Рејтингот на Макрон падна на најниско ниво откако е претседател на Франција

Рејтингот на Емануел Макрон падна на најниско ниво откако стана претседател на Франција во 2017 година, покажува анкетата на Ифоп (Ifop).

Неговата популарност во јануари падна на 21 отсто, што е за три процентни поени помалку од претходниот месец и го симна резултатот под нивото постигнато за време на протестите на „жолтите елеци“ кои започнаа кон крајот на 2018 година, покажа истражувањето објавено во француски неделен весник.

Во историјата на Петтата француска република, која започна во 1958 година, единствено претходникот на социјалистите, Франсоа Оланд, беше понепопуларен со рејтинг кој достигна 13 проценти кон крајот на 2014 година.

Опадна и задоволството од Макрон кај постарите и пензионираните гласачи, кои се вообичаено неговите најсилни поддржувачи, покажува анкетата на Ифоп.

Претседателот предизвика политички пресврт откако минатото лето ги распиша предвремените избори на кои Националното собрание се подели на три главни блока, при што ниту еден не можеше да формира мнозинство за да владее. Следствената неизвесност, како и сомнежите за влошувањето на јавните финансии на Франција, придонесоа за пазарни распродажби што ги зголемија трошоците за задолжување на земјата во однос на конкурентните економии.

Минатиот месец Макрон го назначи центристичкиот сојузник Франсоа Бајру да ја предводи новата влада, откако претходната краткотрајна администрација беше соборена во битката за буџетот за 2025 година. Премиерот, чиј рејтинг беше стабилен на 34 отсто во јануари во анкетата на Ифоп, сè уште се обидува низ парламентот да го протурка законот за финансии за оваа година.

Анкетата на Ифоп беше спроведена преку Интернет и телефонски во периодот меѓу 15 и 23 јануари, на примерок од нешто над 2.000 испитаници.

Во моментов нема коментари за веста. Биди прв да коментира...

Остави коментар