.webp){kind=icon}
Милениумците и постарите членови на генерацијата зед во Јужна Кореја не можат да се наситат од виски, поради што увозот на овој алкохолен пијалак, кој се произведува со ферментирање на житарки, е во пораст.
Во првите три месеци од годинава земјата увезла 8.443 тони виски, најмногу од Велика Британија и САД, што е за 78 отсто повеќе во однос на истиот период лани, покажуваат податоците на корејската царинска служба. Тоа е најголем пораст на бројките во првиот квартал од 2000 година и втор највисок раст од крајот на минатата година, покажуваат податоците.
Овој бран е одраз на променливиот вкус на таканаречената МЗ-генерација, која се состои од милениумци и членови на генерацијата зед. Увозот на виски е во постојан раст по укинувањето на антиковид-мерките, кога младите Корејци преминаа на потемни и посилни алкохолни пијалаци на база на житарки, кои ги мешаат со газиран сок за да добијат хајбол (анг. highball) или да ги користат во коктели.
Џихонг Парк, сопственик на музичкиот бар „Стренџ фрут“ (Strange Fruit) во трендовскиот кварт Хонгдае во западен Сеул, вели дека неговите клиенти деновиве пијат повеќе ирско виски „џејмсон“ (Jameson).
„Вискито станува сè попопуларно меѓу младите, а тие не пијат многу во споредба со нашата генерација. Мислам дека повеќе ги интересира каков е вкусот на вискито“, вели 56-годишниот Парк. Како што посочува тој, во неговиот локал „џејмсон“ е популарен затоа што „не е скап, а е доста лесен за пиење, добар пијалак“.
Пивото и натаму е на прво место, со обем на увоз околу седум пати поголем од обемот на увоз на виски во периодот од јануари до март, но увозот на пиво е паднат за осум отсто. Продажбата на виски, ракија и рум во првите два месеца од оваа година ја надмина продажбата на соџу, националниот пијалак во земјата, покажуваат податоците на компанијата „Е-Март“, еден од најголемите трговски синџири во Јужна Кореја.
Луѓето во нивните 20-ти сочинувале повеќе од една третина од купувачите на виски минатата година, а оние над 30 речиси половина, според „Јонхап њуз“ (Yonhap News), од каде што цитираат податоци од ГС25 (GS25), најголемиот малопродажен синџир во земјата. Повеќе од половина од клиентите за виски во ЦУ (CU), уште еден синџир на продавници, се во своите 20-ти и 30-ти.
