.webp){kind=icon}
Филмовите што освојуваат најмногу „оскари“ често имаат најголема гледаност во кината, односно најголема заработка. Барем така беше порано. Во изминатите неколку години филмовите надвор од холивудската блокбастер-индустрија доминираа во престижните категории за најдобар филм и најдобар режисер, додека нивното враќање на боксофисот беше скромно.
Ајде да се потсетиме на минатогодишниот повеќекратен победник „Сè, насекаде, одеднаш“ (Everything Everywhere All at Once), кој заработи 143 милиони долари низ светот, или најдобриот филм за 2022 година „Кода“, со заработка од 2,2 милиони, и „Земја на номадите“ (Nomadland) од 2021 година, со заработка од 3,7 милиони долари.
Сè до годинашните доделувања и триумфот на „Опенхајмер“ од Кристофер Нолан. Станува збор за биографски филм за сериозна тема, кој покрај седумте „оскари“, триумфира и на други престижни филмски настани, меѓу кои „Златен глобус“, наградите БАФТА на Британската академија за филм и телевизија и неколку награди од холивудските здруженија, но и филмски феномен што заработи речиси милијарда долари. Пред тоа само два филма наградени со „оскар“ заработија повеќе: „Господарот на прстените: Враќањето на кралот од 2003 година“, 1,1 милијарда долари, и „Титаник“ од 1997 година, 2,2 милијарди долари. Двата филма освоија 11 награди.
Враќањето на филмовите што комбинираат уметнички придонес и комерцијален успех исто така може да има влијание врз заживувањето на популарноста на емитувањето на самата престижна награда. Тоа е еден од клучните настани на модерната телевизиска програма, но игнорирањето на филмовите што постигнуваат голем успех на киноблагајните во последните години влијаеше и на намалувањето на бројот на гледачи на церемонијата на доделување „оскари“, како што објави Томас Бакли во една статија за „Блумберг“.
Минатогодишните 18,7 милиони гледачи во САД беа помалку од половина од 40,4 милиони гледачи што се вклучија во емитувањето во 2013 година, според гореспоменатиот текст. Бакли верува дека намалената посетеност во кината, појавата на познати личности на социјалните мрежи и напуштањето на телевизиските претплати придонесоа за намалувањето на публиката заинтересирана да го гледа доделувањето на „оскарите“.
Инаку, ова е прв „оскар“ за Нолан, кој, покрај овој, доби и награди за најдобра режија на „Златен глобус“, БАФТА, Изборот на критичари и Здружението на режисери на Америка. Тој го напиша сценариото и го продуцираше филмот со својата сопруга Ема Томас. Во својот говор, Нолан им се заблагодари на „Универзал“ и неговата извршна директорка Дона Ленгли, кои полагаа големи надежи за овој филм, а исто така ги пофали својата актерска екипа и, како што се очекуваше, своето семејство.
„Не знаеме каде оди неверојатниот пат оттука“, рече Нолан. „Но знаејќи дека вие мислите дека јас сум значаен дел од тоа, ми значи сè“.
Bloomberg
Во текот на изминатите две децении, британско-американскиот режисер работеше речиси исклучиво со „Ворнер Брос“. Меѓутоа, по нивната одлука истовремено да ги објавуваат филмовите во кината и на „Ејч-би-о макс“ , Нолан побара друга компанија за „Опенхајмер“. За да се осигури дека неговиот филм нема веднаш да заврши со стриминг, Нолан исто така побарал најмалку стодневено емитување во кино. Истовременото објавување на „Опенхајмер“ и на „Барби“ од студиото минатиот јули создаде изненадувачки ефект на барбенхајмер, кој испрати армии обожаватели во кината низ светот.
И покрај рекордниот приход од 1,5 милијарда долари што „Барби“ му го донесе на „Ворнер Брос“, „Дискавери“ сепак објави загуба од 417 милиони долари на крајот на минатата година, како што објави Си-ен-ен. Но, што значи тоа за „Универзал“? Со изненадувачкиот успех на „Опенхајмер“, компанијата го престигна „Дизни“ како најпрофитабилно студио на боксофисот во 2023 година, со заработка од 1,93 милијарда долари.
Ова е првпат од 2015 година „Универзал“ да го постигне овој подвиг, што може да му се припише на разновидниот репертоар од 24 филма, вклучувајќи ги и популарните хитови како „Супер Марио Брос“. Постојат голем број наслови на „Универзал“ што придонесуваат за оптимистичка перспектива за успех на боксофисот годинава: „Кунг фу панда 4“, „Одвратниот јас 4“, „Твистери“, „Гладијатор 2“ и „Злобни: дел 1“.
