатно дека ќе поддржи одржливи зголемувања на цените“, велат аналитичарите на „Ситигруп“ (Citigroup), меѓу кои и Ед Морс. „Побарувачката изгледа послаба, а понудата надвор од ОПЕК посилна за крајот на годината отколку што предвидуваа многу аналитичари“.

„Доколку цената на нафтата не се зголеми, очекуваме натамошните намалувања на производството да бидат подолги, а влијанието врз фискалната рамнотежа понегативно за Саудиска Арабија“, рече Ејми Мекалистер, главна економистка за Европа, Блискиот Исток и Африка во „Оксфорд економикс“.