Од дете од работничко семејство до балкански милионер: Бизнис-патот на Миодраг Костиќ

Миодраг Костиќ го започна својот претприемачки пат во 1983 година во Врбас и многу брзо покажа дека дете од работничко семејство може да успее во животот и да се најде на листата на „Форбс“ на најбогатите луѓе.

Овој дипломиран економист, кој никогаш не работел во државна фирма, влезе во бизнисот со 20.000 евра, за колку што го продал станот во Врбас. За четири децении успеа да создаде регионална деловна империја и да ја позиционира „МК груп“ (MK Group) меѓу водечките компании во Југоисточна Европа.

Холдингот „МК груп“ работи во секторите банкарство, туризам, земјоделство, недвижности и обновливи извори на енергија и своето работење го шири главно во регионот Адрија: Србија, Словенија, Хрватска и Црна Гора.

Во рамките на компанијата директно работат околу 4.000 вработени.

Како започна сè?

Костиќ влезе во приватниот бизнис веднаш по студиите на Економскиот факултет во Нови Сад, каде што дипломира на насоката за информатички технологии во 1983 година.

Како што се вели, никогаш не работел за друг, веднаш почнал да работи за себе.

Првата фирма на Костиќ била регистрирана како занаетчиска, оџачарска работилница. Потоа влегол во производство на пченкарни снегулки, па изнајмил туларница. Кон крајот на 1980-тите на ТВ Белград беше прикажуван како „економско чудо од Нови Сад“.

„Мојот прв сон беше класичен: да имам 100.000 марки во кеш, добар автомобил и стан, свој покрив над главата“, рече тогаш Костиќ.

Следниот деловен потфат на Костиќ, 12 години подоцна, беше основањето на брокерската куќа „МиВ инвестмент“ (M&V Investment), која Белградската берза ја прогласи за најдобра брокерска куќа во земјата во 2005 година. Кон крајот на 2008 година „МиВ инвестмент“ станува стопроцентен сопственик на „Инвест брокер“, брокерска куќа во Црна Гора.

Во годините што следуваа неговата претприемачка кариера одеше по нагорна линија.

Некрунисан крал на шеќерот

Со купувањето на шеќераните во 2002 година започнува развојот во земјоделско-прехранбениот сектор со фирмата „Суноко“ (Sunoko). Тој купил три шеќерани за по три евра.

„Повеќе беше тоа, од моја страна, ризичен потег - да видам како ќе се одвиваат работите ако ги купам тие три шеќерани за тие симболични три евра. Да знаев дека толку евтино ќе бидат продадени ’Црвенка’ и ’Жабаљ’, веројатно ќе размислував поинаку. Па, веројатно тогаш ќе купев нешто за милион евра што во тој момент прави седум милиони евра, наместо нешто за три евра што има загуба од 23 милиони евра. Кога ги плаќавме тие три шеќерани по три евра, збирот на нивните загуби изнесуваше 23 милиони евра“, рече Костиќ во интервју за магазинот „Бизнис“.

Во моментот, во трите шеќерани во Пеќинци, Ковачица и Бач годишно се преработуваат 1,7 милион тони шеќерна репка и се произведуваат 260.000 тони шеќер. Со такви деловни резултати, „Суноко“ е најголемиот домашен производител и извозник на шеќер.

MK Group/Nebojša Babić

А потоа дојдоа хотелите…

Во декември 2008 година, „МК груп“ како единствен понудувач на тендерот за 23 милиони евра го купи комплексот хотели „Генекс“ (Genex) на Копаоник. Тогаш се крена голема прашина околу прашањето дали најпопуларните планински хотели во Србија вредат повеќе.

„Овој бизнис е повеќе приватно-патриотски чин отколку што има некаква економска логика. Многу го сакам Копаоник. Хотелиерството не е стратегиска ориентација на ’МК груп’, но Копаоник е наша долгорочна инвестиција“, рече Костиќ во интервју за неделникот „Време“ пред отворањето на зимската сезона во 2010 година.

