Побарувачката на автомобили е голема, а висока ќе остане и цената. Според сегашните прогнози, автомобилите ќе поскапат меѓу пет и осум проценти до крајот на 2023 година. Кога станува збор за нив, економските правила стануваат дискутабилни.
Економистите прогнозираат дека побарувачката во наредниот период ќе забавува како резултат на мерките на централните банки, кои ги покачуваат каматните стапки. Тоа ќе го забави кредитирањето, а со тоа и трошењето пари. Сѐ поизвесно е дека ќе се намали и економската активност што треба да влијае на приходите и намалувањето на побарувачката. Овие два фактора заедно треба да придонесат за намалување на рекордната инфлација во светски рамки во последните 40 години.
Но во автомобилскиот сектор побарувачката сѐ уште ја надминува понудата.
„Како што растат резервите и каматните стапки, овие прогнози може да се изменат и да покажат знаци на умереност или опаѓање. Цените на новите возила продолжуваат да растат, но со побавно темпо“, вели Томас Кинг, претседател на одделот за податоци и аналитика во „Ј.Д. пауер“ (J.D. Power), пренесува „Блумберг“.
Добра вест, според експертите од бизнисот, е дека цената на половните автомобили го достигна врвот и сега, најверојатно, ќе се намалува. Имено, во јуни половните возила поевтинија за 7,1 отсто на годишна основа и сега се чини дека во 2023 година тие ќе бидат подостапни.
Тие што сакаат премиум-возило, ќе купат
Во автомобилскиот сектор есенва, за првпат по пандемијата, се појавија знаци на закрепнување. Тоа првенствено се должи на надминувањето на проблемот со снабдувањето со чипови од Кина, кој го зафати автомобилскиот сектор по пандемијата на ковид-19. Овој месец, според проекциите, производство ќе се зголеми за над пет отсто во однос на лани, а идната година се очекува раст од околу десет отсто во однос на годинава. Тоа производство, сепак, сѐ уште би било под нивото од претпандемиската 2019 година.
Златко Муцунски, првиот човек на „Порше Македонија“, во изјава за „Блумберг Адрија“ вели дека само една работа е сигурна за следната година во секторот трговија со возила, а тоа е дека цените ќе растат.
„Веќе се најавени дополнителни поскапувања за 2023-та и рационално е да се калкулира барем со 5-8 отсто поскапување до крајот на 2023 година“, вели тој.
Според него, најавите за намалување на побарувачката се дискутабилни, затоа што според нивната статистика и по растот на каматите, таа сериозно расте. Во наредниот период може да има некакви разлики во однос на побарувачката на автомобили од средна класа, но тоа нема да биде значително.
„По правило, побарувачката на возила од средна класа побрзо реагира на растот на каматните стапки и ваков тренд може да се очекува. Но во премиум-сегментот ценовната сензитивност е многу помала и побарувачката е сериозно голема. Околностите ни се познати и добро анализирани, така што постојано се трудиме во секој момент да имаме достапна најоптимизирана понуда на пазарот и досега бележиме одлично приспособување во различни кризни ситуации. Знаеме дека во кризни времиња ресурсите се насочуваат кон ’најсигурните опции’, а како партнер на над 20.000 клиенти повеќе од 17 години, можеме да се сметаме за ’најсигурна опција’ за купување автомобил“, вели Муцунски.
Закрепнувањето на автомобилскиот сектор е надеж за глобалниот економски раст
Нормализацијата на производството и продажбата на автомобили може да ја засили економијата до средината од 2023 година, а сегашното закрепнување не можеше да се случи во подобро време. Според експертите, токму автомобилската индустрија е најдобра причина за надеж за изненадувања во економскиот раст и пад на инфлацијата во следните неколку месеци.
Во три квартали од оваа година, производство на автомобили во земјите од Европската Унија се зголеми за 5,8 отсто. Бројките се особено позитивни во Романија и во Белгија, каде што растот е двоцифрен. Позитивниот тренд се гледа и по бројот на првите регистрации на европскиот пазар, кој расте втор месец едноподруго. Новите регистрации и натаму се во минус, на годишно ниво заклучно со септември од 9,9 отсто, но тој пад еден квартал порано изнесуваше 14 отсто.
.webp){kind=icon}