Како трговската војна САД-ЕУ влијае на вашиот плакар

Годинава очекуваме многу возбудливи трендови претставени на тековните модни недели, но постои сериозна пречка некои од тие парчиња да завршат во нашите плакари: трговската војна меѓу САД и Европа. Луксузните брендови и компании од двете страни на Атлантикот се меѓу најзагрозените, бидејќи производите што подлежат на тарифи директно се однесуваат на суровините што се користат во индустријата на луксузот.

Да потсетиме дека тарифите на американскиот претседател Доналд Трамп се однесуваат на увозот од Кина, Виетнам и Индија, при што царините се движат од 10 до 60 проценти. Овие тарифи опфаќаат производи како облека и обувки, како и суровини како памук, волна, синтетички ткаенини и кожа. Дополнително, воведени се царини од 25 отсто за увоз од Канада и од Мексико, кои се двата најголеми трговски партнери на САД. Дополнителна закана се можностите за воведување увозен данок од 25 отсто на луксузни брендови и дизајнерски производи од Европа.

Ситуацијата дополнително ескалира во средата. ЕУ најави воведување трговски „контрамерки“ за американски стоки во вредност до 26 милијарди евра како одговор на дополнителните царини на Трамп за увоз на челик и алуминиум, кои стапија во сила вчера. Одмаздничките мерки вклучуваат воведување тарифи за одредени стоки и суровини, кожа, текстил, како и повторно воведување тарифи за американските производи како бурбон виски, фармерки и мотоцикли „харли дејвидсон“, кои беа воведени за време на првиот мандат на Трамп, а подоцна беа суспендирани по преговорите со неговиот наследник Џо Бајден.

Тарифите се насочени кон значителни американски стоки во вредност од 4,5 милијарди евра. Оваа промена веќе го погоди и „Харли Дејвидсон“, кој, како што пишувавме неодамна, бележи пад на продажбата и пад на акциите за 32 отсто. Исто така, цените за моторите достигнаа апсолутен рекорд.

Трамп веднаш одговори со нова закана: воведување царини од 200 отсто за европските вина, шампањи и други алкохолни пијалаци. Тоа автоматски резултира со пад на акциите на ЛВМХ, која поседува брендови за шампањ како „моет“. Тие паднаа за цели 2,2 отсто. Производителот на коњак „реми“ загуби 4,5 отсто, а производителот на алкохолни пијалаци „пернод рикард“ 3,6 отсто.

Иако тарифите во овој контекст првично ги погодуваат луксузните брендови и компании, како и во секоја војна, најмногу ќе настрадаат обичните луѓе. Еве како.

Bloomberg

Зголемување на цените на луксузните производи

Зголемените тарифи и притисокот врз глобалните синџири на снабдување веќе предизвикуваат пораст на цените. Студијата на Националната федерација за малопродажба покажува дека предложените тарифи би можеле да ја намалат куповната моќ на Американците дури за 78 милијарди долари годишно. Студијата сугерираше дека трошоците што треба да ги апсорбираат малопродажните синџири ќе бидат превисоки за да можат сами да ги поднесат, предизвикувајќи зголемување на цените што сите ги гледаме во продавниците. Но тоа нема да ги чини само потрошувачите во Америка, туку и на глобално ниво. Еве зошто.

Познато е дека производот поминува низ различни географски места додека стигне до крајниот купувач. Зголемените трошоци за производство за азиските производители би можеле да доведат до повисоки цени на големо и мало низ светот.

Трговците што набавуваат стоки и суровини од земјите погодени од царините на Трамп би можеле да се соочат со зголемени трошоци и одложувања.

На пример, ако брендот набавува фустани или суровини за облекување од производители во Кина, зголемените трошоци за производство поради американските тарифи може да го принудат доставувачот да ги зголеми цените на глобално ниво, што директно ќе влијае на крајните клиенти.

Луксузните брендови како „Шанел“, „Тифани“ и „Луј Витон“ веќе ги зголемија цените. „Шанел“ ги зголеми цените за 5,4 отсто. На пример, најпознатиот кожен производ, чантата со флап „шанел“, тројно поскапе од 2010 година, додека чантите „леди диор“ и „луј витон кипал“ се двојно поскапи. „Тифани“ и „Ричемонт“, лидери во сегментот на луксузен накит, ги зголемија цените за осум отсто

Водечките луксузни компании реагираа на можните дополнителни царини за извозот од Европа со кои Трамп се заканува од јануари. „Доколку тарифите се зголемат, ќе ги зголемиме и цените на нашите производи“, рече Аксел Думас, извршен директор на „Хермес“, за време на објавувањето на резултатите на компанијата годинава.

Извршниот директор на „Керинг“, Франсоа-Анри Пино, изјави дека нивните брендови („Гучи“, „Ив Сент Лорен“, „Баленсијага“) немаат намера да го преселат производството надвор од Европа, нагласувајќи ја важноста на брендот „Made in EU“ за перцепцијата на престижот на луксузните производи. Но кога станува збор за суровините, луксузните брендови ќе треба да предвидат зголемување на цените. На пример, „Гучи“ би можел да доживее повисоки производствени трошоци во сегментот на кожени производи ако неговиот доставувач во Индија се соочи со зголемени царини за кожа и за ткаенини.

Bloomberg

Бернард Арно, основач и извршен директор на најголемиот светски луксузен конгломерат ЛВМХ, веќе пресели дел од својот производствен капацитет во САД, кој, по Франција и Италија, е неговиот најголем производствен центар. „Луј Витон“ произведува чанти и мали кожени производи во погоните во Тексас и Калифорнија. „Тифани“ дизајнира и произведува во САД, додека ЛВМХ поседува лозја во долината Напа, Калифорнија.

