Набавната цена на горивата е за над 50 отсто пониска од продажната

Првпат во текот на една година цената на суровата нафта на светските берзи минатата недела надмина 90 долари за барел. Во четвртокот и петокот повторно се врати под границата, но и натаму е повисока споредено со претходните месеци.

Растот е поттикнат од одлуката на Саудиска Арабија и Русија да ги продолжат ограничувањата на производство и извоз. Според едни аналитичари, ова е моментален тренд и слабата побарувачка ќе влијае за пад на цените, други пак сметаат дека зголемувањето на патувањата во Кина ќе предизвика раст на цените до околу 100 долари за барел.

Според последната одлука на Регулаторната комисија за енергетика во земјава, горивата поскапеа за 2,19 отсто. Според таа одлука, цената на бензинот еуросупер БС-95 изнесува 88 денари за литар. Литар од бензинот еуросупер БС-98 чини 90,50 денари, а литар дизел 83 денар.

Овие цени се формирани врз основа на повеќе параметри. Првиот фактор што влијае е набавната цена на горивата, а потоа на таа цена се додава заработувачката на трговците и, се разбира, најголемиот дел оди на сметка на државата.

Како се формира цената?

Набавната цена на еуросупер БС изнесува 45, 772 денари за литар, покажуваат податоците на Регулаторната комисија за енергетика. Или цената што ја плаќаме на бензинските пумпи е за 52 отсто повисока од набавната цена на безоловниот од 95 октани. Кај дизелот оваа разлика е поголема и набавната цена е за 58,5 отсто пониска од продажната, односно литар дизел при набавка чини 48,895 денари.

Каде оди разликата? Трговците од литар бензин 95 имаат заработка од 4,884 денари, од еуросупер БС-98 5,180 денари, а од литар дизел 5,088 денари.

Транспортните трошоци исто така влегуваат во формулата за пресметка. Станува збор за транспортот од складот до бензинските пумпи, кој изнесува 0,95 денари за литар за сите нафтени деривати.

Надоместокот за финансирање на активностите во областа на животната средина исто така е дел од формулата. За  еуросупер БС-95 надоместокот изнесува  0,080 денари за литар, за еуросупер БС-98 изнесува 0,080 денари за литар, а за дизел гориво оваа давачка изнесува  0,030 денари за литар.

Во согласност со Законот за задолжителни нафтени резерви, производителите на нафтени деривати и увозниците плаќаат уште 0,890 за литар еуросупер БС-95 и за еуросупер-98. За дизел давачката изнесува 0,300 денари за литар.

А највисоките давачки се за акцизата што ја добива државата:

За бензин од 95 октани таа изнесува 22 денара за литар

Еуросупер БС-98 - 22 денара за литар

Дизел гориво  - 15,50  денари за литар

На овие давачки се додава и данокот на додадена вредност од 18 отсто.

Македонија не е рекордер по основа на давачки кон државата

Сепак, колку и да изгледа голема сумата што како процент од литар гориво оди на сметка на државата, земјава не е рекордер. Напротив, уделот на државата во цената во земјава е меѓу најниските во регионот.

Рекордер по сумата што ја зема од продажбата на гориво во регионот е Србија, а таа сума дополнително ќе расте од следниот месец.

Неодамна Владата на Србија предложи од 1 октомври акцизите за нафтените деривати да се зголемат за дополнителни осум проценти. Со овој потег, повеќе од 50 отсто од цената на горивата ќе оди за државата.

Според податоците што Здружението на нафтени компании на Србија (УНКС) ги достави до српската редакција на „Блумберг Адрија“, во моментов уделот изнесува 47,5 отсто за дизелот, за бензинот 48,7 отсто и за ТНГ 44,9 отсто.

Доколку Собранието на Србија го усвои предлогот на Владата за зголемување на акцизите за осум отсто, од 1 октомври државните давачки во вкупната просечна малопродажна цена на дизелот би изнесувале 49,8 отсто, на бензинот 51,2 отсто, а на ТНГ 47 отсто, соопшти УНКС.

Од земјите во регионот, само Црна Гора има повисоки давачки за бензин во споредба со Србија.

Во моментов нема коментари за веста. Биди прв да коментира...

Остави коментар