Јалова револуција: Животот на батеријата поважен од вештачката интелигенција

Изгледа како да беше одамна, но ЧетГПТ (ChatGPT) постои помалку од три години. Четботот што „Опен еј-ај“ (OpenAI) го лансира во ноември 2022 година донесе многу промени, вклучувајќи и во телекомуникацискиот сектор, па нема компанија за мобилни телефони, без разлика колку е голема, што нема планови да продолжи да ги развива функциите за вештачка интелигенција (ВИ) за да привлече повеќе клиенти и да не заостанува зад другите.

Минатата година напредокот беше значителен. Пред сè со јакнењето на конкуренцијата од големите компании, како што се „Епл“ (Apple), со „епл интелиџенс“ (Apple Intelligence / AI), „Самсунг“ (Samsung), со „галакси еј-ај“ (Galaxy AI) или „Гугл“ (Google) со „џеминај“ (Gemini).

Но, за нив сè уште има многу предизвици. Корисниците во овој момент немаат некоја особено силна причина да му дадат предност на еден паметен телефон пред друг. Засега ветувањата од технолошките гиганти не го постигнаа посакуваното. Анкета спроведена од специјализираниот американски веб-сајт „Селцел“ (SellCell), кон крајот на минатата година, откри дека огромно мнозинство луѓе не се заинтересирани за функциите со ВИ во паметните телефони.

Бојан Стојковски, главен уредник на IT.mk и англиското издание IT Logs, посочува дека засега во повеќето телефони доминираат дигиталните асистенти како сегмент во кој најмногу доаѓа до израз примената на ВИ. 

Бојан Стојковски Приватна архива

„Тука се секако ЧетГПТ и другите слични апликации, потоа алатките за уредување слики и видеа, а и оние алатки што помагаат при пишувањето мејлови, во поглед на структура на текст, граматика итн. Во последно време голема популарност имаат и различните апликации во конкретни области, како на пример апликации за финансиско тргување, потпомогнати од вештачка интелигенција“, вели тој.

„Самсунг“ и неговите идеи

„Самсунг“ (Samsung) е една од компаниите што презедоа голем ризик со развојот на својот систем за вештачка интелигенција, „галакси еј-ај“. Производителот тврди дека преку неговите уреди на корисниците им отвора врата за да прават „повеќе работи со помалку напор“.

Корејската компанија го дефинира својот систем како „вистински придружник со ВИ“, кој „ви помага да го живеете поефективно вашиот секојдневен живот“.

Меѓу главните функции се издвојува тоа дека тој дејствува како личен асистент за корисниците. „Преку природен разговор, ’галакси еј-ај’ ја зголемува вашата продуктивност со софистициран екосистем за да понуди персонализирани услуги што се приспособуваат на вашиот начин на живот“, објаснуваат тие.

Samsung Galaxy S24 Ultra Bloomberg

Во неодамна претставената серија на паметни телефони „галакси с25“ (Galaxy S25), „Самсунг“ понуди функции како превод на глас во реално време, подобрување во опциите на дигиталниот асистент, алатки за уредување фотографии и видеосодржини, како и сумирање на активностите од текот на денот. Особено се истакнува алатката „аудиоирејзер“ (Audio Eraser), со која можете да ги исфрлите надворешните звуци од околината што влијаат на квалитетот на видеото.

Во новиот телефон производителот ги истакнува и алатките за пребарување фотографии и видеа лесно и веднаш преку опцијата „самсунг војс“ (Samsung voice).

Визијата на „Епл“

Најинтересен случај беше оној на производителот на ајфони (iPhone). Компанијата „Епл“ (Apple), управувана од Тим Кук, беше една од последните големи компании што фрлија сè на картата на ВИ. Во јуни 2024 година компанијата го најави лансирањето на „епл интелиџенс“. 

Преку стратегиско партнерство со „Опен еј-ај“ (OpenAI), креаторот на ЧетГПТ и ДАЛИ (DALL-E), „Епл“ воведе софистициран пакет алатки за вештачка интелигенција што ја комбинираат обработката базирана на облак и на уредот.

Од компанијата тврдат дека целиот систем е во насока на подобрување на корисничкото искуство. Функциите резимираат и создаваат текстови со интелигентни алатки за „подобрена комуникација“ и генерираат слики што ја доловуваат „вашата имагинација“.

Тим Кук Bloomberg

„Епл интелиџенс“ исто така ќе го зголеми квалитетот на дигиталниот асистент Сири (Siri), преку „нов дизајн“ и со „поголема моќност од кога било“, посочија од „Епл“. Целта е асистентот да звучи „многу поприродно“ благодарение на „понапредно разбирање на човечкиот говор“.

Разиграните функции како „имиџ плејграунд“ (Image Playground) и „генмоџи“ (Genmoji) му додаваат креативен шмек на пакетот, дозволувајќи им на корисниците да генерираат сопствени слики и персонализирани емотикони.

Една од точките што вреди да се истакнат е забелешката на „Епл“ за сомнежите што се појавија во последниве години во врска со безбедноста на ВИ. „Се базира на вашиот личен контекст и ги штити вашите податоци за никој освен вас да не може да им пристапи. Дури ни ’Епл’“, нагласи технолошката компанија за својот нов систем.

„Гугл пиксел“ со фокус на фотографијата

Линијата на телефони „пиксел“ (Pixel) од „Гугл“, напојувана од нивниот сопствен чип „тенсор“ (Tensor), покажува што се случува кога една од водечките компании за вештачка интелигенција во светот ќе се фокусира на фотографијата во паметните телефони. 

