ББА: Атлантик даде неочекувано висока понуда за Штраус Адријатик

Долго се чекаше обврзувачката понуда од „Атлантик“ за аквизиција на „Штраус“. Како што објавивме во нашиот извештај во кој го анализиравме работењето на „Атлантик Група“и како што најави менаџментот во неколку јавни настапи, „Атлантик“ беше сериозно заинтересирана за аквизицијата и таа беше само прашање на време. Она што не изненади во целата приказна е вредноста на трансакцијата, со оглед на најавите дека евентуалното стекнување ќе се случи по цена во опсег од 8 до 12 пати од вредноста на ЕБИТДА, коментираат од аналитичкиот тим на „Блумберг Адрија“ откако вчера беше објавено големото преземање.

„Имено, „Штраус Адријатик“ во 2022 година оствари ЕБИТДА од еден милион евра. Ова ниво на ЕБИТДА е нешто пониско од постигнатото во претходните две години и значително пониско од рекордните нивоа на ЕБИТДА остварени во периодот пред пандемијата, кога достигна ниво од над 1,7 милиони евра. Во однос на тоа, вредноста на обврзувачката понуда според јавниот оглас и на безготовинска основа и долг, односно „вредност на претпријатието“ изнесува 40,5 милиони евра и подразбира дека „Атлантик“ е подготвена да плати 40 пати од вредноста на ЕВ/ЕБИТДА според најновите достапни податоци за 2022 година“, вели Матео Мошња, аналитичар на корпоративни финансии во „Блумберг Адрија“.

Сепак, тој укажува дека овие информации треба да се земаат со доза на претпазливост со оглед на тоа што пред да ја даде обврзувачката понуда, „Атлантик“сигурно извршил длабинско снимање на бизнисот преку кое се утврдува нормализираната ЕБИТДА при што се елиминирани еднократните ставки, од страната на трошоците и приходите, што може значително да влијае на конечниот утврден износ на ЕБИТДА.

„Исто така, важно е да се истакне дека вредноста значително се менува доколку се земе износот на ЕБИТДА постигнат во периодот пред пандемијата, кога откупните цени на кафето беа значително пониски. Факт е дека на зголемувањето на цените на кафето не влијаеа само инфлацијата и проблемите во синџирите на снабдување, туку и други фактори како временските катастрофи во Бразил кои ги оштетија посевите и јакнењето на доларот во текот на 2022 година. За очекување е овие ставки да се стабилизираат во наредните периоди и со оглед на вредноста на понудата, би рекол дека „Атлантик секако“ смета на тоа“, вели Мошња.

Тој додава дека ако се погледне износот на ЕБИТДА остварен во 2019 година, тогаш аквицизијата е во износ еднаков на 23 пати од ЕВ/ЕБИТДА.

„Покрај сето ова, неопходно е да се земат предвид и ефектите на синергија од ваквата трансакција, што секако ќе предизвика оптимизација на логистичките процеси, административните трошоци, трошоците за маркетинг и подобра преговарачка позиција во процесите на набавка и продажба. Ваквите ефекти дополнително ќе ја зголемат ЕБИТДА што „Атлантик“ може да ја генерира како сопственик на „Штраус Адријатик“. Мое мислење е дека „Атлантик“ смета на значајни синергистички ефекти од оваа трансакција бидејќи се работи за понуда за преземање која според најновите постигнати резултати на „Штраус Адријатик“ ги надминува сите граници и ја надминува пресметката за вредноста дури и во однос на брзорастечки технолошки компании“, укажува Мошња.

Да се почека одлуката на Агенцијата за заштита на конкуренцијата

Кога е во прашање „Атлантик“, во 2022 година сегментот на кафе генерирал 21,8 проценти од приходите од продажба, а под претпоставка на непроменети околности, „Штраус Адријатик“ би ја зголеми продажбата во тој сегмент за 20 проценти со што сегментот на кафе би учествувал со 25 проценти во приходите од продажба, додава Мошња.

„Српскиот пазар е клучен за сегментот на кафе на „Атлантик“ и тој пазар учествува со околу 45 проценти од приходите од тој сегмент. Пазарот на кафе во Србија има карактеристики на олигополски пазар, имајќи предвид дека „Атлантик“ и „Штраус Адријатик“ според нашата анализа на активностите за преработка на чај и кафе,  заземаат приближно 50 проценти од пазарниот удел анализирани од аспект на оперативните приходи. Точната бројка за уделот на пазарот е малку поголема доколку се елиминираат преработувачите на чај, но сепак треба да се има предвид дека има и дистрибутери кои увезуваат преработено кафе и не спаѓаат во оваа дејност, така што пазарниот удел би можел потенцијално да биде помал отколку што е наведено“, вели Мошња.

Според него, овие податоци укажуваат на значителна пазарна концентрација, особено ако се земе предвид фактот дека третиот најголем преработувал има само 7,5 проценти удел гледано преку оперативниот приход.

„Со оглед на сето наведено, треба да се чека одлуката на Агенцијата за заштита на конкуренцијата бидејќи зеленото светло од оваа позиција не изгледа толку сигурно“, вели Мошња.

Можен пад на заработката по акција

Од перспектива на инвеститорот, оваа трансакција - ако не се сметаат синергетските ефекти - може да ја влоши сликата за акциите на „Атлантик“, вели Мошња.

„Имено, „Штраус Адријатик“ оствари нето загуба во минатата година, што значи дека оваа трансакција потенцијално би можела да резултира со пад на заработката по акција и, следствено, со повисок сооднос цена/заработка (P/E). Во моментов, односот цена-заработка на „Атлантик Група“ со цена на затворање на 23.5.2023 година е 28,4 пати. Дополнително, „Штраус Адријатик“ е многу задолжен со сооднос нето долг/ЕБИТДА од 9,8 пати. Сепак, целиот износ на финансиски задолжување се однесува на конвертибилниот долг од околу 14 милиони евра кон поврзаната компанија – „Штраус Кафе БВ“ (Strauss Coffee B.V.). Наша претпоставка е дека овој долг ќе се претвори во капитал пред потенцијалната трансакција или ќе биде целосно затворен по преземањето од страна на „Атлантик Група“.“, вели Мошња.

Тој додава дека без разлика на формата за која се договориле двете страни, ништо значајно не се менува за купувачот и продавачот.

„Со сегашната структура на билансот, „Штраус Адријатик“ има приближно 10 милиони евра нето долг, што значи дека за овој износ треба да се намали т.н. „вредност на претпријатието“ за да се дојде до износот на капиталната вредност што „Атлантик“ треба да ја плати во случај на извршување на трансакцијата. Според билансот на состојба, „Атлантик“ на 31 март 2023 година имал готовина од 62,3 милиони евра готовина и сооднос нето долг/ЕБИТДА од 1,6 пати, така што наведената сума ќе може да се покрие без поголеми проблеми“, заклучува Мошња.