Европејците во очај се враќаат кон огревното дрво

Недалеку од аеродромот од нацистичката ера „Темпелхоф“ во Берлин Петер Енгелке поставува нова безбедносна порта во својот магацин поради загриженоста за очајните луѓе кои му го крадат залихите. Скапоценото средство е огревно дрво.

Дејствијата на Енгелке ја одразуваат растечката вознемиреност низ Европа, бидејќи континентот се подготвува за енергетски недостиг, а можеби и замрачување оваа зима. Очигледната саботажа на гасоводот „Северен тек“ е последниот знак за критичната позиција на регионот додека Русија го намалува снабдувањето поради војната во Украина.

На самитот во Прага во петокот, лидерите на Европската унија не успеаја да се договорат за ограничување на цената на гасот поради загриженоста дека секој таков потег може да го загрози снабдувањето на регионот. Дури 70 проценти од европското греење доаѓа од природен гас и електрична енергија, а со драстично намалените испораки од Русија, дрвото - што веќе го користат околу 40 милиони луѓе за греење - стана барана стока.

Цените на дрвените пелети се речиси двојно зголемени на 600 евра за тон во Франција, а има знаци на панично купување на најосновното гориво во светот. Унгарија отиде дотаму што го забрани извозот на пелети, а Романија ги ограничи цените на огревното дрво за шест месеци. Во меѓувреме, испораката на печките на дрва сега може да трае со месеци.

Освен загриженоста за недостигот, енергетската криза го интензивира порастот на трошоците за живот, при што инфлацијата во еврозоната достигна двоцифрена вредност за прв пат во септември. Домаќинствата во регионот се повеќе се соочуваат со избор помеѓу греење и други основни работи. 

„Се враќаме кон старите времиња кога луѓето не ја загреваа целата куќа“, рече Ник Снел, управен директор на британската компанија за трговија на големо со огревно дрво „Серсирлин Вуд“.

Тој додава дека луѓето порано седеле околу огнот и ја користеле топлината од шпоретот.

„Ќе има многу повеќе од тоа оваа зима“, вели Снел.

Новиот тренд донесе бум во побарувачката кај Gabriel Kakelugnar AB, производител на врвни печки со плочки кои чинат во просек по 86.000 шведски круни (7.700 долари). Шпоретите можат да ја чуваат просторијата топла 24 часа поради нивната сложена конструкција користејќи различни канали кои ја задржуваат и дистрибуираат топлината.

„За време на пандемијата, луѓето почнаа да инвестираат повеќе во своите домови. Тоа сега се разбира ескалира“, рече Јеспер Свенсон, сопственик и управен директор на компанијата што се наоѓа на помалку од еден час возење од најголемиот шведски нуклеарен реактор.

Нарачките се зголемени повеќе од четири пати, а клиентите сега треба да чекаат до март за испорака. Пред една година за достава се чекало само четири недели.

За многу Европејци, клучната грижа е да направат се што е потребно за да останат топли во наредните месеци. Грижата станува сè поголема како што се приближува зимскиот студ, а очајот за топлина може да создаде здравствени и еколошки проблеми.

„Загрижени сме дека луѓето ќе го запалат она што ќе им дојде до рака“, рече Роџер Седин, раководител на единицата за квалитет на воздухот во Шведската агенција за заштита на животната средина, предупредувајќи на лоша вентилација и обиди да согорат влажни огревни дрва.

„Можеме да видиме многу високи нивоа на загадување кога имате луѓе кои палат дрва кои не знаат како да го прават тоа правилно“, вели тој.

Честичките можат да завршат длабоко во белите дробови и да предизвикаат срцев удар, мозочен удар и астма, рече тој, додавајќи дека ризикот е особено акутен во урбаните средини.

„Треба да размислите за вашите соседи“, рече Седин.

Неискуство очигледно има и во Германија, каде што здружението на оџачари во земјата се справува со поплава од барања за поврзување на нови и стари печки, а клиентите се распрашуваат за согорување на коњски измет и други нејасни горива.

Има и знаци на трупање. Во Франција, Фредерик Коирие, главен извршен директор на Poujoulat SA, која произведува канали за оџаци и произведува горива од дрво, рече дека некои клиенти купиле два тони дрвени пелети иако помалку од еден тон вообичаено е доволно за една година.

„Луѓето се очајни по дрво и купуваат повеќе од вообичаено“, рече Тронд Фјортофт, основач и извршен директор на норвешкиот продавач на дрво Кортреист Вед.

Тој додава дека тоа обично се случувало кога ќе почне да заладува, но оваа година набавките започнале во јуни - кога Русија ги намали испораките на гас.

Во Берлин, кризата создава вознемирувачки ехо на пустошот по Втората светска војна, кога поради недостиг на гориво, жителите ги исекоа речиси сите дрвја во централниот парк Тиергартен за греење.

Иако берлинчани сега не одат во такви крајности, загриженоста за затоплувањето е широко распространета. Енгелке не само што постави дополнителна безбедносна порта за да ги заштити трупците, брикетите од јаглен и маслото за греење, туку и мораше да престане да прима нови клиенти.

„Ја очекуваме зимата со голема загриженост“, рече тој.

 Со помош на Беноа Бертелот, Кари Лундгрен и Вил Матис

 

 

Во моментов нема коментари за веста. Биди прв да коментира...

Остави коментар