Каматата на вкупните кредити е непроменета трет месец по ред

Просечната каматна стапка на вкупните кредити во септември останала непромената во однос на август и изнесува 5,49 отсто, на годишна основа бележи раст од 1,14 п.п. Просечната каматна стапка на вкупните депозити изнесува 1,59 отсто и забележа месечен и годишен раст од 0,04 п.п. и 0,89 п.п., соодветно, соопшти Народна банка.

„Просечната каматна стапка на новоодобрените кредити , во септември, изнесува 5,49 отсто и е незначително намалена на месечно ниво за 0,04 п.п., при годишен раст од 1,40 п.п. Просечната каматна стапка на новопримените депозити забележа минимален месечен пад од 0,02 п.п. и изнесува 2,15 отсто, додека на годишна основа е зголемена за 1,08 п.п“, наведе НБРМ во соопштението.

За разлика од Македонија каде каматата на вкупните кредити останува непроменета трет месец по ред, во еврозоната по невидениот раст на каматите денеска е измерена најниската стапка на инфлација во последните две години. 

Паралелно со растот на каматите во земјите од монетарниот сојуз заради растечките трошоци за задолжување и најголемите економии доживуваат контракција. 

Движења на каматите корпотративниот сектор

Во септември, просечната каматна стапка на вкупните кредити на корпоративниот сектор оствари минимален месечен раст од 0,01 п.п. и изнесува 5,37 отсто.

„Притоа, месечната промена е резултат на повисоките каматни стапки на денарските кредити со и без валутна клаузула (за 0,05 п.п. и 0,02 п.п., соодветно), во услови на пад на каматните стапки на кредитите во странска валута (за 0,04 п.п.). Анализирано на годишна основа, каматната стапка на вкупните кредити на корпоративниот сектор е зголемена за 1,78 п.п“, соопшти НБРМ.

Каматната стапка на новоодобрените кредити на корпоративниот сектор, овој месец, е намалена за 0,23 п.п. на месечно ниво и изнесува 5,50 отсто. Месечниот пад се должи на пониските каматни стапки на денарските кредити со и без валутна клаузула (за 1,47 п.п. и 0,46 п.п., соодветно), додека каматните стапки на кредитите во странска валута остварија раст (за 1,33 п.п.). Оваа каматна стапка бележи раст од 1,78 п.п., споредено на годишно ниво.

„Во септември, просечната каматна стапка на вкупните депозити на корпоративниот сектор оствари месечен пад од 0,14 п.п. и изнесува 1,94 отсто. Според валутната структура, падот е резултат на намалените каматни стапки на депозитите во странска валута и на денарските депозити без валутна клаузула (за 0,28 п.п. и 0,07 п.п., соодветно), при остварен раст на каматните стапки на денарските депозити со валутна клаузула (за 0,03 п.п.). Анализирано на годишно ниво, каматната стапка на вкупните депозити на корпоративниот сектор е зголемена за 0,83 п.п“, велат од централната банка.

Каматната стапка на новопримените депозити на корпоративниот сектор, во септември, изнесува 1,65 отсто и е намалена за 0,16 п.п. на месечно ниво. Притоа, падот во целост произлегува од пониските каматни стапки на депозитите без валутна клаузула (за 0,53 п.п.), во услови на раст на каматните стапки на депозитите во странска валута (за 0,26 п.п.). Овој месец, банките и штедилниците не евидентирале новопримени денарски депозити со валутна клаузула, покажуваат податоците на НБРМ. Во споредба со септември претходната година, оваа каматна стапка е повисока за 0,57 п.п.

Движења на каматите кај домаќинствата

Во септември, каматната стапка на вкупните кредити на домаќинствата е непроменета на месечна основа и изнесува 5,61 отсто, додека на годишна основа забележа раст од 0,56 п.п.

„Просечната каматна стапка на новоодобрените кредити на домаќинствата, овој месец изнесува 5,47 отсто, што претставува месечен раст од 0,23 п.п. Промената пред сè произлегува од растот на каматните стапки на денарските кредити без валутна клаузула (за 0,36 п.п.), при минимален раст и на каматните стапки на кредитите во странска валута (за 0,01 п.п.), додека каматните стапки на денарските кредити со валутна клаузула се намалени (за 0,14 п.п.). Споредено со истиот период претходната година, оваа каматна стапка оствари раст од 0,82 п.п“, велат од НБРМ.

Кај каматната стапка на вкупните депозити на домаќинствата, овој месец е забележан раст од 0,05 п.п. на месечно ниво и истата изнесува 1,55 отсто.

„Притоа, нагорната промена е резултат на растот на каматните стапки на денарските депозити без валутна клаузула и депозитите во странска валута (за 0,06 п.п. и 0,04 п.п., соодветно), во услови на непроменети каматни стапки на денарските депозити со валутна клаузула. Каматната стапка на вкупните депозити на домаќинствата оствари раст на годишна основа од 0,88 п.п.“, соопшти банката.

Во септември, каматната стапка на новопримените депозити на домаќинствата изнесува 2,40 отсто и е зголемена за 0,08 п.п. во однос на претходниот месец. Месечниот раст целосно се должи на зголемените каматни стапки на денарските депозити без валутна клаузула (за 0,15 п.п.), додека кај каматните стапки на депозитите во странска валута е евидентиран пад (за 0,10 п.п.).

„Притоа, кај банките и штедилниците овој месец не се евидентирани новопримени денарски депозити со валутна клаузула. Споредено на годишно ниво, каматната стапка на новопримените депозити на домаќинствата забележа раст од 1,33 п.п“, се наведува во соопштението од централната банка.

Банкарските камати растат побавно од референтната камата

Народна банка на Македонија лани во април почна со зголемување на каматата на благајничките записи и таа од 1,25 стигна до 6,30 отсто. Овој раст на рефернтната камата не се преслика соодветно на каматите на пазарот.

Марина Петров Савиќ, виша аналитичарка на „Блумберг Адрија“, вели дека ефектот од мерките на централната банка досега е делумен.

„Гледаме дека трансмисијата врз кредитниот пазар е делумна. Каматните стапки на кредитите растеа побавно од референтните каматни стапки (Еурибор, Скибор), додека кредитната активност продолжи да бележи раст“, вели Петров Савиќ. 

Во изминатата година и половина откако НБРМ почна да ја затегнува монетарната политика, кредитирањето забавува, но и тоа е со многу послабо темпо отколку во европските земји. Во истиот период вкупните кредити се зголемени за околу половина милијарда евра, од тоа 217 милиони се кредити одобрени годинава.

 

Во моментов нема коментари за веста. Биди прв да коментира...

Остави коментар