Некои луксузни брендови ги намалуваат цените на своите производи на невидени нивоа во Кина, што ја одразува растечката паника поради непродадените залихи бидејќи локалните потрошувачи ги намалуваат трошоците.
Почнувајќи од овој месец, кинеските купувачи можат да ја купат малата беж крокодилска верзија на иконската чанта „Аурглас“ (Hourglass) на „Баленсијага“ (Balenciaga) за 1.947 долари или со 35 проценти попуст на доминантната платформа за е-трговија на „Алибаба“ (Alibaba Group Holding Ltd.) – „Тмол“ (Tmall). Таа цена е пониска од онаа што е наведена на официјалните веб-страници на брендот ширум светот и на главните платформи за луксузни стоки, вклучувајќи ја и „Ферфеч“ (Farfetch).
„Баленсијага“, дел од францускиот луксузен гигант „Керинг“ (Kering SA) имаше во просек 40 проценти попуст на артиклите во три од првите четири месеци од 2024 година, според луѓе запознаени со ова прашање, кои побараа да останат анонимни.
Брендот, исто така, повеќе од двојно го зголеми бројот на производи со попуст на „Тмол“, што претставува повеќе од 10 проценти од залихите на платформата од јануари до април, велат овие извори.
Во истиот период минатата година, „Баленсијага“ само во јануари ги поевтини артиклите во просек за околу 30 проценти, велат тие. Во првите четири месеци од 2022 година немало никакво намалување, наведуваат оттаму.
Сличен тренд може да се забележи и кај други брендови. „Версаче“ на „Капри Холдингс“ (Capri Holdings Ltd.), „Живенши“ (Givenchy) и „Брбери“ (Burberry Group PLC) на ЛВМХ (LVMH) ги намалија цените овој месец, некои за повеќе од половина на „Тмол“ и други домашни платформи. Просечниот попуст на „Версаче“ скокна од приближно 40 проценти на почетокот на 2023 година на над 50 проценти оваа година, според луѓе запознаени со ситуацијата.
„Версаче“ и неколку други премиум брендови, исто така, понудија попусти во подолги периоди оваа година отколку во 2023 година, велат тие. Бројот на производи на продажба се искачи на стотици во првите четири месеци од само неколку лани, додаваат тие.
Војна на цените би била незамислива до пред само неколку години за брендовите чиј раст произлегува од имиџот за ексклузивност и производи кои ја задржуваат својата вредност со текот на времето. Ретко е да се видат луксузни брендови, кои обично се обидуваат да ги тргнат залихите во трговските центри или да се ослободат од нив преку приватна продажба, да настапуваат со толку големи попусти фокусирани на водечката платформа.
„Она што го сметам за изненадување и искрено непромислено е тоа што овие попусти се нудат на највидливата точка на допир на потрошувачите во светот, а тоа е „Тмол“, рече Жак Ројзен, управен директор на консалтингот за кинескиот пазар во „Диџитал Лакшри Груп“ (Digital Luxury Group). Тоа е „еквивалентно на одржување јавна продажба на Петтата авенија или Шанзелизе“.
„Керинг“ одби да коментира, додека „Капри“ и ЛВМХ не одговорија на барањата за коментар. „Брбери“ не ги коментираше попустите.
.webp){kind=icon}
