Како да престојувате во најлуксузните хотели во светот речиси бесплатно?

Инфлацијата на бодовите - феномен во кој е сè полесно да се собираат бодови, но сè потешко да се извлече реална вредност од нив - навистина постои. Сепак, во време обележано со реална инфлација на цените, царини и општа економска неизвесност, тешко е да ѝ одолеете на желбата да ги искористите поените за луксузно патување за кое сонувате.

Експертскиот консензус е дека акумулирањето поени и милји не е добра идеја. Исто како и со предолгото складирање вино од врвен квалитет, вредноста се намалува со текот на времето. Затоа, трошете ги – но мудро. Не  користете ги за кратки викенд-патувања, туку за патувања од вашата листа на желби што ќе ги паметите цел живот. Во овој текст пишуваме за пет начини да го направите тоа, со стратегии што функционираат за навистина легендарни хотели, од Париз до Ко Самуи.

Градина на хотелот „Риц Париз“ - тајна оаза во срцето на градот Фото: „Риц Париз“

„Риц Париз“ (Ritz Paris)

Иконата во градот полн со познати хотели, „Риц“ (Ritz) останува омилено место за кралските семејства и други ВИП-гости што ги обожаваат погледот на плоштадот „Вандом“ (Vendôme) и кадите со златни славини. Гостите исто така добиваат приоритетен пристап до малиот бар „Хемингвеј“ (Hemingway) и раскошната градина „Гранд жарден“ (Grand Jardin) исполнета со јасмини.

Резервирајте преку: The Leading Hotels of the World Leaders Club

Цена: Околу 2.400 долари или 30.000 поени по ноќ

Трик за поени: Заработувате 10 поени за секој потрошен долар за резервации во хотели и изнајмување автомобили преку порталот „Сити тенкју ривордс“ (Citi ThankYou Rewards). Потоа можете да ги префрлите поените на ЛХВ (LHW - The Leading Hotels of the World Leaders Club), кои се во сооднос 5:1, што значи дека ви се потребни околу 150.000 поени – лесно остварливи во текот на едно или две патувања – за бесплатно ноќевање во „Риц“.

Пробајте ги и: хотелот „Бадрутс палас“ во Сент Мориц (Badrutt’s Palace Hotel) и хотелот „Хаслер Рома“ (Hotel Hassler Roma).

Фото: „Валдорф Асторија Малдиви“

„Валдорф Асторија Малдиви“ (Waldorf Astoria Maldives Ithaafushi)

Со 11 ресторани за вкупно 120 вили, сите сместени на приватна плажа или над тиркизна вода, „Валдорф Асторија Малдиви“ е екстравагантен дури и за овие луксузни локации. Островот има и аквавелнес-базени, терени за тенис и огромен детски клуб со сопствен аквапарк.

Резервирајте преку: Hilton Honors

Цена: Околу 3.000 долари или повеќе од еден милион поени по ноќ

Трик за поени: Добивате 150.000 поени само со регистрација за картичка „хилтон онорс американ експрес аспајр“ (Hilton Honors American Express Aspire). Потоа пребарајте ја веб-страницата на „Хилтон онорс“ за ретки летни датуми, кога цената на вилите паѓа на 150.000 поени (иако цената во готово е сè уште 3.000 долари).

Пробајте ги и: хотелите „Валдорф Асторија Лос Кабос Педрегал“ (Waldorf Astoria Los Cabos Pedregal) во Мексико, „Конрад Ко Самуи“ (Conrad Koh Samui) и „Гранд Ваилеа Мауи“ (Grand Wailea Maui).

Соба со легендарен поглед, хотелот „Парк Хајат Сиднеј“ Фотограф: Дејвид Миченер / „Парк Хајат Сиднеј“

„Парк Хајат Сиднеј“ (Park Hyatt Sydney)

Ниту еден друг хотел во светот нема ваков поглед: соби со стаклени ѕидови и големи тераси директно спроти Операта во Сиднеј. По 35 години, „Парк Хајат“ сè уште се смета за еден од најдобрите хотели во градот, со извонредна услуга од батлер и прекрасен базен на покривот.

Резервирајте преку: World of Hyatt

Цена: Околу 1.000 долари или 40.000 поени по ноќ

Трик со поени: Еден поен од „Чејс ултимејт ривардс“ (Chase Ultimate Rewards) вреди еден поен на „Ворлд оф Хајат“ (World of Hyatt). Со пет поени за секој долар потрошен за патување преку порталот „Чејс“ лесно можете да ги соберете потребните 40.000 поени (по потрошени околу 8.000 долари). Можете да ја добиете и кредитната картичка „ворлд оф хајат“, која нуди до 60.000 поени како бонус за добредојде.

Пробајте ги и: „Алила Вентана Биг Сур“ Alila Ventana Big Sur во Калифорнија, „Парк Хајат Бивер Крик“ (Park Hyatt Beaver Creek) во Колорадо и „Миравал Аризона ресорт и спа“ (Miraval Arizona Resort & Spa).

Соба во „Паласија дел Инка“ (Palacia del Inka), каде што може да одморите по обиколката на Мачу Пикчу Извор: „Лакшри колекшн“

„Паласио дел Инка - лакшри колекшн“ (Palacio del Inka, a Luxury Collection Hotel), Куско

Поранешната палата, стара 500 години, со насликани тавани, е дел од светиот комплекс Кориканча во Светата Долина во Перу, недалеку од Мачу Пикчу.

Резервирајте преку: Marriott Bonvoy

Цена: Околу 350 долари или 45.000 поени по ноќ

Трик за поени: Понудите за регистрација за одредени картички на „Мериот бонвој“ носат речиси 100.000 поени - доволно за две бесплатни ноќевања. Плус, кога резервирате четири ноќевања на поени, петтата ноќ е бесплатна.

Пробајте ги и: одморалиштето „Сент Реџис Бора Бора ресорт“ (The St. Regis Bora Bora Resort), „Дорадо бич Риц-Карлтон“ (Dorado Beach Ritz-Carlton Reserve) во Порторико и „Грити палас“ (Gritti Palace) во Венеција.

Колонада во „Рафлс хотел Сингапур“ (Raffles Hotel Singapore). Извор: „Рафлс хотел Сингапур“

„Рафлс хотел Сингапур“ (Raffles Hotel Singapore)

„Рафлс Сингапур“ (Raffles Singapore) е синоним за врвна услуга: батлерите се достапни 24/7 за речиси секоја замислива потреба. Хотелот се карактеризира со бујни градини и дворови, чајџилници и грандиозни колонади што ги поврзуваат 115-те апартмани, давајќи му на хотелот атмосфера на селски имот во срцето на динамичниот град.

Резервирајте преку: Accor Live Limitless

Цена: Околу 1.000 долари или 50.000 поени по ноќ

Трик за поени: Во „Акор“ 1.000 поени вредат околу 20 евра во локална валута. Иако нема голема финта со поените, едно патување може да помогне во финансирањето на следното. Заработувате еден поен за секои потрошени две евра со партнерски авиокомпании како „Ер Франс“ (Air France) или „Ка-ел-ем“ (KLM), или три поени за секое едно евро на сафари-патувања со „Гилтеџ Африка“ (Giltedge Africa), што може да го забрза собирањето на потребните 50.000 поени.

Пробајте ги и: „Софител леџенд олд карактер асван“ (Sofitel Legend Old Cataract Aswan) во Египет и „Савој“ (The Savoy) во Лондон.