Повеќе од еден век три генерации од семејството Бухерер градеа еден од најексклузивните брендови за часовници и накит во светот, продавајќи им скапи часовници и блескав накит на богатите и славните. Сега, мистериозниот 87-годишен швајцарски милијардер што стои зад истоимените луксузни бутици - претседателот Јорг Г. Бухерер - се согласи да му го продаде „Бухерер АГ“ на „Ролекс“, потег што ја шокира индустријата со луксузни часовници од високата класа.
Компаниите не ги открија условите за продажба, а не е лесно да се дојде до вреднување бидејќи ниту една од овие фирми со седиште во Швајцарија не ги објавува финансиските резултати.
Bloomberg Mercury
Жан-Филип Берчи, аналитичар во „Вонтобел холдинг“, ја процени годишната продажба во повеќе од 100 продавници на „Бухерер“ на околу две милијарди швајцарски франци (2,3 милијарди американски долари), проценувајќи ја компанијата дури на четири милијарди швајцарски франци.
Одлуката на ветеранот Бухерер да се ослободи од строго контролираниот семеен бизнис делумно ја изненади индустријата поради интензивната тајност што ги опкружува и него лично и двајцата производители на часовници чии истории се тесно испреплетени со децении. Во соопштението за договорот, од „Ролекс“ изјавија дека неговиот избор е направен „во отсуство на директни наследници“.
Со купувањето на „Бухерер“, „Ролекс“ за првпат сериозно се позиционира во директната продажба на потрошувачите, што е стратегиско оддалечување од зависноста од дистрибутерите. Единствената продавница во светот што моментално е во сопственост и директно управувана од „Ролекс“ се наоѓа во седиштето на брендот во Женева.
Договорот, кој допрва треба да биде одобрен од регулаторот, доаѓа во време на она што групацијата УБС го нарече најголемиот трансфер на богатство во историјата што ќе следува во текот на следните две децении, како што стареат основачите на компаниите и инвеститорите. Сепак, не е јасно каде планира Бухерер да ги насочи приходите од оваа продажба. Портпаролот на компанијата одби да даде какви било детали надвор од гореспоменатата изјава на „Ролекс“, додавајќи дека „Бухерер“ отсекогаш била многу дискретна компанија.
Она што е јасно е дека овој потег ќе стави крај на контролата на династијата врз продажбата на врвни брендови на накит и часовници, вклучувајќи го и „Ролекс“, како и нивнитe брендoви „Карл Ф. Бухерер“ (Carl F. Bucherer), „Шопард“ (Chopard) и „Бленкпејн“ (Blancpain). Деловната историја датира од 1888 година, кога претприемачот Карл-Фридрих Бухерер и неговата сопруга Луиз отвориле продавница во Луцерн, според информациите достапни на веб-страницата на компанијата.
Нивните синови Ернст и Карл Едуард му се приклучиле на бизнисот во раните 1920-ти, а во 1924 година Ернст постигнал договор со основачот на „Ролекс“, Ханс Вилсдорф, да го додаде брендот во неговата производствена линија. Членот на третата генерација на ова семејство, Јорг, го презеде управувањето во 1977 година, проширувајќи се во Австрија во 1980-тите и десет години подоцна во Германија. Бухерер отвори продавница во Париз во 2013 година, а се прошири и во Лондон, Копенхаген и САД.
Јорг Бухерер никогаш не бил познат по давање интервјуа за медиумите и само накратко се споменува на веб-страницата на компанијата. Француските корпоративни записи го наведуваат како швајцарски државјанин.
Основачот на „Ролекс“, Ханс Вилсдорф, по потекло од Германија, основал фондација во Женева под свое име во 1945 година, која ја презела сопственоста на компанијата, се наведува на веб-страницата на компанијата. Тој починал во 1960 година и исто така немал директни потомци.
„Јорг Бухерер е последното лице што сè уште е активно, а кое работеше со Ханс Вилсдорф“, се наведува во соопштението на „Ролекс“, каде што се додава дека Бухерер ќе остане почесен претседател на брендот.
.webp){kind=icon}