text size
Финансиски кризи, војни, рекордна инфлација се само дел од стресовите што се случија во изминативе години, а се чини дека различните видови кризи се надоврзуваат една на друга и дека светот не може да исплива од вителот кој влече надолу. Македонија не е имуна на негативните влијанија од надвор, а најнова закана за домашната економија се рецесивните текови во Германија, која е наш најголем трговски партнер и една од ретките земји со кои имаме суфицит во трговската размена.
Добро утро, подолу петте вести што ги издвоивме за почеток на денот.
Бугарија ќе го даночи транзитот на руски гас, ќе страда ли Македонија?
Ќе се зголеми ли цената на природниот гас во Македонија е прашање кое се наметнува откако Бугарија воведе данок на рускиот природен гас, кој транзитира низ нејзината територија. Со новиот предлог-закон, кој беше објавен во петокот (13 октомври) и кој стапува во сила веднаш, Бугарија воведува наплата од 20 бугарски лева (10,76 американски долари) по мегават час гас од руско потекло. Тоа е околу 20 проценти од цената на европскиот репер гас со кој се тргува во регионалниот центар Амстердам.
Иако Бугарија не увезува гас од Русија за свои потреби, таа е значајна рута за намалениот проток на руски гас што се испраќа во Европа. Македонија целокупното количество природен гас го увезува од Русија, преку гасоводниот систем на Бугарија. „Блумберг Адрија“ веќе пишуваше дека нашата земја е меѓу трите во Европа кои се сто проценти зависни од рускиот гас.
Вреди ли да инвестираме во воени компании: Историјата има приказна
Воениот конфликт меѓу Палестина и Израел веројатно нема да има големо влијание врз вредноста на акциите и референтните индекси на светските берзи, со оглед на тоа што историјата покажува дека пазарите релативно брзо и со лесни чекори ги пребродуваат големите геополитички шокови, како што се војните, терористичките напади и атентатите врз светските лидери.
Всушност, многу поважно за пазарот на капитал е прашањето дали има намалување на економската активност односно рецесија. На тоа уште минатата година укажа Бери Ритхолц, поранешен колумнист во „Блумберг“ и прв човек на „Ритхолц велт менаџмент“ (Ritholtz Wealth Management).
Анкета на Народната банка: Ниска инфлација дури во 2025 година
Економските аналитичари очекуваат поголема инфлација и помал раст на БДП во 2023 година отколку претходно, покажуваат резултатите од новата анкета за инфлациските очекувања и очекувањата за движењето на реалниот БДП што ја спроведе Народната банка во септември. Тие и натаму ги поврзуваат ваквите очекувања пред сѐ со ефектите, времетраењето и со текот на воениот судир во Украина, при што нагласуваат дека сѐ уште постои висок степен на неизвесност околу идните случувања.
Очекувањата на испитаниците упатуваат на просечна стапка на инфлација од 9,5 проценти за 2023 година (9,3 проценти во претходната анкета), 5 проценти за 2024 година (5,1 проценти во претходната анкета) и 3,2 проценти за 2025 година (3,4 проценти во претходната анкета).
За луксузните и за многу старите возила ќе се плаќа поголем данок
Владата на седница вчера усвои измени на Уредбата за начинот на пресметка на данокот на моторни возила и на износите потребни за пресметка на данокот на моторни возила. Измените се носат поради потребата од примена на нова методологија за пресметување на износот на издувните гасови од моторните возила, што е во насока на заштита на животната средина, исполнување на обврските од потпишаниот Климатски договор од Париз за намалување на нето-емисијата на стакленички гасови, како и усогласување со најновите ЕУ стандарди.
Со примена на пропишаните коефициенти за пресметка на специфичната компонента за CO2 на данокот на моторни возила се овозможува зајакнато оданочување со данокот на моторни возила на најголемите загадувачи, а кои спаѓаат во категоријата на луксузни патнички возила или многу стари возила
Лагард: ЕЦБ ја следи цената на нафтата поради ризик од скок на инфлацијата
Европската централна банка (ЕЦБ) ја следи цената на нафтата за какво било инфлаторно влијание од конфликтот меѓу Израел и Хамас, изјавила претседателката Кристин Лагард пред министрите за финансии на еврозоната, според извори запознаени со ова прашање.
Лагард во понеделникот зборувала на состанокот зад затворени врати со претставници на Унијата во Луксембург, посочија изворите, кои сакаа да останат анонимни. Портпаролот на ЕЦБ одби да коментира. Избувнувањето на конфликтот меѓу Хамас и Израел наиде на мал одговор на пазарите, иако некои аналитичари велат дека ескалацијата може да ја доведе нафтата до 100 долари за барел.
.webp){kind=icon}
