Грција почнува со изградба на интерконекторот со Македонија, кај нас проектот уште чека амин

Компанијата „Терна“ ги започна прелиминарните работи за грчкиот дел од интерконекторот за природен гас што ќе ги поврзе Грција и Македонија, јавува дописничката на МИА од Атина, повикувајќи се на сопствени извори од грчката компанија.

Нејзините извори ги потврдуваат написите во грчките медиуми специјализирани за енергетски теми, како и денешниот текст на порталот „Енерџи маг“, според кој „патувањето на новиот гасовод Грција-Северна Македонија започна, со оглед на тоа што ‘Терна’ ги стартуваше моторите, започнувајќи ги прелиминарните работи за грчкиот дел од проектот“.

Компанијата „Терна“ пред четири месеци беше избрана за изведувач на грчкиот дел на интерконекторот, при што ги презеде деталниот проект, набавката на материјали и изградбата на гасоводот Неа Месимврија-Евзони/Гевгелија.

„Енерџи маг“ пишува дека за конкретниот проект, кој е во надлежност на Националниот оператор за пренос на гас на Грција - ДЕСФА, буџетот е ревидиран на 92 милиона евра (од 67 милиони евра во претходната програма), а паралелно во тек е и тендерот за изградба на мерната станица, која е клучна за непречено функционирање на гасоводот.

Проектот, според грчките портали, се очекува да биде финализиран напролет следната година, временски период поместен поради доцнењето од наша страна.

Министерката за енергетика, рударство и минерални суровини Сања Божиновска пред две седмици, по учеството на енергетски самит во Грција и средбата со нејзиниот грчки колега Теодорос Скилакакис, во разговор за МИА за интерконекторот објасни дека кај нас беше поништена постапката и беше почната нова, а цената е за 12 милиони пониска од минатиот пат.

„Што се однесува до нас, ‘Номагас’ ги изврши сите проверки, ние од наша страна сѐ завршивме. Испратено е до Европската инвестициона банка и секој ден се очекува, деновиве за една недела максимум очекуваме потврда и да започнеме со потшишување на договорот за фирмата што е најуспешен економски оператор и да почнеме со изградба, затоа што се чека на нас“, објасни министерката пред две седмици и посочи дека токму за интерконекторот разговарале со Скилакакис.

Гасоводот е предвидено да биде во должина од 123 километри, од кои 67 километри се на македонска територија, да се протега од Неа Месимврија кон Неготино, преку Гевгелија, и да ги поврзува двата национални система за пренос на природен гас, а со цел да се диверзифицираат изворите на снабдување со природен гас во Македонија.

Паралелно преку проектот, нашата земја ќе има можност да се снабдува и со природен гас и течен природен гас (ЛНГ) од грчките терминали во Ревитуса и Александруполи.

Почетниот капацитет ќе биде 1,5 милијарда кубни метри годишно, со можност за проширување до три милијарди кубни метри годишно, а се спроведени и студии со цел гасоводот да има соодветни спецификации за транспорт на зелен водород.

Надлежните очекуваат дека со изградбата на интерконекторот, поради географската положба, нашата земја може да стане крстопат во регионот, со оглед на тоа што веќе постои конекцијата со Бугарија, се работи на таа со Грција, а минатата година беше потпишан меморандум за соработка и со Србија, со што низ Македонија ќе се транспортира гас не само кон Србија туку и до Унгарија и Австрија.

 

Во моментов нема коментари за веста. Биди прв да коментира...

Остави коментар