Во 2019 година Арно го исполни своето ветување дека ќе го зголеми производствениот капацитет во САД, отворајќи фабрика во Тексас. Не е изненадувачки што „волкот во кашмир“ се бори да ги одржи долгогодишните добри односи со семејството Трамп, бидејќи ЛВМХ генерира 25 отсто од приходите од американскиот пазар. Тој е втор по големина пазар, веднаш зад Азија, каде што најголемиот луксузен конгломерат во светот генерирал 28 отсто од својот приход во 2024 година.

Но тоа не влијае само на премиум брендовите. Брендовите што се потпираат на производство со голем обем и ниска маржа би можеле да се соочат со уште позначајни предизвици и дополнително зголемување на трошоците за 15 отсто при увоз од Кина во Европа. Има и проблем со доцнење од три до четири недели поради приспособувањето на синџирот на снабдување на новите мерки. „Индитекс“, кој е сопственик на брендот „Зара“, веќе пресели дел од своето производство во Португалија за да ги одржи ценовната конкурентност и ефикасност.

Стотици илјади работни места се изложени на ризик

Тарифите „ќе создадат работни места какви што никогаш не сме виделе“, рече Трамп за време на заедничката седница на Конгресот. Иако царините беа поставени како начин за зајакнување на домашното производство, економските експерти предупредуваат дека ефектите може да бидат контрапродуктивни. Во напис за „Блумберг“, аналитичарите наведуваат дека трошоците за реципрочните тарифи за САД на крајот се на товар на потрошувачите и компаниите што користат увезени суровини. Ефектот од повисоките цени ги намалува буџетите на домаќинствата, ги намалува реалните плати и го забавува економскиот раст, се наведува во анализата.

„Дури и ако купувачите се подготвени да платат повисоки цени, тарифите веројатно ќе значат помалку работни места во Америка. Како што растат трошоците, побарувачката паѓа. Помалата побарувачка го намалува производството, што доведува до помалку работни места“. Со ударот од Европа, ефектите ќе бидат уште полоши, се предвидува.

Bloomberg

Исто така се наведуваат историски примери за поддршка на тезата дека тарифите ја намалуваат конкуренцијата, што им го олеснува опстанокот на домашните компании со инфериорни производи и помала ефикасност. На пример, тарифите наметнати на странски автомобили во 1970-тите и 1980-тите ги заслепија американските производители на автомобили за потребата од иновации – и во дизајнот на возилата и во производството – што им овозможи на јапонските конкуренти да добијат предност.

Автомобилската индустрија е една од најпогодените од двете страни на конфликтот. „Порше“ веќе најави дека ќе отпушти 10 отсто од својата работна сила. Германскиот производител најави укинување на 3.900 работни места до 2029 година како директен резултат на царините и намалената побарувачка во Азија.

Сликата не е пооптимистичка за производителите на премиум алкохолни пијалаци. Дури 35 отсто од целокупното француско производство на коњак се извезува во САД. САД се исто така водечки увозник на премиум француска козметика и парфеми, со извоз вреден 2,8 милијарди евра, што претставува 12,6 отсто од вкупниот извоз, според Француската федерација на индустријата за убавина (FEBEA).

Емануел Гишар, генерален делегат на ФЕБЕА, рече дека француската индустрија внимателно ги следи најавите од САД. Индустријата „се згрозува секојпат кога Доналд Трамп објавува на X“, рече тој.

Сите овие промени ќе се одразат и на малопродажбата, а со тоа и на помалиот потенцијал за вработување во тој сектор. Трите најголеми светски луксузни конгломерати отворија само 29 продавници во Европа минатата година, што е пад од 20 отсто во однос на 2023 година и најнова индикација за забавување во секторот.

ЛВМХ отвори 15 продавници, додека „Ричмонт“ отвори 11, а „Керинг“ само три. За споредба, овие три компании отворија вкупно 36 продавници во 2023 година. Вкупно, минатата година беа отворени само 83 продавници со премиум брендови, што е пад од 107 отворени во 2023 година. Уште полоша состојба се предвидува со царините.

Bloomberg

Има ли победник?

Иако се чини дека во оваа војна сите губат, има можности и за одредени региони и сектори. Поради зголемените царини, многу луксузни компании може да го префрлат производството во Европа за да избегнат дополнителни трошоци. На пример, Турција, Португалија и Источна Европа стануваат уште поатрактивни производствени центри бидејќи не се засегнати од тарифите, а квалитетот и брзината на производство им овозможуваат да бидат конкурентни. Тоа може да отвори можности за балканскиот регион, а фабриките што веќе ги опслужуваат големите европски брендови да го удвојат својот бизнис.

Потоа, повисоките трошоци на производите од Азија би можеле да ги поттикнат трговците на мало да се свртат кон поодржливи алтернативи кога станува збор за суровините. Екопријателските ткаенини и етичкото производство можат да привлечат помлади генерации, како што се генерацијата зед и милениумците, кои веќе се чувствителни на одржливоста.

Bloomberg

Исто така, се очекува дека повисоките трошоци за нови производи би можеле да ја зголемат побарувачката за половна и винтиџ облека. Онлајн платформите како Депоп, Винтед и И-беј бележат рекорден раст. Брендовите би можеле да профитираат од кружниот моден тренд.

Кога станува збор за патот до потрошувачите, се предвидува дека трговците на мало сè повеќе ќе се фокусираат на директна продажба преку Тикток, Инстаграм и слично.

Во моментов нема коментари за веста. Биди прв да коментира...

Остави коментар