Сепак, во наредните години „МК груп“, со Костиќ на чело, многу вложуваше во хотели.

Се чини дека никој не покажал подобро од Костиќ дека капиталот ги пробива и најтврдите политички бариери доколку за тоа постојат економски интереси.

Во туризмот оваа група инвестира над 500 милиони евра, во четири држави од регионот Адрија - Србија, Словенија, Хрватска и Црна Гора. На Јадранот има 11 хотели - осум во Црна Гора, два во Хрватска и еден во Словенија, со повеќе од 2.500 соби, и тоа на најатрактивните локации.

Го купи „Карнекс“ од Англичаните

Кон крајот на 2011 година дел од холдингот станува и компанијата „Карнекс“ (Carnex) од Врбас. Пред да стане членка на „МК груп“, компанијата „Карнекс“ беше во сопственост на англиски инвестициски фонд.

„Честа вест е дека домашното им е продадено на странци, а ретка е дека домашното останува во домашни раце. Враќањето на ’Карнекс’ во домашна сопственост е еднакво добро како за Србија така и за српската економија и српските работници“, рекоа тогаш од „МК груп“.

Чекор по чекор до банка и прв банкар на Србија

Во меѓувреме „МК груп“ го шири своето портфолио и на банкарството. Од 2014 година, од малцински станува прво мнозински, а потоа и стопроцентен сопственик на банката АИК (AIK Bank). А во текот на 2017 година и на „Алфа банк“ (Alpha Bank) во Србија. Во јуни 2019 година АИК целосно го презеде сопствеништвото над „Горењска банка“ во Словенија и со тоа преземање стана првата банка од Србија што излезе на пазарот на Европската Унија.

Потоа АИК го презеде работењето на руската „Сбербанк“ (Sberbank) во Србија откако руската финансиска институција се најде во проблем поради санкциите кон руските ентитети во Европската Унија поради војната во Украина.

Освен тоа, Костиќ кон крајот на 2022 година влезе во сопствеништвото на „Адико“ (Addiko Bank) преку трансакција на Виенската берза и така стана најголем акционер на таа компанија.

А минатата година во ноември доби согласност од Народната банка на Србија и другите надлежни регулаторни тела и официјално стана сопственик на „Еуробанк директна“ (Eurobank Direktna Bank) во Србија.

Го изгради првиот ветерен парк во Србија

Костиќ беше пионер во обновливите извори на енергија и во 2015 година го изгради првиот ветерен парк во Србија.

Во јуни 2020 година „МК груп“ го заврши процесот на купување на 67 отсто од акциите на агробизнис-компанијата „Викторија“ (Victoria Group). Со интеграцијата на компаниите членки на „Викторија“, „МК груп“ стекна статус на мнозински сопственик, додека дотогашните акционери Милија Бабовиќ и компанијата „Апсара“ (Apsara Limited) останаа малцински сопственици.

Depositphotos

Само една година подоцна тој ги продаде фабриката за масло во Шид, „Лука Бачка Паланка“ и „Соја протеин“.

Во јуни 2020 година, истата година, Костиќ ја купи словенечката филијала на „Хета Асет“ (Heta Asset Resolution).

Меѓу најбогатите на Балканот

Костиќ беше меѓу најбогатите луѓе на Балканот и неколкупати се најде на листата на „Форбс“ на најбогатите.

Во 1990-тите години влезе и во политиката, беше кандидат за пратеник во Граѓанската партија на покојниот Илија Радун, а од 1996 до 5 октомври 2000 година беше генерален директор на Демократската партија.

Од управувачката функција во компанијата што ја изгради, Костиќ се повлече пред пет години поради болест, а управувањето им го препушти на менаџментот и на својот син Александар Костиќ.

Во моментов нема коментари за веста. Биди прв да коментира...

Остави коментар