Голем интерес за преземање на македонски банки - пет вести на денот

Bo тек се регистрациите за нашата конференција - Consumer Trends. Настанот ќе се одржи на 4. јуни во хотелот „Мериот“ во Скопје со почеток од 10 часот, а на овој линк можете да ја погледнете целата агенда. 

Пријавувањето е бесплатно, но поради ограничениот број на места би ве замолиле да ги извршите регистрациите што е можно поскоро, бидејќи пристапот за секој учесник е регулиран со QR код кој е потребен за влез на конференцијата.

Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.

Ќе има ли нов играч во банкарскиот сектор?

Ќе успее ли српската „Алта Груп“ да ја преземе „Стопанска банка Битола“ е прашање кое заслужува внимание откако минатата недела беше обелоденето дека српската групација сака да преземе 100 проценти од обичните акции со право на глас издадени од македонската банка по цена од 3.777 денари по акција. 

Посебно е интересно што понудата за преземање, која би требало да се официјализира откако ќе бидат реализирани сите потребни регулаторни барања, доаѓа неполна година откако не успеа обидот на „Комерцијална банка“ да ја преземе „Стопанска банка Битола“.

„Блумберг Адрија“ неодамна го праша Мирослав Марчев, управен партнер во ПвЦ (PwC) за Македонија во кој дел од финансискиот сектор во нашата земја постои интерес за стекнување или основање нови бизниси. Тој одговори дека тоа е дефинитивно банкарскиот сектор.

Парадоксите на издаваштвото во Македонија

Издавачките куќи во земјава се соочуваат со многу предизвици. Од една страна понудата на книги расте, што би требало да е добар знак за читателите, но од друга страна куповната моќ се намалува.

„Генерално, издаваштвото кај нас бележи напредок во изминатите години и денес е многу порегулирано и поконсолидирано – како правно така и фактички. Постојат високо ниво на соработка меѓу издавачите и значително намалување на нелојалната конкуренција“, вели Бојан Саздов од „Три“. Според него, освен што обемот на објавени изданија е зголемен, се нуди и подобар квалитет на пазарот, а пораснал и бројот на културни настани, книжарници, па дури и автори што стекнуваат регионална и европска слава.

Сепак, условите на пазарот остануваат комплексни. „Ниската куповна моќ, ниските цени на книгите, достапноста на евтини странски изданија и општата апатија во општеството негативно влијаат врз бројот на книги, книжарници и читатели. Тоа не е добро ниту за нас како сектор ниту за општеството во целина“, вели Саздов. 

Биткоинот ја поткопува доминацијата на доларот

Во својата нова книга „Нашиот долар, ваш проблем“ (Our Dollar, Your Problem), економистот од „Харвард“, Кенет Рогоф, тврди дека подемот на Кина, геополитичките тензии и растечкото влијание на криптовалутите го поткопуваат глобалниот статус на доларот.

Во интервју за „Блумберг њуз“, Рогоф зборува за тоа зошто дигиталните валути - некогаш отфрлани како помодарство - се тука за да останат.

„Доларот не само што стана прва туку стана подоминантна од која било друга валута во историјата. И сега гледам дека е во пад - се распарува по рабовите, додека јуанот почнува да се ослободува од доларот, еврото добива сѐ поголема тежина - тоа трае веќе една деценија.

Првото прашање што многумина го поставуваат е дали може криптовалутите да го заменат доларот. Не може - барем не во легалната економија, каде што владите имаат голема моќ. Но во подземната економија, по дефиниција, има многу помала контрола“, посочува економистот.

Падот на американските обврзници ја загрозува стратегијата 60/40

Падот на долгорочните американски обврзници го засенува враќањето на класичната инвестициска стратегија.

Познатото портфолио 60/40 – долго време препорачувано за инвеститорите што сакаат да балансираат помеѓу ризик и стабилен приход – подразбира распределба од 60 отсто во акции и 40 отсто во обврзници. Иако оваа стратегија со децении беше основа за пензиските штедачи, нејзината привлечност ослабе во последниве години, бидејќи акциите и обврзниците во САД почнаа да се движат во иста насока наместо да се компензираат меѓусебно.

Како да излезете од американскиот пазар?

Терминална луцидност. Тоа е изразот што се користи за да се опише краток период непосредно пред смртта кога терминално болните изгледаат како да закрепнуваат. Пречесто тоа буди надеж — ирационална надеж — кај оние што наскоро ќе изгубат сакан.

Стратегот Бил Блејн смета дека токму тоа се случи со американскиот берзански пазар оваа недела. По неколку ужасни месеци, индексот S&P 500 е речиси на нула за годината, и тоа натера многу инвеститори да помислат дека можеби сè ќе биде во ред.

Но пресметката доаѓа. А вистината е дека трговскиот хаос поради царините, постојаниот стрес на пазарот на обврзници, ризиците од стагфлација и сè уште екстремно високите вреднувања значат дека, ако сè уште не сте се диверзифицирале надвор од американските пазари, навистина треба да почнете со тоа.