.webp){kind=icon}
Во соработка со инженери и други експерти од областа, универзитетскиот професор Анис Сефиданис го направи првиот македонски хуманоиден робот. Овој уникатен производ, очекувано, го привлече вниманието на јавноста, па го побаравме Сефиданис да ни раскаже како течело создавањето на овој изум и кои му се клучните карактеристики.
„Хуманоидот претставува робот со антропоморфна форма, кој има цел да биде интегриран во социјално сценарио, каде што наедно ќе емулира физички и когнитивни способности и ќе може да соработува со луѓето во секојдневните активности“, ни појасни на почетокот д-р Сефиданис, кој за „Блумберг Адрија“ открива детали за роботот, кој и во димензиите потсетува на човек.
Sefidanis
Роботот е изработен од метал и пластика и користени се 3Д-печатачи и ЦНЦ (CNC) машина. Врз роботот има и облека креирана специјално за него, но изработена од материјали подобни и за човекот. Колекцијата симболично насловена „За луѓе и роботи“ е дело на дипломираната модна дизајнерка Ана Митреска.
Во градењето на роботот се користени најнови технологии, кои комбинираат надгледувано и ненадгледувано машинско учење, со цел да се обезбеди синтеза на говор, препознавање говор, детекција на објекти и препознавање други облици од кој било вид. Роботот е изработен врз платформи на неколку технологии со отворен и затворен код.
Sefidanis
„Горниот дел од торзото е создаден според урнекот на Inmoоv, на кој се додадени дополнителни модули и сензори за негова поефикасна работа. За контрола на серво-моторите и другите компоненти од мехатрониката, користиме RaspberryPi и Arduino, повторно две технологии со отворен код. Софтверот е целосно изработен од наша страна во програмските јазици Python и C“, раскажува професорот.
Со помош на сензорите, роботот се обидува да го разбере контекстот во кој се наоѓа и притоа да одговара на прашања и наредби зададени од луѓето. Влезните барања може да бидат усни комуникации или, пак, визуелни (гестикулации и симболи), а излезните резултати се одговори дадени преку синтетизиран говор, активности за извршување одредено движење на дел(ови) од телото, манипулација на објекти и слични перформанси.
Sefidanis
Засега е дизајниран да генерира авторска музика со помош на вештачка интелигенција и со тоа да биде првиот робот диџеј, иако не е ограничен на една ексклузивна задача и целта е да може да учи и да се приспособува на каков било контекст и сценарио.
„Охрид е туристички град, па сакаме да се фокусираме на подобрување на туристичката понуда. Затоа избравме хуманоидот да го интегрираме во забавниот и културен живот“, објаснува д-р Сефиданис.
Sefidanis
На прашањето колку всушност чини овој уникатен и очигледно скап потфат, тој ни одговори дека е тешко да се процени севкупниот трошок, бидејќи ваквите проекти всушност никогаш и не завршуваат. Набавката на суперкомпјутерот на „Енвидија“ (околу 150.000 долари) била најголемиот дел од инвестицијата, а досега се потрошени и над 100.000 долари за другите технологии за производство на машински делови, за компјутери, простории, ангажирани лица, лиценци, патенти и сè друго.
„Целта ни е да привлечеме што повеќе странски инвеститори, бидејќи апликацијата што ја избравме носи огромен потенцијал на глобалниот пазар“, вели тој.
Sefidanis
Хуманоидот Сефиданис®, кој веќе беше претставен пред домашни и странски бизнисмени, политичари, студенти и професори, секој работен ден е достапен и за пошироката јавност во канцелариите на Друштвото за истражување и развој „Сефиданис“ во Охрид.
Д-р Анис Сефиданис е професор на Факултетот за машинска интелигенција и роботика при Универзитетот за информатички науки и технологии „Св. Апостол Павле“. Автор е на четири книги од областа на информатичката технологија, но и на повеќе иновативни проекти, од кои најпознат е Паметниот споменик на Григор Прличев (комбинација на вештачка интелигенција, виртуелна реалност и холографија), како и Споменикот на иднината, за кој доби грант од Фондот за иновации и технолошки развој.
