„Спејс екс“ бара 75 милијарди долари и место меѓу највредните компании во светот

„Спејс екс“ моментално цели на проценета вредност од најмалку 1,8 билиони долари во рамките на иницијалната јавна понуда на акции (ИПO), според лица запознаени со ситуацијата. Компанијата за производство на ракети и развој на вештачка интелигенција на Илон Маск е сè поблиску до излегување на берза.

„Блумберг њуз“ уште во април извести дека „Спејс екс“ целеше на поголема сума од два билиони долари. Сепак, по консултации со советници и инвеститори, целната вредност е намалена, рекоа анонимни извори.

Деталите за ИПО-то, како неговата големина и проценетата вредност на компанијата, обично се прилагодуваат непосредно пред одредувањето на конечната цена на акциите, во согласност со повратните информации од инвеститорите и другите учесници во процесот, наведуваат извори. „Спејс екс“ планира да прибере до 75 милијарди долари, што би ја направило оваа понуда најголемото ИПО во историјата.

Документацијата што „Спејс екс“  ја поднесе на инвеститорите на 20 мај покажува трансформација на компанијата - од фокус на ракети за повеќекратна употреба и профитабилен бизнис со сателитски интернет до гигант во областа на ВИ услуги и инфраструктура. Амбициите на компанијата се да развива орбитални дата центри и да освои пазар кој би можел вкупно потенцијално да вреди 28,5 билиони долари.

Според претходни извештаи на „Блумберг њуз“, формалната промоција на ова ИПО би можела да започне веќе на 4 јуни, додека одредувањето на конечната цена на акциите би можело да следи веќе на 11 јуни. Сепак, извори наведуваат дека временската рамка може да биде поместена за неколку дена. Разгледувањата сè уште се во тек, а компанијата би можела да ја зголеми целната проценка на вредност доколку интересот на инвеститорите за време на промотивната кампања биде доволно силен, додаваат изворите. Портпаролот на „Спејс екс“ веднаш не одговори на барањето за коментар.

„Спејс екс“ во текот на 2025 година оствари приход од 18,7 милијарди долари, во споредба со 14 милијарди долари во 2024. Истовремено, компанијата премина од добивка од 791 милион долари во претходната година - во загуба од 4,94 милијарди долари минатата година, покажува документацијата за ИПО-то.

Компанијата во февруари соопшти дека ја презела компанијата „Екс еј-ај“ (xAI) на Маск, во рамките на која работат четботот Грок  и социјалната мрежа X. Во таа трансакција тогашната вредност на „Спејс екс“ беше проценета на билион долари, додека вредноста на „Екс еј-ај“ беше проценета на 250 милијарди долари, извести „Блумберг њуз“.

Водечки банки во ова ИПО се „Голдман“, „Морган Стенли“, „Бенк оф Америка“, „Ситигруп“ и „ЏП Морган“, заедно со уште 18 финансиски институции. Компанијата, чиј официјален назив е Space Exploration Technologies Corp., планира акциите да ги листа на берзите Nasdaq и Nasdaq Texas под ознаката SPCX.