.webp){kind=icon}
Од куќата на „Хермес“ до кралското семејство од Персискиот Залив, богатството на глобалните династии порасна за 43 отсто во последната година, се наведува во извештајот на Девон Пендлтон за традиционалната листа на „Блумберг“ на 25 најбогати семејства во светот.
Кога би ги издвоиле индустриите, доминира нафтеното богатство. „Сите три семејни богатства од Персискиот Залив на списокот се веројатно многу побогати од овие конзервативни процени“, вели Пендлтон. За првпат на листата се приклучи и куќата на Нахјан, која го зазеде местото на самиот врв. Со богатство од 305 милијарди долари, Ал Нахиани од Абу Даби го надмина семејството Волтон од „Волмарт“ за значителни 45 милијарди долари. Уште еден нов учесник: Ал Тани, кралското семејство на Катар, е на петтото место. Кога станува збор за нафтата, на осмо место е индиското семејство Амбани од Мумбај, кое е сопственик на најголемиот комплекс за рафинирање нафта во светот. Дирубаи Амбани живее во 27-катна палата, која се смета за најскапа приватна резиденција во светот.
По нив следуваат семејства што три или четири генерации водат малопродажни синџири за стоки за широка потрошувачка. Најголемото богатство и второто место на листата го зазеде семејството Волтон, кое е сопственик на американскиот „Волмарт“, а тука е и нивниот германски пандан „Алди“, зад кој стои семејството Албрехт (15-то место), и францускиот „Ошан“ на семејството Мулиез (22-то место).
Сопствениците на индустриите поврзани со храна и пијалаци се застапени во значителен процент, а нивните бизниси се меѓу најстарите, кои се протегаат до седум генерации, како во случајот со американското семејство Каргил, кое е на 11-то место. Ова семејство своето патување до акумулирање богатство го започна од складиште за жито во 1865 година во Ајова. Семејството Марс е на четвртото место, а потоа следуваат семејството на еден од најголемите производители на пиво во Белгија, Анхојзер-Буш Инбев (18-то), и единственото семејство на листата од Италија, Фереро (23-то).
Како што објавивме претходно, семејствата (поточно три) што стојат зад „Хермес“ го зголемија своето богатство за дополнителни 56 милијарди долари, обезбедувајќи го третото место на листата на најбогати, а кога станува збор за луксузни стоки, по нив следува семејството Верхајмер, на седмото место. Еден од браќата зад куќата и брендот „Шанел“, Жерард Вертхајмер, неодамна беше прогласен за најбогат жител на Швајцарија. Покрај трите споменати е и семејството Дасо, кое доаѓа од Франција и е на 21-то место. Марсел Дасо, кој во 1892 година во Париз го измислил пропелерот на авионот што се користел во Првата светска војна, е основач на богатството, кое денес се базира на медиуми, недвижности, но и технолошка компанија за производство на софтвер за 3Д-дизајн, чиј профит се проценува на шест милијарди долари. Најмногу богати семејства доаѓаат од САД (8), потоа од Франција (4) и од Германија (3). Покрај сопственикот на „Алди“, кога станува збор за Германија, тука се БМВ и семејството Квант пред веќе споменатиот „Алди“ (14) и Бохрингер и Фон Баумбах (13), кои стојат зад фармацевтскиот гигант „Бохрингер“ (Boehringer Ingelheim). Инаку, претседателот на компанијата од 2015 година, Хубертус фон Баумбах ја започна својата кариера во друга фармацевтска компанија, „Рош“ од Швајцарија, чии сопственици, семејствата Хофман и Оери, заостануваат неколку места, на 18-та позиција.
