Редакцијата на „Блумберг Адрија“ состави листа на Топ 50 луѓе од регионот кои ја одбележаа 2023 година и кои ќе влијаат на 2024 година, а 10 имиња на листата беа од Македонија.
Меѓу нив се најдоа познати бизнисмени и програмери, двајца спортисти, еден политички функционер, како и банкарскиот сектор во целина.
Секоја регионална редакција – македонската, српската, хрватската, словенечката и босанската - номинираше свои кандидати во пет категории - бизнис, финансии, технологија и наука, спорт, забава. Оваа година додадовме нова категорија, посебни достигнувања. Вкупно беа номинирани повеќе од 140 кандидати. На листата ТОП 50 се најдоа номинираните со најмногу гласови од сите редакции.
Целата регионална листа можете да ја видите ОВДЕ.
Од Македонија ги избравме:
БИЗНИС
1.Веле Самак, директор за приходи во „Микросам“
Тој е менаџер од втората генерација, а со својата работа како еден од ретките во земјата докажа дека младите знаат подобро од нивните постари. Во македонската компанија со седиште во Прилеп, „Микросам“, тој е главен директор за приходи, но е еден од клучните кога станува збор за достигнувањата на оваа компанија. „Микросам“ заедно со гигантот во авионската индустрија „ГКН Фокер“ од Холандија, успеа да направи посебна машина и да развие дел што ќе биде составен дел на идната генерација патнички авиони.
2. Сатја Грабулоски, дизајнер
Сатја Грабулоски дизајнира патики за големите светски ѕвезди како Леброн Џејмс, Кристијано Роналдо, Серхио Рамос, Мајли Сајрус, Дуа Липа, диџејот Стив Аоки… Глобално медиумско внимание доби кога патики во негова изработка, со ликовите на четворица познати водители на спортско шоу за НБА, се појавија во самата емисија на ТНТ. Поранешните американски кошаркари Шекил О’Нил, Чарлс Баркли и Кени Смит и коментаторот Ерни Џонсон му посветија четириминутен прилог во кој ја пофалија неговата работа.
Сатја Грабулоски, лична архива
ФИНАНСИИ
3.Живко Мукаетов, генерален директор на „Алкалоид“
Тој е еден од тројцата најбогати Македонци. Компанијата со која управува веќе над две децении навистина е една од најуспешните во овој регион. Живко Мукаетов е на чело на „Алкалоид“ од 1999 година, а во 2023 година токму оваа компанија беше избрана како најдобар инвеститор во регионот од страна на Коморскиот инвестициски форум (стопански комори од шесте земји од Западен Балкан).
Живко Мукаетов/Bloomberg Businessweek Adria
4. Банките - рекордна заработка
Како последица на строгата монетарна политика на централните банки и високите каматни стапки, заработката на комерцијалните банки, како во регионот, така и во светот, порасна високо во 2023 година. Банките во Македонија не отстапија од ова правило, бидејќи, како и банките во остатокот од регионот Адрија, минатата година задоволно ги триеја рацете, зголемувајќи ја добивката за 50 проценти. Во првите три квартали од 2023 година, добивката на банкарскиот сектор се зголеми за речиси 200 милиони евра (197 милиони евра). Така, 13 банки во Македонија профитираа 66 милиони евра повеќе во однос на истиот период од претходната година, од кои само две имаа негативен резултат во првите девет месеци.
5.Фатмир Бесими, министер за финансии
Тој е долгогодишен политичар, но во 2023 година стана првиот македонски министер за финансии што овозможи на македонскиот пазар да стигнат и граѓанските обврзници.Така, додека Фатмир Бесими е на чело на Министерството за финансии, во два наврата оваа институција организираше аукции на двегодишни граѓански обврзници, на кои беа запишани над 40 милиони евра.
НАУКА И ТЕХНОЛОГИЈА
6. Горјан Јовановски, креатор на најголемата платформа за климатски податоци во светот, EarthCare.ai
Во 2023 година Горјан Јовановски и неговиот партнер Драган Гелевски ја промовираа најголемата платформа за климатски податоци во светот EarthCare.ai. Станува збор за платформа што овозможува подостапен, централизиран пристап до климатските податоци и неопходните информации за животната средина на светско ниво.
Горјан Јовановски/Bloomberg Businessweek Adria
7. Нино Карас, соосновач на „Кодвел“
Во 12-та година откако ја основа „Кодвел“ (CodeWell) и по стотина продукти во полето на конверзациската вештачка интелегенција, а секој поиновативен од другиот, Нино Карас во 2023 година ѝ ја предаде на Владата на Македонија, Ада, дигитална асистентка што има натпросечно знаење и во државната администрација ќе работи 24/7. Ада стана најдобриот вработен, со меморија што ја нема ниту еден државен службеник, а таа може и да се клонира за да услужи неограничен број корисници истовремено.
СПОРТ
8. Игор Стефановски-Иџе, европски шампион на ридски патеки
Македонскиот автомобилист Игор Стефановски-Иџе во 2023 година ја освои третата европска титула во својата кариера, а прва по осум години пауза. На последните две трки од сезоната во Европското првенство на ридски патеки [FIA European Hill Climb Championship (FIA EHC)], кои се возеа во хрватскиот град Бузет, Иџе само ја потврди титулата откако и претходно имаше солидна предност во однос на најблискиот конкурент. Возејќи автомобил на „Хјундаи“, Стефановски победи на седум од десетте трки. Тој беше европски првак во оваа конкуренција и во 2014 и 2015 година.
9. Горјан Славески, светски шампион во БКФЦ
Македонскиот борец Горјан Славески во август годинава стана светски шампион во велтер категорија (до 75 килограми) во шампионатот за борби без ракавици БКФЦ (Bare Knuckle Fighting Championship - BKFC), која веројатно е една од најсуровите боречки вештини. Во главната борба во турнирот во Мајами шампионскиот појас го освои со едногласна одлука на судиите откако очигледно доби три од петте рунди со ривалот Џејк Линдзи.
ПОСЕБНИ ДОСТИГНУВАЊА
10. Марија Јосифовска Спасовска - глас против врсничкото насилство
Поттикна лавина акции во целото македонско општество, а кампањата, која во земјата се организира под водство на нафтената компанија „Макпетрол“ и директорката за човечки ресурси Марија Јосифовска Спасовска, како ниедна досега ги мобилизира институциите - молкот да стане гласен збор кога е во прашање врсничкото насилство. Станува збор за кампањата „Крени глас против врсничкото насилство“, која произлезе со цел да поттикне промени во начинот на кој се сфаќа врсничкото насилство, но и кои чекори треба да се преземат за таквото однесување да биде препознаено и спречено.
Bloomberg Businessweek
.webp){kind=icon}
