Охрид е еден од македонските градови со најмногу иселени граѓани. Речиси нема семејство што нема свој близок во странство. И додека дури две третини од луѓето овде не гледаат можности за развој и се песимисти да отворат сопствен бизнис, Брајан Јансен мисли поинаку. Овој млад Холанѓанец и сопругата Кети одлучиле да продадат сè во татковината и од нула да почнат да ја градат иднината овде, во Балканскиот Ерусалим.
Лаунџ-ресторанот „Д лајон“ (The Lion) го отвориле пред две години. По неколку дена поминати во Охрид и детално разгледување на менијата, кои најчесто транспарентно се истакнати пред угостителските објекти, најголемо внимание ми привлече токму нивната понуда, и според изборот на јадења и според цените.
Овде само десертите чинат помалку од 300 денари. За сè друго ќе треба малку повеќе да го одврзете ќесето. Добив впечаток дека овде се служи и најскапиот прв, а според многумина и најважен оброк во денот. Брајан ни откри дека странците го обожаваат „Појадокот на баба“, инаку класичен рецепт за летна манџа. За две изматени јајца со домати, печени пиперки, лук и сирење ќе треба да одвоите 400 денари.
Bloomberg Adria
Тој нагласува дека цените во нивниот ресторан немаат никаква врска со тоа што доаѓаат од Холандија и дека тие се формирани врз основа на трошоците за набавка, плати, кирија итн., како и секаде во хорека-бизнисот.
„Големата инфлација што ја почувствуваа сите бизниси, како тука така и во светот, и постојаното зголемување на цените на глобално ниво нè натераа да дојдеме до овие цени, сè со цел да го задржиме квалитетот на храната и на услугата што ја нудиме“, објаснува тој.
ЧЕТИРИ ИЛЈАДИ ДЕНАРИ ЗА КОМПЛЕТНО КУЛИНАРСКО ДОЖИВУВАЊЕ
Инспирација за менито, кое е интересен микс од различни кујни, биле домашно приготвените јадења на неговата сопруга Кети, која по мајка е Македонка, родена во Холандија. Пасијата за храна ја наследила од мајка си и од баба си. Идеи дополнително црпеле од нивните заеднички патувања во различни земји од светот, како и желбата да се донесе во Охрид нешто поинакво.
„Во Скопје, на пример, можеш да вкусиш различни кујни, но во Охрид и покрај тоа што има прекрасни ресторани и храна, главниот фокус е на традиционалната македонска кујна и понекоја кесадиља. За среќа, се наѕира некоја промена. Мислевме дека охриѓани ќе сакаат да вкусат и нешто поинакво и не згрешивме. Пробуваме да смениме 20-30 отсто од нашето мени секоја година, за да им понудиме нешто ново на гостите“, вели Брајан.
Тој тврди дека нивниот „специјалитет на куќата“ на почетокот не можел да се најде никаде на друго место кај нас. Станува збор за две бавно печени млади свински ребра во домашен скараџиски сос. За да го стават овој деликатес на нивното мени работеле со неколку месари додека не го добиле бараниот квалитет и пресек на реброто. Маринираните ребра се крчкаат десет часа, а на крајот се ставаат на скара за месото совршено да се одвои од коската. Брајан вели дека од отворањето на ресторанот ова е нивно најпродавано јадење и кај македонските и кај странските гости, а чини 1.050 денари.
Bloomberg Adria
Во зависност од вашите преференци, едно комплетно кулинарско доживување овде, со предјадење, главно јадење, десерт и со некое убаво вино, за двајца ќе ве чини околу 4.000 денари.
ЖИВОТЕН ПРЕСВРТ - СЕГА ИЛИ НИКОГАШ
Одлуката да се преселат во Македонија и да отворат ресторан Брајан и Кети ја донеле импулсивно. Пандемијата била во полн ек, па морале да размислуваат брзо и, како што велат, инстинктивно.
„Ова беше сон на Кети и во тие моменти на одлучување беше сега или никогаш. Јас се вљубив во Македонија уште при мојата прва посета, кога имав само 13 години. Ги сакам луѓето, културата и бавниот начин на живот. На почетокот не беше лесно, направивме голема промена во нова средина“, раскажува Јансен.
Тој претходно немал никаква допирна точка со угостителството и работел во маркетинг. И Кети имала административна работа во една болница, но, сепак, таа има искуство со работа во туристичкиот сектор и во хорека-индустријата во Македонија и во Холандија.
И покрај сите предизвици, тие се уверени дека во земјава има одлични услови за бизнис. Тие се надеваат дека со својот пример ќе инспирираат помлади луѓе што од разбирливи причини заминале од Македонија да посакаат да се вратат и целото искуство што го имаат однадвор да го инвестираат во сопствената земја.
.webp){kind=icon}
Во моментов нема коментари за веста. Биди прв да коментира...