Чаши инспирирани од скопскиот брутализам го освојуваат глобалниот пазар

Повеќенаменски стаклени чаши со македонски потпис во моментов се хит на светскиот пазар. Може да се купат во бутици во Њујорк, но и во концептуални продавници во Дубаи и Лондон, а за нивниот уникатен дизајн најголем интерес покажуваат луѓе од угостителскиот бизнис. Идеен творец на овие производи е Даниел Николовски, 32-годишен Македонец, кој повеќе од една деценија живее и работи во Милано. Николовски овој неочекувано голем успех не го постигнува со агенти и тимови за продажба, туку преку Инстаграм.

Дизајнерот Даниел Николовски/ Извор: Приватна архива

„Секогаш сме се обидувале да ја раскажеме нашата приказна природно, преку содржина, естетика и визија. Луѓето нѐ пронаоѓаат и преку продавниците што нè застапуваат, но и преку списанија и онлајн артикли. Сè е градено органски, со многу вложено внимание во фотографија, содржина, комуникација и секогаш со нов иновативен и искрен пристап“, раскажува Николовски за „Блумберг Адрија“.

Дизајнот на неговите чаши во голема мера е инспириран од архитектонскиот брутализам во Скопје, а желбата да ја комбинира уметноста со архитектурата ја има уште од средношколските денови.

Името на брендот е двозначно - потрага по нешто, но и трага што останува. Извор: ТРАГА

„Скопје и брутализмот оставија силна трага врз мене. Тоа е архитектура со монументален, скулптурален карактер, и таа директност ме инспирираше да создадам производи со слична енергија. Сакав да ја спојам оваа сурова моќ на бетонската архитектура од моето детство со префинетоста на италијанскиот дизајн. Таа контрастна естетика е срцевината на мојот бренд - нешто грубо, но со прецизни детали“, вели нашиот соговорник.

Николовски е магистер по внатрешен дизајн. Тој почнал со дизајн на мебел, прво за еден бренд, па потоа самостојно. Со текот на времето преминал кон дизајн на помали продукти. Па така, во 2023 година му се родила идејата за „Трага“ (TRAGA), стартап за кој вели дека започнал како мал експеримент, кој добил неочекувано голема реакција.

Производите наскоро ќе бидат изложени во салонот во Милано, за кој дизајнерот вели дека е креативна лабораторија. Извор: ТРАГА

„По години работа во дизајн на ентериери и мебел, направив продукт-чаша за мартини и шот наменета за празниците. Одеднаш добив многу нарачки и го сфатив тоа како знак дека треба да продолжам во таа насока. Така започна приказната за мојот бренд, кој не ги следи типичните дизајнерски правила, туку игра со смели концепти, достапни цени и соработка со креативната заедница во Италија и интернационално“, вели тој.

Сите производи и пакувањето можат да се рециклираат. Извор: ТРАГА

Името е симболично. Тој објаснува дека доаѓа од зборот „трага“, како потрага, но и трага што остава нешто зад себе. Со неговиот креативен тим сакале брендот да има карактер и чувство на движење, односно да асоцира на постојана потрага по нешто ново, но и оставање впечаток. Николовски истакнува и дека истовремено промовираат одржливост од секој аспект.

„Производите се дизајнирани со целосно рециклирање на ум, почнувајќи од пакувањето, па до самиот производ. Му даваме приоритет на користењето рециклиран картон за пакувањето, а изборот на боросиликатно стакло (Pyrex) овозможува материјал што може бесконечно да се преработува, со што се минимизираат отпадот и влијанието врз животната средина“, вели тој.

Овој успешен млад уметник детално ни го долови и процесот на изработка, кој започнува со скици, правење мали макети и тестови на големина и пропорција. Потоа следува креирање концепт и прототипи, а по финалниот дизајн, се почнува со продукција.

Производите се изработуваат во Италија и во Романија, во соработка со експерти што можат да работат со обоено боросиликатно стакло. Сè се прави рачно, во мали серии. Дизајните, во просек, чинат од 40 до 160 евра. Моментално се продаваат чаши за мартини (коктел), кои од спротивната страна се наменети за шот.

Чашата за коктел наедно е и чаша за шот. Извор: ТРАГА

„Некои се идеални за коктели, други за вино или вода, а некои се мултифункционални, како чашата ’вајн кендл’ (Wine Candle Glass), која служи како свеќник и чаша за вино. Важно ни е да постои слобода во употребата, со фокус на повеќенаменската употреба“, вели Николовски.

Најголем интерес, но и најмногу купувачи имаат од САД, Италија и од Обединетото Кралство. Николовски информира дека тоа се најчесто луѓе од светот на угостителството, дизајн-ентузијасти и млади генерации што бараат нешто уникатно. За производите расте интересот и во земјите од регионот Адрија, иако признава дека сѐ уште се на почеток.

Чаша што е и држач за свеќа. Извор: ТРАГА

„Пазарот во регионот почнува да се отвора за дизајнерски производи, но и натаму е повеќе сконцентриран на странски брендови. Мислам дека се потребни време и едукација“, коментира тој.

Николовски веќе подготвува два нови дизајни - шолји за кафе и минималистички чаши за вода. „Сакаме секојдневните продукти да добијат малку повеќе карактер преку експериментирање со формата и функцијата“, вели тој за новата колекција.

Производите наскоро ќе бидат претставени во неговиот изложбен салон во Милано, за кој вели дека не е класично место за продажба, туку служи како креативна лабораторија во која се организираат изложби и други културни настани.

Овој млад претприемач и уметник, кој умешно ги предизвикува стандардите во дизајнот на чаши и опрема за сервирање, на крајот ни ги откри неговите следни деловни потези.

„Идните чекори се насочени кон градење заедница околу брендот, создавање нови производи, соработка со нови уметници и уживање во процесот на градење неформален, но силен и препознатлив бренд“, вели тој.

 

Во моментов нема коментари за веста. Биди прв да коментира...

Остави коментар