Американскиот претседател Доналд Трамп се откажа од заканата дека ќе ја уништи иранската енергетска инфраструктура откако сојузниците на САД и земјите од Персискиот Залив го предупредија дека таков напад може да има сериозни последици.
Истовремено рече и дека претставници на Иран се јавиле за да започнат разговори, бидејќи сакале да постигнат договор по неговата закана дека ќе ги нападне енергетските постројки. „Преговараме долго време, а овојпат тие се сериозни, и тоа е само поради одличната работа што ја заврши нашата војска“, изјави Трамп. Сепак, иако најавата на Трамп за разговори со Иран ја смири цената на нафтата и ги подигна берзите, Техеран категорично ги негира контактите, а инвеститорите се сомневаат дека има вистински преговори.
Добро утро, ви пишува Анита С. Буховски од дигиталната редакција на „Блумберг Адрија“. Во продолжение се петте вести што ги издвоиме за почеток на денот.
Цената на бензините останува иста, дизелот поскапува на 95,5 денари за литар
Со одлуката малопродажните цени на бензините еуросупер БС-95 и еуросупер БС-98 не се менуваат. Малопродажната цена на еуродизелот (Д-Е V) се зголемува за 3,50 денари за литар, малопродажната цена на екстра лесното масло за домаќинство на (ЕЛ-1) се зголемува за 2,50 денари за литар, а малопродажната цена на мазутот М-1 НС се зголемува за 0,157 денари за килограм.
Според одлуката, од полноќ максималната малопродажна цена на бензинот еуросупер БС-95 ќе изнесува 86,5 денари/литар, на бензинот еуросупер БС-98 ќе изнесува 88,5 денари/литар, на еуродизелот ќе изнесува 95,5 денари/литар, на екстра лесното масло за горење ќе изнесува 92 денари/литар, а на мазутот М-1 НС ќе биде 47,610 денари/килограм.
Каде да се инвестира во услови на криза предизвикана од нафтениот шок?
Како да се распределат средствата за да се заштити инвестициското портфолио во период на огромна нестабилност на пазарите предизвикана од војната во Иран и драстичниот раст на цената на нафтата што следуваше поради прекинот на транспортот низ Ормускиот Теснец е прашање кое ги мачи и малите и големите инвеститори насекаде во светот.
Прашањето дополнително добива на тежина ако се земе предвид дека понатамошното пролонгирање на воените дејствија на Блискиот Исток речиси сигурно ќе донесе раст на инфлацијата, затегнување на монетарните политки и можна рецесија. Во време кога има предуслови за ваква повеќеслојна криза, повеќето аналитичари препорачуваат да не се бркаат лесни добивки на пазарите на капитал туку инвестициското портфолио да се гради на долг рок врз основ на продлабочени анализи за работењето на компаниите.
Од што ќе зависи движењето на МБИ10 во 2026 година?
Индексот МБИ10 беше меѓу најуспешните регионални берзански индекси во 2024 година. Сепак, во текот на 2025 година, динамиката на раст донекаде се забави, а слична шема продолжи и на почетокот на 2026 година. Првите месеци беа обележани со изразена волатилност, делумно поттикната од геополитиката и поширокото пазарно расположение кое моментално доминира на глобалните и регионалните финансиски пазари.
Во 2026 година, индексот МБИ10 беше обележан со волатилни движења. Причината за ова е специфичниот состав на индексот и високата концентрација на одредени сектори.Иако повеќето од компонентите на индексот моментално бележат пад на цените на акциите, банкарскиот сектор е особено под притисок.
Техничка анализа: Како да читате графикони, да препознавате трендови и да управувате со ризикот на финансиските пазари како професионалец
На пазарите преплавени со информации, брзо движечки вести и ненадејни движења на цените, инвеститорите постојано се обидуваат да најдат начин да извлечат структура од бучавата. Додека фундаменталната анализа се обидува да објасни зошто една компанија вреди одредена цена, техничката анализа започнува од сосема друго прашање - што самото движење на цените кажува за однесувањето на пазарот.
За разлика од фундаменталниот пристап, кој анализира биланси на состојба, приходи, маржи на профит и долгорочна стратегија на компанијата, техничката анализа се фокусира речиси исклучиво на движењата на цените и обемот на тргување.
Војна за Куба - Дали Трамп ги турка САД и Кина во директен конфликт?
Во последните денови, на пазарот сè почесто се провлекува едно прашање кое на прв поглед изгледа како периферен геополитички ризик, но всушност отвора многу подлабока анализа - што навистина би се случило доколку дојде до ескалација меѓу Соединетите Американски Држави (САД) и Куба.
За разлика од конфликтите на Блискиот Исток или во Источна Европа, каде што импликациите за енергијата и глобалните синџири на снабдување се веднаш очигледни, Куба претставува различен вид ризик. Затоа пазарот засега не реагира панично, и покрај сè погласните шпекулации дека Доналд Трамп се упатува кон овој регион. Сепак, ова не значи дека ризикот не постои, туку дека неговата природа е потешко да се квантифицира. Клучното прашање е - ако има глобален економски шок, каде всушност ќе се прелее тој шок.
.webp){kind=icon}
