„Нисан“ и „Хонда“ се соочуваат со пад на продажбата во Кина поради заканите за царини

Извештаите за заработка на „Нисан“ (Nissan Motor Co.) и на „Хонда“ (Honda Motor Co.) се соочуваат со ризик да бидат засенети од претстојниот можен колапс на интензивните разговори за интеграција.

Што се однесува до заработката, двата јапонски производитела на автомобили ќе мора да се позанимаваат со грижите предизвикани од подготвеноста на американскиот претседател Доналд Трамп да воведе царини во обид да ги преобликува трговските односи со соседно Мексико, државата каде што и двата јапонски производитела на автомобили имаат големи производствени капацитети.

Bloomberg Mercury

Од друга страна, слабиот кинески пазар на автомобили веројатно влијаеше на продажбата. Целокупната слика е порозова за „Хонда“ во однос на нејзиниот помал конкурент, кој веќе именува нов директор за финансии додека се бори да го заживее растот на профитот. Понатамошните трошоци за реструктурирање би можеле да поттикнат уште едно намалување на проекциите за заработка, објави „Блумберг интелиџенс“ (Bloomberg Intelligence).

Претходно, аналитичарите на „Блумберг Адрија“ пишуваа токму за овој проблем со најавеното, а засега неизвесно спојување на „Нисан“ и „Хонда“. Веста за наводно неуспешниот договор за спојување на овие две компании, која пред неколку дена беше објавена во јапонскиот весник „Асахи“ (цитирајќи непознати извори), предизвика јасна реакција кај пазарите на капитал, посочуваат нашите аналитичари. Имено, акциите на „Хонда“ и на „Нисан“ повторно покажаа спротивни трендови, по доста конвергентните трендови во изминатиот месец, кога пазарот се приспособи по најавата за спојување.

Под знак прашалник сè уште е иднината на „Нисан“, со оглед на трендот на опаѓање на растот на приходите. Спојувањето со „Хонда“ би им обезбедило поддршка од поголем партнер и во голема мера би ги заштитило од конкурентските ветрови. Консолидацијата најмногу има фискална смисла, имајќи предвид дека и „Хонда“ и „Нисан“ ги губат пазарните удели од кинеските конкуренти. 

Почетниот дел од текстот го напишаа Реина Сасаки, Џастин Т. Ли и Харшита Сваминатан/„Блумберг“.