Кои македонски менаџери купуваат акции во своите компании?

Душан Пецовски, претседателот на Управниот одбор на фармацевтската компанија „Реплек“, се стекнал со три нови акции од компанијата и сега поседува 3.118 или 12,03 отсто од вкупниот број акции. Оваа информација „Реплек“ ја достави денеска до Македонска берза.

Дополнително, нови акции купил и друг акционер што поседува над пет отсто од капиталот односно Владимир Пецовски кој се стекна со една нова акција и сега поседува 1.626 обични акции или 6,27 отсто од вкупниот број акции. Од компанијата известија и дека Марјан Велковски, кој е член на Управниот одбор, за првпат се стекнал со две акции.

Во деловниот свет купувањето акции на една компанија е знак за доверба на менаџментот во успехот на компанијата со која управува и сигнал до инвеститорите дека цената на акцијата, според мислењето на менаџментот, е погодна за инвестирање.

Минатата недела првиот човек на „Алкалоид“, Живко Мукаетов, се стекна со 200 обични акции издадени од компанијата. 

Објавите од овие две компании всушност се и меѓу најчестите кога станува збор за купувањето акции од членови на менаџментот. Директорот на „Алкалоид“, кој моментално поседува 9,03 отсто од капиталот на компанијата, оваа година во неколку наврати се стекна со нови акции, а акции купуваа и членовите на Управниот одбор Виктор Стојчевски и Кире Ицев.

Сепак во Македонија, впрочем, не е јавно колку акции поседуваат менаџерите во една компанија, освен ако не се акционери што поседуваат над пет проценти од капиталот. Податоците за сопственоста во фирмите не се објавуваат ниту во финансиските извештаи.

Анализа на берзанските „ѕвезди“ односно компаниите што го сочинуваат берзанскиот индекс МБИ 10 покажува дека само четири компании годинава известиле дека нивни актуелни менаџери купиле акции во фирмата. Освен „Алкалоид“, тоа се „Гранит“, „Макпетрол“ и Комерцијална банка.

Зоран Милковски, кој во „Гранит“ поседува над девет отсто од капиталот, годинава во април извести дека докупил уште 6.137 акции. 

Годинава во август Никола Џамбазовски, главен директор за продажба и развој и член на Управниот одбор на Комерцијална банка, стекна 120 обични акции на банката, а Горан Антевски, член на Надзорниот одбор, купи 200 обични акции од Комерцијална банка. 

Андреја Јосифовски, генерален директор на „Макпетрол“, последен пат на крајот на август се стекна со 135 обични акции на компанијата. Тој не е акционер што поседува над пет отсто од акциите на оваа нафтена компанија, меѓутоа тој е еден од најголемите акционери во транспортната компанија „Оилко“, во која поседува 14,98 отсто од акциите, додека „Оилко“ е акционер што држи 22,87 отсто од акциите на „Макпетрол“. 

Во моментов нема коментари за веста. Биди прв да коментира...

Остави коментар