Драматичен пад на акциите на холандскиот АСМЛ

Холандскиот производител на чипови АСМЛ (ASML Holding) ги разочара инвеститорите објавувајќи скромни договори за нарачки, а акциите потонаа најмногу во последните 26 години. Дојде и денот по објавувањето на извештајот, но ситуацијата за Холанѓаните не изгледа ништо подобро.

Бидејќи еден од предводниците на лудилото со вештачката интелигенција изгуби 60 милијарди евра во вредност само за еден ден, многумина почнаа да се прашуваат колку навистина е здрава таа индустрија.

„Иако побарувачката за вештачка интелигенција останува силна, закрепнувањето на другите сектори е во застој, а таквиот развој на настаните треба да се очекува до 2025 година“, напиша во белешка аналитичарот на „Џефрис“ (Jefferies), Џанардан Менон.

Кина останува најголемиот пазар на АСМЛ  Bloomberg

АСМЛ, покрај неуспехот на полето на нарачки, каде што е забележана продажба од само 2,6 милијарди евра (а се очекуваа 5,4 милијарди евра), ги намали и проекциите за 2025 година, што дополнително ги обесхрабри акционерите.

„Иако нарачките се солидна бројка, мораме да признаеме дека пониските проекции укажуваат на доцнење во циклусот на закрепнување и покажуваат дека постојат специфични предизвици што го принудија АСМЛ да ги ревидира очекувањата“, посочува Сара Русо од „Бернштајн“ (Bernstein).

Компанијата ќе разговара со акционерите денеска, но самиот извештај не објасни зошто бројот на нарачки бил толку многу помал од очекуваното.

„Многумина ќе зборуваат дали објавата беше планирана или пропуст, но резултатите беа очигледно разочарувачки“, изјави за „Блумберг“ (Bloomberg) аналитичарот од „Кантор Фицџералд“ (Cantor Fitzgeralda), Си Џеј Мјуз. „Лошата состојба на ’Интел’ (Intel) и на ’Самсунг’ (Samsung) е очигледно поголем фактор отколку што се мислеше досега“, додаде тој.

Криза во секторот

Споменатиот „Интел“, според сознанијата на „Блумберг“, летово почна да разгледува сценарија за излез од кризата, а меѓу можните решенија се издвојување на бизнисот во делот на дизајнот на производи, како и прекин на проектите во фабриките.

„Морган Стенли“ (Morgan Stanley) и „Голдман Сакс“ (Goldman Sachs Group Inc.), долгогодишни банкари на „Интел“, советуваат за опции што би можеле да вклучуваат можни аквизиции и спојувања, велат изворите. Дискусиите добија уште поголема итност откако компанијата со седиште во Санта Клара, Калифорнија, објави лош извештај за заработка, со што акциите паднаа на најниско ниво од 2013 година.

Нема да има некој голем потег во блиска иднина, а дискусиите сѐ уште се во рана фаза, предупредуваат изворите. Претставник на „Интел“ одби да коментира, додека „Морган Стенли“ и „Голдман Сакс“ не одговорија веднаш на барањата за коментар.

Акциите на „Интел“ и на АСМЛ денеска паднаа за повеќе од три проценти. Сепак, ако се гледаат перформансите на акциите годинава, холандската компанија е во неизмерно подобра ситуација. Дури и по падот, таа е во минус само за околу два отсто, додека акциите на „Интел“ потонаа за повеќе од 50 отсто од јануари.

Во моментов нема коментари за веста. Биди прв да коментира...

Остави коментар