НБГ доби дозвола да дели дивиденда, „Стопанска банка“ нема

Европската централна банка (ЕЦБ) ќе им дозволи на грчките банки да им даваат дивиденда на своите акционери, а ова се случува по повеќе од една деценија, во која земјата претрпи болно посткризно реструктуирање.

Исплатите кон акционерите годинава сепак ќе бидат помали од она што го бараа банките, тврдат познавачите на ова прашање, кои побараа да не бидат идентификувани бидејќи одлуката не е конечна.

ЕЦБ одби да коментира.

Последен пат кога голема грчка банка исплати дивиденда беше во 2008 година, пред светската финансиска криза и непосредно пред почетокот на должничката криза во земјата во 2010 година. Оттогаш банките се докапитализираа во рамките на програмата за спасување на Грција.

Се очекува ЕЦБ да ги дозволи исплатите откако грчките банки ги намалија нефункционалните заеми и ја зголемија својата финансиска сила додека економијата постепено се враќа во нормала. Долгот на земјата го врати статусот на инвестициско ниво минатата година.

Четирите таканаречени системски банки - „Еуробанк“ (Eurobank Ergasias Services and Holdings SA), „Пиреус банк“ (Piraeus Bank SA), „Национална банка на Грција“ (National Bank of Greece SA) и „Алфа банка“ (Alpha Bank SA) - веќе ја вградија исплатата на дивиденда годинава во нивните планови, во очекување на соодветните одобренија од властите.

Во четвртокот, по објавувањето на веста за дивиденда, се зголемија акциите на сите четири банки.

Надзорното тело сè уште проценува како ќе се развиваат нивоата на капиталот на банките, велат изворите. ЕЦБ ја разгледува улогата што ја играат одложените даночни кредити за минатите загуби во капиталните резерви на грчките банки, како и изгледите за нивната заработка доколку каматните стапки се намалат годинава, велат тие.

Од октомври државата го забрза својот план за деинвестирање од кредиторите на земјата. Грчкиот фонд за финансиска стабилност прво го продаде целиот свој удел во „Еуробанк“, а потоа истото тоа го направи во ноември за „Алфа банка“. Тој исто така продаде удел од 22 отсто во „Националната банка на Грција“ (НБГ) и во март ја финализира продажбата на целосниот удел во „Пиреус банк“.

Фондот сè уште има 18 отсто учество во НБГ и 66 отсто во „Атика банка“. Неговиот план предвидува целосно излегување од заемодавците на земјата до крајот на 2025 година.

НБГ има своја банка во Македонија

Грчката НБГ е мнозински сопственик на македонската „Стопанска банка“. Оваа банка во текот на минатата година оствари добивка од 3,4 милијарди денари (56,4 милиони евра), што е зголемување во однос на претходната година, кога добивката на банката изнесуваше 2,3 милијарди денари (38,6 милиони евра). 

Од банката информираа дека има зголемување на нето-приходите од камати како резултат на зголеменото кредитно портфолио и други позиции во рамките на ликвидната актива на банката, во услови на тренд на пораст на каматните стапки, кој беше присутен во текот на 2023 година. 

Инаку, седницата на Собранието на акционери на „Стопанска банка“ АД Скопје е закажана за денеска, а на дневен ред меѓу другите точки е и одлуката за прераспределба на добивката.

Во предлог-одлуката не е предвидена исплата на дивиденда и стои: се предлага акумулираните добивки од претходни години во износ од 2.460.000.000 денари (40 милиони евра) да се прераспределат во акумулирана добивка која нема да биде расположлива за исплата на дивиденда на акционерите во иднина (ограничена за распределба на акционерите). 

Ова е со цел да обезбеди коефициентот на адекватност на капитал да биде усогласен со регулативните барања пропишани од страна на Народната банка. Наедно, наведеното ќе биде во поддршка на деловниот план на банката во следниот период. Дополнително, ова ќе го зајакне основниот капитал на банката преку прераспределба на акумулирана добивка во акумулирана добивка што нема да биде расположлива за исплата на дивиденда на акционерите во иднина (ограничена за распределба на акционерите) и ќе служи како основа за подршка на деловните и развојните цели на банката.