Британската премиерка, Лиз Трас, планира да смени делови од нејзината економска стратегија, вели анонимен извор, добар познавач на состојбата. Промената е планирана по неколкунеделниот притисок кој пазарот во врши врз Трас за да објасни како ќе плати за најавените даночни намалувања.
Изворот не открива какви мерки ќе преземе Трас. Канцеларијата на премиерката подоцна соопшти дека таа денеска ќе одржи прес-конференција, но не даде дополнителни детали.
Вниманието во последните денови беше насочено кон тоа дали таа ќе ги откаже плановите за замрзнување на корпоративните даноци следната година, наместо да ги зголеми како што претходно беше планирано.
Од 23 септември, кога државниот канцелар Кваси Квартенг го објави најголемото даночно намалување во Обединетото Кралство во последниот половина век, се зголемија барањата премиерката да го смени курсот.
Најавата ги исплаши пазарите, фунтата се спушти на рекордно ниско ниво во однос на доларот што ја принуди Банката на Англија итно да интервенира за поддршка на пазарот на обврзници.
Веста за претстојниот пресврт дојде токму кога Квартенг слета на лондонскиот аеродром Хитроу, прекинувајќи го патувањето во Вашингтон на состаноците на Меѓународниот монетарен фонд. Тајмс објави дека тој ќе биде отпуштен, иако портпаролката на Трас одби да коментира, како што рече, „шпекулации“.
Фунтата ги намали загубите во однос на доларот по извештајот на Блумберг за неизбежен пресврт и дополнително го намали својот пад откако Тајмс објави дека Квартенг ќе биде отпуштен.
Иако деталите за тоа кои делови од планот ќе бидат поништени се нејасни, фактот дека Трас ќе мора да го стори тоа е голем удар за премиерката по нешто повеќе од пет недели од почетокот на мандатот. Таа и Квартенг ја заложија својата репутација за сеопфатен развој, а премиерката се обиде да се прикаже себеси како лидер кој ќе биде решен да ги постигне своите цели.
Но, со оглед на тоа што довербата во Конзервативната партија се намалува во анкетите, а дел од пратениците од ториевците отворено бараат промена на курсот, Трас и Квартенг се доведени во безизлезна положба. Тие можат или да стојат на својот став и да се соочат со можноста за уште поголем пазарен хаос или да ја уништат својата репутација со менување на насоката.
Официјалните лица подготвија опции за Трас за тоа како да го смени курсот и да ја затвори црната дупка од 60 милијарди фунти (68 милијарди долари) што Институтот за фискални студии процени дека ќе се отвори во јавните финансии.
Корпоративниот данок се смета за најверојатна цел за промена на политиката. Администрацијата на Борис Џонсон планираше данокот да го зголеми од 19 отсто на 25 отсто во април. Владата на Трас вети дека тоа нема да се случи. Кога Квартенг ја претстави својата стратегија минатиот месец, Министерството за финансии процени дека тоа ќе чини во просек повеќе од 13 милијарди фунти годишно во текот на пет години.
Другите опции вклучуваат промена на планираното намалување на основната стапка на данок на доход од 20 на 19 отсто; намалување на трошоците и укинувањето на помалите мерки, вклучително и повратот на ДДВ на туристите и планираното намалување на данокот на дивиденда.
.webp){kind=icon}
