Анкета меѓу странските инвеститори: Паѓаат нарачките, ќе се намалува бројот на вработени

Германската криза се прелеа во Македонија и дури 62 отсто од странските компании во земјава лани имале намален обем на работа. Нивните очекувања за годинава се дека нарачките ќе паднат меѓу 10 и 25 отсто.

Тоа неминовно ќе доведе до намалување на бројот на вработени, покажува анкетата што Советот на странски инвеститори ја спроведе во периодот од ноември лани до јануари годинава.

„Намалување на бројот на вработени не значи отпуштање, туку значи дека нема да се пополнува работното место ако некој работник си замине. Значи дека нема да се продолжува договорот за вработување по неговото истекување и работното место ако некој замине или нема да има продолжување на договорот“, изјави Виктор Мизо, претседател на Советот на странски инвеститори.

 

 

И покрај потребата за намалување на обемот на работа, квалификувани работници ќе фалат. Тоа е еден од главните проблеми со кои се соочуваат странските инвеститори во земјава. Анкетата покажува дека меѓу најголемите предизвици во текот на годинава ќе бидат и цените на суровините.

 

 

Третина од компаниите се изјасниле дека правната несигурност и честите промени на бизнис-регулативата се меѓу најголемите пречки за водење бизнис во земјава.

„Нашите планови се готови уште од септември-октомври лани, буџетите се усвоени, а на три недели до март ние уште не знаеме колку ќе изнесува минималната плата, дали ќе биде 24.400 денари или членките на Економско-социјалниот совет ќе се договорат да биде повисока“, вели Мизо.

Не помалку важен проблем за компаниите се корупцијата и правната несигурност.

 

 

Странските компании во земјава од годинава ќе плаќаат повисок данок на добивка. Поради стапувањето во сила на регулативата за минимален данок од 15 отсто на ниво на Европската Унија, корпоративниот данок беше зголемен и во земјава. Големите компании што имаат фирми-мајки во земјите од ЕУ годинава наместо 10, ќе платат данок во висина од 15 отсто.

Поради овие причини странските компании во земјава сметаат дека треба наскоро да се отвори дијалог со власта за нов сет мерки за нивна поддршка. Тој пакет на мерки би требало да биде сличен на поддршката што компаниите ја добиваа за време на здравствената криза во 2020 година. Тогаш компаниите добиваа поддршка од државата за да ги задржат вработените.

Во компаниите што учествувале во анкетата работат над 40.000 работници. Во изминатиот период тие имаат вложено над четири милијарди евра во земјава, а само лани нивните инвестиции достигнале 270 милиони евра.