Функцијата „меџик ирејзер“ (Magic Eraser) отстранува несакани објекти од фотографиите со речиси натприродна прецизност. Во комбинација со можностите за зумирање, подобрени со вештачка интелигенција, и интелигентната фотографија при слаба светлина, „пиксел“ ги претвора дури и обичните снимки во професионални фотографии.
Интеграцијата на четботот Џеминај од „Гугл“ оди чекор понатаму, овозможувајќи титлови за телефонски повици и видеа во реално време, моментална транскрипција на гласовни записи и беспрекорен превод на јазици.

Google Pixel Bloomberg

Во повеќето нови паметни телефони алгоритмите со ВИ ги анализираат навиките на корисниците за да го оптимизираат траењето на батеријата. На пример, ајфоните имаат систем што ги анализира навиките за полнење на корисникот за да го забави стареењето на батеријата. Слично на тоа, некои андроид-уреди, како „самсунг галакси“, користат длабоко учење за да предвидат кои апликации ќе се користат и соодветно на тоа ја намалуваат активноста на оние во заднината. Иако овие функции обезбедуваат постепени подобрувања, многу корисници сметаат дека реалните придобивки се минимални. Напредокот на технологијата во однос на батериите и натаму е бавен, а софтверските оптимизации можат само до одреден степен да ги решат основните ограничувања на литиум-јонските ќелии.

Bloomberg Mercury

Сè уште нема голем интерес

И покрај возбудливата природа на овие проекти, интересот за ВИ во мобилните телефони сè уште не достигна пресвртница. Анкетата објавена од „Селцел“ покажува дека 73 отсто од сопствениците на ајфони не се заинтересирани за ВИ, а 87 отсто од корисниците на „самсунг“ веруваат дека новите функции „додаваат малку или никаква вредност“ на нивното искуство со телефонот.

Анкета спроведена од „Синет“ (CNET), пак, кон крајот на август минатата година покажа дека главни интерси на корисниците што се во потрага по нови уреди и натаму се: подолг век на батеријата (61 отсто), повеќе меморија за складирање податоци (46 отсто) и подобра камера (38 отсто). Помалку од 18 отсто се оние што рекле дека нивната главна мотивација за нов телефон е имплементацијата на ВИ.

Тоа сугерира дека иако функциите за ВИ се силно промовирани, тие сè уште не се примарен двигател во одлуките на потрошувачите.

Стојковски од IT.mk вели дека треба да се има предвид и дека различните генерации ќе имаат различни приоритети кога станува збор за користење на вештачката интелигенција во паметните телефони.

„Веројатно ВИ самата по себе ќе донесе некаква иновација во паметните телефони - но тоа исто така зависи и од самите корисници, со тоа што различните генерации ги користат паметните телефони на многу различен начин. Тука би го посочил примерот со генерацијата зед и милениумците, каде што навистина има јаз околу тоа за какви потреби се користат паметните телефони наспроти лаптопите. Верувам дека ВИ ќе донесе иновација во сите уреди каде што се користи, но пак ќе потенцирам дека тоа зависи од начинот на кој самите ние ги користиме овие уреди“, посочува тој.

Depositphotos

Предизвици и насоки за иднината

Засега млакиот прием на функциите за ВИ истакнува потенцијално разидување помеѓу понудата на производителите и очекувањата на корисниците. Потрошувачите изразуваат загриженост во однос со практичноста, корисноста и ризикот по приватноста на ВИ во паметните телефони. Дополнително, некои  функции беа критикувани како нецелосни или како трикови, не успевајќи да ги испорачаат трансформативните искуства што беа ветувани. На пример, повеќето телефони имаат опција да обработат ваша фотографија во генерирана слика, која ве претвора во лик од анимиран филм, што секако е интересно, но, според повеќето луѓе, не многу корисно.

За да го премостат овој јаз, производителите треба да се фокусираат на развивање функции со ВИ што нудат поконкретни придобивки и ефективно ги адресираат потребите на корисниците. Едукацијата на потрошувачите за практичните предности на ВИ и обезбедувањето силни мерки за приватност може да ги зголемат прифаќањето и задоволството кај пошироката јавност. Според Стојковски, во наредните пет години може да се случат големи промени на ова поле.

„Веројатно во блиска иднина ќе бидеме сведоци на едно огромно поедноставување на начинот на кој ги користиме паметните телефони, со тоа што вештачката интелигенција ќе биде сеприсутен фактор во новите верзии од популарните паметни телефони, како што се ајфоните и водечките модели на ’Самсунг’“.

Она што може да се заклучи е дека како што технологијата за ВИ продолжува да се развива, нејзината интеграција во паметните телефони мора да биде внимателно дизајнирана за да се усогласи со очекувањата на корисниците и да обезбеди значајни подобрувања во секојдневната употреба, каков што е случајот со подобрената функционалност на камерата или, пак, оптимизацијата на капацитетот на батеријата.

Во некои технолошки кругови циркулираат и идеи за целосна автоматизација во користењето на мобилните телефони, што подразбира дека телефонот работи без никаков допир, само со помош на гласовни команди, а вештачката интелигенција автоматски одговара на пораки и повици според корисничките навики.

„Ова прашање е доста актуелно и за другите индустрии каде што има сѐ поголема употреба на вештачка интелигенција, но, според мене, човечкиот фактор секогаш ќе ја има клучната улога и тој процес на автоматизација може да се постигне до одреден степен, но никогаш нема да биде целосен и да го замени човечкиот придонес“, вели Стојковски. 

Големите производители на паметни телефони направија значителни чекори во вклучувањето на ВИ во нивните уреди, но во моментов останува јазот помеѓу понудените функции и вредноста што ја перципираат корисниците. Исполнувањето на очекувањата на потрошувачите ќе бара повеќе кориснички ориентиран пристап, фокусирајќи се на практични апликации и јасна презентација на придобивките.

Во моментов нема коментари за веста. Биди прв да коментира...

Остави коментар