.webp){kind=icon}
Љубителите на храната и на вселената што имаат длабок џеб наскоро ќе можат да уживаат во гурманско јадење во стратосферата, барем ако се подготвени да платат билет од речиси 500.000 долари. Помалку од 24 часа откако беше објавена можноста за патувањето, многу луѓе веќе прашаа каде можат да се пријават.
„Спејс ВИП“ (SpaceVIP), компанија за луксузни вселенски патувања, ангажира дански готвач од ресторан со ѕвезда „мишелин за шестчасовното високотехнолошко патување со вселенски балон, кое треба да дебитира следната година.
Расмус Манк ќе го креира менито за шесте гости што ќе бидат однесени на 30 километри надморска височина. Таму тие ќе вечераат гледајќи го изгрејсонцето. Со вај-фај на бродот, тие ќе можат да го пренесуваат ова искуство во живо.
Менито допрва треба да се финализира, но во интервју за „Блумберг“, 32-годишниот готвач рече дека сака јадењата да бидат иновативни како самото патување. Тој е готвач во данскиот ресторан „Алхемист“, кој беше рангиран на петтото место во водичот за 50 најдобри ресторани во светот за 2023 година.
И покрај високата цена, Манк рече дека има повеќе луѓе заинтересирани за првото патување отколку што може да ги собере во вселенското летало.
Тој рече дека планот е да се организираат повеќе патувања и подоцна да се намали цената за да им се овозможи на повеќе луѓе да уживаат во искуството.
„Веќе имавме десетици квалификувани учесници што изразија огромен интерес за ова искуство и, со само шест слободни места предвидуваме да ги обезбедиме сите патници во следните неколку недели“, рече основачот на „Спејс ВИП“, Роман Чипорука.
Леталото, изградено од „Спејс перспективс“ (Space Perspectives), не бара обука или специјална опрема, се наведува во соопштението. Капсулата ќе биде подигната со вселенски балон, технологија развиена од НАСА, наместо со ракета. Тест-летовите ќе започнат следниот месец.
„Спејс ВИП“ не е првата компанија што нуди можност за јадење во вселената. Минатата година француската компанија „Зефалто“ објави дека сака да им понуди на луѓето можност да јадат во балон на работ на стратосферата за најмалку 132.000 долари, почнувајќи од 2025 година.
