„Мајкрософт“ вложува 1,5 милијарда долари во компанија за ВИ од Емиратите

„Мајкрософт“ (Microsoft Corp.) ќе инвестира 1,5 милијарда долари во Г42 (G42), водечката компанија во Обединетите Арапски Емирати (ОАЕ) за вештачка интелигенција (ВИ). Фирмата со седиште во Абу Даби е посветена на намалување на своето присуство во Кина.

Како дел од договорот, претседателот на „Мајкрософт“, Бред Смит, ќе му се приклучи на одборот на Г42, а Г42 ќе го користи Ажур (Azure) на американскиот производител на софтвер за своите апликации за вештачка интелигенција. Договорот - проширување на постојното партнерство меѓу двете компании - е развиен во консултација со владите на ОАЕ и САД, рекоа Смит и извршниот директор на Г42, Пенг Ксијао.

„'Мајкрософт' доби силно охрабрување од американската влада да продолжи со овој процес“, рече Смит. „Тоа го одразува признавањето на американската влада за важноста на односите меѓу двете земји и важноста за дополнително охрабрување на одговорните компании, како Г42 и 'Мајкрософт', навистина да бидат во првите редови, не само во самата технолошка област туку и во глобалната безбедност и доменот на одговорни стандарди за вештачка интелигенција“.

Партнерството доаѓа по заткулисни преговори меѓу американската влада и блискоисточната фирма, во кои Г42 се согласила да се дистанцира од Кина и да се сврти кон американска технологија. Г42 е во разговори со Бирото за индустрија и безбедност на американското министерство за трговија, според лица запознаени со дискусиите. Според договорот, од Г42 се согласиле да го намалат своето присуство во Кина или да се соочат со потенцијални казнени мерки од Вашингтон, велат упатените.

Bloomberg

Г42 во ОАЕ важи за лидер во налетот во сферата на вештачката интелигенција, а компанијата е вклучена во различни бизниси - од клауд компјутниг до автономни автомобили. Таа е дел од империјата вредна 1,5 трилион долари на советникот за национална безбедност на ОАЕ, шеикот Тахнун бин Зајед ал Нахјан.

„Инвестицијата му дава на ’Мајкрософт’ малцински удел во Г42“, рече Ксијао, кој одби да ги открие финансиските услови или да каже колку ќе потроши Г42 за облак-услугите на „Мајкрософт“. „Мајкрософт“ со седиште во Редмонд (Вашингтон) и Г42 исто така ќе основаат фонд од милијарда долари наменет за програмери.

„Во подоцнежната фаза од договорот, ’Мајкрософт’ ќе хостира некои од своите апликации во центрите за податоци на Г42 и ќе го користи партнерството како начин да допре до клиенти во Африка и Централна Азија“, рече Смит.

„Денес има пазари каде што ’Мајкрософт’ - или која било американска технолошка компанија - нема вистинско присуство до центрите за податоци“, рече тој. „Ова е вид на партнерство што навистина може да ја донесе технологијата на облак и вештачка интелигенција на глобалниот југ веројатно една деценија побрзо отколку што инаку би се случило“.

Договорот за инвестирање, потпишан кога Смит го посети Абу Даби во текот на месецов, е производ на едногодишни разговори, кои вклучувале координација со владини претставници во двете земји. Во февруари, Ксијао од Г42 рече дека компанијата ќе го намали своето присуство во Кина и вети дека ќе инвестира во клучните западни пазари.
 
До тоа дојде откако клучната американска законодавна институција го повика Министерството за трговија да размисли за трговски санкции врз компанијата поради нејзините врски со Пекинг, а по наводите во сторија на „Њујорк тајмс“. Г42 го негираше извештајот и рече дека компанијата работи на комерцијална стратегија од 2022 година за целосно усогласување со американските партнери и дека престанала да се занимава со кинески компании.