Какви се новите правила на ЕУ за вештачката интелигенција?

Европската унија постигна прелиминарен договор што ќе го ограничи начинот на кој може да функционира напредниот модел ЧетГПТ (ChatGPT), во она што се смета за клучен дел од првата сеопфатна регулатива за вештачка интелигенција во светот.

Сите развивачи на системи со вештачка интелигенција за општа намена - моќни модели кои имаат широк опсег на можни употреби - мора да ги исполнат основните барања за транспарентност, освен ако не се бесплатни и со отворен код, според документ на ЕУ што го видел „Блумберг“.

Моделите за кои се смета дека претставуваат „системски ризик“ ќе бидат предмет на дополнителни правила, според документот. ЕУ ќе го утврди тој ризик врз основа на количината на компјутерска моќ што се користи за обука на моделот. Прагот е поставен на оние модели кои користат повеќе од 10 трилиони трилиони (или септилиони) операции во секунда.

Дел од листата правила за компаниите кои развиваат вештачка интелигенција:

• Да имаат политика за прифатлива употреба

 

• Да одржуваат ажурирани информации за тоа како ги обучиле своите модели

 

• Да даваат детално резиме на податоците користени за обука на нивните модели

 

• Да имаат политика за почитување на регулативата за авторски права

 

Во моментов, единствениот модел што автоматски би го исполнил овој праг е ГПТ-4 (GPT-4) на „Опен еј-ај“ (OpenAi), според експертите. Извршната власт на ЕУ може да назначи други во зависност од големината на збирот на податоци, дали имаат најмалку 10.000 регистрирани деловни корисници во ЕУ, или од големината на бројот на регистрирани крајни корисници, меѓу другите можни метрики.

Овие високо способни модели треба да потпишат кодекс на однесување додека Европската комисија работи на похармонизирани и долготрајни контроли. Оние кои нема да потпишат ќе треба да и докажат на комисијата дека го почитуваат Законот за вештачка интелигенција. Исклучокот за моделите со отворен код не се однесува на оние за кои се смета дека претставуваат системски ризик.

Овие модели исто така треба да:

• Ја пријават нивната потрошувачка на енергија

 

• Изведат тестови за можни напади внатрешни или надворешни

 

• Проценат и ублажат можни системски ризици и да ги пријават ги сите инциденти

 

• Осигураат дека користат соодветни контроли за сајбер безбедноста

 

• Пријават информации што се користат за дотерување на моделот и нивната системска архитектура

 

• Се усогласат со поенергетски ефикасни стандарди доколку се развиени

 

Привремениот договор сè уште треба да биде одобрен од Европскиот парламент и 27-те земји-членки на ЕУ. Франција и Германија претходно изразија загриженост за примена на премногу регулативи за модели со вештачка интелигенција за општа намена и ризик да ги убијат европските конкуренти како француската „Мистрал еј-ај“ (Mistral AI) или германската „Алеф Алфа“ (Aleph Alpha).

Засега, „Мистрал“ најверојатно нема да има потреба да ги исполнува контролите на вештачката интелигенција за општа намена бидејќи компанијата сè уште е во фаза на истражување и развој, изјави рано во саботата шпанската државна секретарка Карме Артигас.

Во моментов нема коментари за веста. Биди прв да коментира...

Остави коментар