.webp){kind=icon}
Како единствена редакција во Македонија што има можност да го користи терминалот на „Блумберг“, оваа недела ексклузивно донесовме информација за последното задолжување на земјава на странскиот пазар преку издавање четиригодишна еврообврзница „тешка“ 600 милиони евра со камата од 6,5 отсто (купонска камата од 6,25 отсто).
Издавањето на еврообврзницата го следевме ексклузивно цела седмица, од објавувањето на инвеститорскиот повик за издавањето на новата еврообврзница на земјава во понеделникот. Потоа, со колегите од „Блумберг“ донесовме информација за можниот интерес за оваа обврзница од страна на инвеститорите.
„Секогаш има побарувачка за обврзници од оваа земја, бидејќи ретко позајмува и конзервативно е управувана“, рече за „Блумберг“ Ричард Сегал, аналитичар за фиксен приход во „Амброзија капитал“ (Ambrosia Capital Ltd.) „Побарувачката треба да биде силна, бидејќи можностите за купување приказни поврзани со пристапување во ЕУ се мали и стануваат сè поретки“.
Пристапот до терминалот на „Блумберг“ ни овозможи да објавиме дека инвеститорите понудиле 1,5 милијарда евра за македонската обврзница, а земјава побарала 800 милиони.
По издавањето на обврзницата, нашиот главен аналитичар Андреј Кнез ги коментираше околностите за задолжувањето.
„Каматата е очекувана, но краткиот рок на достасување на новата еврообврзница значи дека инвеститорите не се подготвени да ѝ позајмуваат пари на Македонија по вакви камати“, изјави Кнез. Тој укажува дека Македонија привлече понуди од инвеститори од 1,6 милијарда евра, односно дека емисијата беше со интерес за 2,7 пати поголем.
„Ова е умерен резултат и можеби треба да се сфати и како слаб исход, особено кога ќе се спореди со Словенија, која привлече понуди на инвеститорите осум пати повеќе од финалната емисија на обврзници од 1,25 милијарда евра при продажбата во почетокот на 2023 година“, посочува Кнез.
Bloomberg Adria
Седмицата ја почнавме со ексклузивни информации за тоа колку сме потрошиле во малопродажбата во периодот пред новогодишните и божиќните празници. Имено, два дена пред Нова година, во супермаркети, продавници за храна и облека, бензински пумпи и секаде каде што има фискален апарат во малопродажбата сме потрошиле рекордни 30 милиони евра.
Со помош на аналитичкиот тим на „Блумберг Адрија“ пишувавме за потенцијалот на земјите од овој регион за ЕСГ. Нашите аналитичари велат дека Словенија и Хрватска како членки на ЕУ имаат поголем потенцијал од другите земји во регионот.
Аналитичарите очекуваат значително подобрување со барањето за известувања што ќе важи за 2024 година (првите извештаи ќе бидат објавени во 2025 година), каде што стандардизираните објави ќе им овозможат на инвеститорите пристап до информациите што им се потребни за да го проценат инвестицискиот ризик.
„Остатокот од регионот Адрија, земјите што не се членки на ЕУ, нема да го доживее истиот регулаторен притисок. Сепак, очекуваме дека известувањето за EСГ постепено ќе се подобрува, а компаниите ќе бидат поттикнати да се приспособат“, се наведува во извештајот.
Анализиравме и зошто овој јануари беше најлош за Македонската берза. Вкупниот промет на Македонската берза во јануари годинава изнесувал 3,1 милиони евра, што е неколкукратно намалување во однос на истиот месец минатата година, кога вкупниот промет на берзата изнесувал 14,6 милиони евра.
Ексклузивно разговаравме и со креаторот на првиот дигитален работник во македонската администрација, Нино Карас, главен извршен директор и коосновач на групацијата „Кодвел“ и „Кодвел АИ“.
„Со помош на технологијата ’Кодвел АИ’ ја креиравме асистентката Ада, која наскоро ќе биде јавно достапна. Станува збор за дигитален асистент преку кој граѓаните и заинтересираните странски инвеститори ќе можат да добијат релевантни информации и да се запознаат со достапните повици поврзани со програмите за државна помош на Владата на Република Северна Македонија. Ада ќе биде достапна 24/7 да помогне и да одговори на сите најчесто поставувани прашања. Ада ќе ви овозможи да завршите работа за неколку минути додека го пиете утринското кафе, наместо да одите и да чекате по институциите трудејќи се да го најдете соодветниот шалтер“, изјави Карас за „Блумберг Адрија“.
Со нашите аналитичари прогнозиравме дека годинава растот на каматите ќе го секне интересот за кредити.
Неделава пишувавме и за брзиот раст на „брзите кредити“. Сумата што граѓаните ја должат кон овие финансиски друштва можеби не е голема, но има тренд на раст, а во трите квартали минатата година издадените кредити кон домаќинствата се зголемиле за 22,3 милиони евра или за над 25 отсто во однос на крајот на 2021 година. Заклучно со третиот квартал лани, домаќинствата им должат на финансиските друштва 109, 5 милиони евра.
Една од темите што ги работевме се однесува на тоа колку чини македонскиот пасош. Македонија е рангирана меѓу десетте држави во светот во кои да се добие државјанство преку инвестиција во земјата е најевтино, со оглед на тоа што нуди можност странци да стекнат таканаречен златен пасош со вложување најмалку 200.000 евра.
Пишувавме и за најскапите возила што се возат по македонските патишта. Oфицијални податоци за тоа колку луксузни возила се возат во земјава нема. Но од познавачите во овој бизнис, „Блумберг Адрија“ собра информации што се однесуваат на последните три-четири години и кои покажуваат дека има Македонци што сакаат да го отворат паричникот за да купат скап автомобил. Во последните неколку години, од почетокот на пандемијата наваму, во земјава како нови се увезени три-четири автомобили „порше“, кои чинат меѓу 240 и 260 илјади евра.
Ја следевме и темата што ја обележи оваа седмица на глобално ниво – разорниот земјотрес во Турција, a ги анализиравме и последиците врз економската размена по оваа катастрофа.
Читајте ексклузивно!
