Извозот на дијаманти од Русија се враќа на ниво од пред воената криза

Паниката, која што годинава преовладува меѓу трговците со дијаманти, почна да се смирува откако рускиот дијамантски гигант Алроса (Alrosa PJSC) се враќа на нивото за извоз од пред избувнувањето на војната во Украина.

Алроса произведува околу една третина од сите небрусени дијаманти во светот, а компаниите од оваа индустрија, вредна 80 милијарди долари, се соочија со проблеми бидејќи не успеаја да најдат начин да продолжат да купуваат суровини од руската компанија. Причина за тоа беше одлуката на банките да не дозволат уплати на сметката на Алроса. Неочекуваниот недостиг доведе до скок на цената на дијамантите, особено на помалите и поевтини камења, по кои Алроса всушност е најпозната.

Извори упатени во податоците за Блумберг објаснуваат дека сега, после месеци на парализираност на извозот поради американските санкции, Алроса повторно продава дијаманти и тоа за повеќе од 250 милиони долари месечно, што е за околу 100 милиони долари помалку од претходното ниво. Продажбата повторно почна благодарение на индиските банки кои сега имаат волја да вршат уплати кои што не се во американски долари.

Најголем дел од небрусените дијаманти се продаваат на преработувачите во Индија, каде се наоѓаат многубројни вакви компании. Преработувачите кои ги сечат и прават завршна обработка на дијамантите најчесто се мали семејни фирми кои создаваат готови производи, што подоцна се користат за изработка на обетки и веренички прстени. Алроса доставува дијаманти до купувачите во Индија и Европа, а како валута најчесто се користи индиската рупија.

Не постојат податоци дека со овие трансакции се кршат некои закони или санкции. Од друга страна, и натаму постои загриженост поради можните последици од тргувањето со руски производи, предупредуваат изворите на Блумберг. Договорите се потпишуваат тивко, дури и по мерка на индустријата за дијаманти, каде што деталите многу ретко се споделуваат со јавноста. Компанијата Алроса престана да објавува информации за продажбата и своите финансиски резултати. Од компанијата не сакаа да коментираат во врска со овие наводи.

Повратот на еден од најголемите светски добавувачи ќе претставува олеснување за преработувачите и трговците. Меѓутоа, цените на небрусените дијаманти веќе покажаа индиции за пад поради намалените проекции за економски раст, а зголемувањето на понудата може да придонесе за нивно натамошно поевтинување.

За дијамантската индустрија постои опасност, која што се однесува на репутацијата на компаниите. Ако потрошувачите сакаат да избегнат купување на руски дијаманти, тогаш може да донесат дури и одлука воопшто да не купуваат дијаманти зашто природата на индустријата е таква што тешко може да се следи потеклото на кој било поединечен драг камен. Милиони слични драги камења минуваат низ рацете на десетици трговци и преработувачи пред да завршат на излогот на некоја од продавниците за накит.

Некои компании од оваа индустрија, како на пример Tiffany & Company и Signet Jewelers Ltd., решија да не купуваат дијаманти од Русија. Некои држави, вклучително и Соединетите Американски Држави, одлучија таквите драги камења да ги обележат како „конфликтни дијаманти“, објави претходно Њујорк Тајмс.

Се бара решение

Индиските и белгијските купувачи, како и продавниците за накит од Кина и Блискиот Исток, продолжуваат да купуваат руски дијаманти и да бараат начини да ги заобиколат забраните на банките поради санкциите.

Алроса практично е под контрола од руската држава бидејќи владата поседува 33 отсто удел во капиталот на компанијата, додека сопственици на дополнителни 25 проценти од уделот се локалните власти. Конкуренција на глобално ниво им претставува компанијата De Beers.

По хаосот предизвикан од санкциите против Алроса, новата испорака на дијамантите ја намалува тензијата на пазарот, а цените и маржите нагло се намалуваат.