.webp){kind=icon}
По завчерашните напади на Иран врз Израел, Министерството за надворешни работи формира кризен штаб чија примарна задача е да организира извлекување на македонските државјани од Израел и од Блискиот Исток доколку за тоа има потреба. Покрај амбасадата во Тел Авив на граѓаните на располагање им стојат и амбасадите во Каиро, Абу Даби и Катар.
Добро утро, подолу петте вести што ги издвоивме за почеток на денот.
Нафтата поскапува, нафтените резерви се полупразни
Колкави се шансите цената на нафтата да стигне до 100 долари за барел до крајот на летото? Доколку до септември црното злато стигне да се продава по цена изразена со три цифри, тоа ќе биде прв случај по две години. Нафтата од типот брент во средата на берзите затвори со цена од 91 долар за барел. До почетокот на викендот, цената не падна под 90 долари. Од почетокот на годината цената порасна за 18 отсто. Сегашните цени се на петмесечен максимум.
Цената расте поради слабата понуда, која е резултат на одлуката на ОПЕК да го намали производството на нафта. Неодамна Мексико го намали извозот на сурова нафта, со што го влоши глобалниот притисок, што пак ги натера рафинериите во САД, најголемиот светски производител на нафта, да трошат повеќе домашни барели.
Разгорувањето на Блискиот Исток може да донесе раст на цената на нафтата
Трговците може да очекуваат скок на цената на нафтата на почетокот на тргувањето во понеделник пред да се стаблизираат цените. Се очекува растот на цената на нафтата да биде пригушен по коментарот на Иран дека одмаздата за нападот на амбасадата во Сирија е успешна и дека нема намера за нови операции.
Сепак, многу работи ќе зависат од реакцијата на Израел којшто може да одговори на иранскиот напад и покрај тоа што САД, неофицијално, не поддржуваат понатамошна ескалација. Ризикот од директен ирански напад врз Израел веќе беше барем делумно проценет, при што нафтата од типот „брент“ поскапе за 3,5 проценти надминувајќи 90 долари за барел за прв пат од октомври.
ББА-анализа: Долг и скап пат до нулта емисии на штетни гасови
Во огромниот спектар на инструменти на пазарот на капитал, денес свое место наоѓаат и оние што се директно поврзани со процесот на декарбонизација. Особено инвеститорите можат да инвестираат во ЕТФ-ови чии средства се претежно составени од компании што амбициозно се вклучени во зелената агенда.
Декарбонизацијата е делче од таа приказна, и тоа во инвестициските инструменти што компаниите треба да ги вметнат во своите биланси како дел од процесот на намалување на емисијата на штетни гасови. Европските креатори на зелената агенда, како дел од процесот на декарбонизација, го дизајнираа најголемиот систем за тргување со дозволи за емисии ЕУ ЕТС (EU ETS), кој моментално ја покрива фазата 4 на декарбонизација во периодот од 2021 до 2030 година.
Иран го нападна Израел со над 300 проектили и беспилотни летала
Израелската војска соопшти дека Иран завчера лансирал околу 170 дронови, 30 крстаречки ракети и 120 балистички ракети кон израелската територија. Портпаролот на израелската војска Даниел Хагари рече дека биле пресретнати над 200 проектили и беспилотни летала односно дека повеќето од нив воопшто не стигнале до Израел.
Тој додаде дека нападот предизвикал мала штета во една од израелските воени бази. Засега нема информации за човечки жртви, а Израел веќе ги отвори цивилните аеродроми кои продолжуваат со работа. „Подготвени сме за секоја закана што ќе дојде до Израел“, изјави Хагари. Израел побара итен состанок на Советот за безбедност на Обединетите нации за да се осуди, како што ја нарече неговиот амбасадор во ОН „тешката и опасната ескалација“ од страна на Иран.
Техеран го прогласи нападот врз Израел за успешен, нема намера за нови операции
Техеран го прогласи нападот врз Израел за успешен и покрај тоа што повеќето од 300. лансирани проектили беа соборени од израелските одбранбени сили и од американската војска пред да пристигнат на израелска територија.„Сметаме дека со оваа операција е постигнат целосен резултат и немаме намера да продолжи операцијата“, изјави вчера началникот на Генералштабот на иранските вооружените сили Мохамад Багери за државната телевизија.
Тој додаде дека Иран ја нападнал воздухопловната база од која полетале израелските авиони за да ја нападнат иранската амбасада во Сирија. „Ако Израел одговори, нашата следна операција ќе биде многу поголема“. Инаку, „Аксиос“ цитирајќи висок функционер во Белата куќа објави дека американскиот претседател Џо Бајден во телефонскиот разговор со израелскиот премиер Бенјамин Нетанјаху му рекол дека САД нема да поддржат израелски контранапад против Иран.
