Министерот за финансии, Џереми Хант изјави дека Обединетото Кралство се соочува со тешки предизвици во однос на даноците и трошоците, тој ќе се обиде да ги смири финансиските пазари и да направи значителна промена во економската насока по неколкунеделниот хаос предизвикан од негвоиот претходник и премиерка Лиз Трас.
„Потрошувачката нема да порасне толку колку што би сакале луѓето и ќе мора да најдеме како да штедиме “, рече Хант во интервју за Sky News.
„Нема да ги намалуваме даноците со темпото на кое се надевавме и дел од даноците ќе мора да се зголемат - тоа е реалноста во оваа многу предизвикувачка ситуација пред нас“.
Хант го замени Кваси Квартенг на челната позиција во Министерството за финансии на Обединетото Кралство откако Трас вчера го отпушти својот долгогодишен сојузник и направи пресврт на нејзината економска стратегија во очајнички обид да ја задржи сопствената позиција.
Новиот министер за финансии појасни дека колку што се согласува со аргументите на премиерката Трас за потребата од раст, исто толку тој не се согласува со начинот на кој таа и Квартенг сакале да го постигнат. Користењето на задолжувањето за да се надомести недостигот во приходите поради даночните намалувања „не функционира“, изјави тој за радио Би-Би-Си.
Другите „грешки“ вклучуваат обид да се намалат даноците за најбогатите во Британија, изјави тој за Скај њуз, планот што беше напуштен по острата политичка реакција.
Смирување на пазарот
Новиот министер има огромна задача да го смири пазарот. Додека Трас тврди дека укинувањето на планот за замрзнување на корпоративниот данок ќе донесе дополнителни 18 милијарди фунти (21 милијарди евра) годишно, Bloomberg Economics проценува дека ќе бидат потребни околу 24 милијарди фунти дополнителни заштеди или приходи за да се врати задолжувањето на одржливи нивоа.
„Она што луѓето го сакаат, она што го сакаат пазарите, она што и треба на земјата сега е стабилност“, рече тој. „Ниту еден министер не може да ги контролира пазарите. Но, она што можам да го направам е да покажам дека имаме пари за нашите даноци и планови за трошење“.
Хант рече дека сите нивоа од власта ќе треба да најдат начин да штедат. Тој негираше дека тоа значи враќање на политиките за штедење на нивоата што конзервативната коалиција ги спроведуваше претходно. Неговите коментари значат дека Трас може да се соочи со уште еден срамен пресврт, откако таа се обиде да ги увери пратениците во средата велејќи дека „апсолутно“ нема да има кратење на трошоците. Хант, исто така, не сакаше да се обврзе на ветувањето на Трас дека ќе ги зголеми воените трошоци на три отсто од БДП, иако додаде дека нема да дава никакви ветувања додека не ги види бројките од буџетот.
Драматична промена на ставот
Тоа е драматичен пресврт на ставот што го зазедоа Трас и Квартенг, кои ја заложија својата политичка репутација на планот за раст, објавувајќи го најголемиот пакет даночни олеснувања во последниот половина век.
Поранешниот министер за финансии Риши Сунак, ривалот на Трас за највисокото место во трката за лидерство на Ториевците, ја помина својата кампања повторувајќи предупредувања дека „Трасономикс“ќе направи хаос на пазарите Тоа предвидување се оствари откако Трас и Квартенг не успеаја да ги убедат финансиските пазари дека нивниот план е остварлив.
Нивниот пакет објавен на 23 септември предизвика распродажба што ја турна фунтата на најниско ниво во однос на доларот и ја принуди Банката на Англија да интервенира на пазарот на државни обврзници за да спречи колапс на клучен дел од пензиската индустрија .
Поддршката на ториевците е во опаѓање
„Грешка беше што сакавме да носиме тешки одлуки за даноците и трошоците за намалување на даночната стапка што ја плаќаат најбогатите“, изјави Хант за Скај. „Беше грешка да се оди на слепо и да се прават прогнози без луѓето да имаат шанса да се уверат дека Канцеларијата за буџетска одговорност (ОБР) смета дека тоа е одржливо“.
Но, додека Хант изјави за Би-Би-Си дека верува дека Трас е најдобрата личност да ја води земјата, промената во економската насока веројатно ќе го намали верувањето кај немирните конзервативни пратеници дека таа треба да остане. Поддршката за ториевците паѓа во анкетите откако пазарната несигурност околу јавните финансии на Британија ги зголеми каматните стапки што милиони луѓе ги плаќаат на станбените кредити.
„Мораме да бидеме искрени со луѓето ако сакаме да ги задржиме растот и каматните стапки што е можно пониски, треба да ги убедиме пазарите дека всушност можеме да го финансираме секое пени од нашите планови“, рече Хант.
Исто како Борис Џонсон
Двојниот потег на премиерката Трус во петокот кога таа го отпушти Квартенг и најави дека корпоративниот данок ќе се зголеми од 19 на 25 отсто од следната година, како што претходно планираше нејзиниот претходник Борис Џонсон, не ги смири пазарите, а фунтата и обврзниците продолжија да паѓаат по нејзините изјави.
„Не мислиме дека финансиските грижи ќе исчезнат“, велат економистите на Ситигруп Бенџамин Набаро и Џејми Серл во белешката до клиентите. „Наместо тоа, веруваме дека ни претстои натамошна нестабилност на пазарот. Обединетото Кралство сега се соочува со период на зголемена пазарна несигурност во отсуство на јасна стратегија за политиката“.
Тоа значи дека Хант има важна работа - особено откако централната банка ја изврши својата интервенција во петокот.
Новиот министер сега има рок од нешто повеќе од две недели да излезе со пакет мерки за да го убеди пазарот дека го контролира буџетот. На крајот на октомври, тој мора да претстави среднорочна фискална стратегија во која ќе треба да објасни како владата планира да започне со намалување на учеството на националниот долг во економското производство, а во исто време и ОБР, независниот фискален чувар, ќе објави нови економски прогнози.
„Ќе биде тешко“, изјави Хант за Би-Би-Си.
.webp){kind=icon}
