Растот на руското воено производство помага да се одржи силата на индустријата во земјата и да се надомести голем дел од штетата предизвикана од меѓународните санкции по инвазијата врз Украина.
Според прогнозите на „Блумберг“ објавени пред официјалните податоци, индустриското производство во Русија ја заврши 2022 година со пад од само 0,7 отсто. „Блумберг економикс“ соопшти дека практично немало пад на индустриското производство бидејќи зајакнатото воено производство помогнало да се компензира падот во другите сектори.
„Индустриското производство во 2022 година се покажа подобро од очекуваното во првата половина од годината и посилно отколку во минатите кризи“, рече Софија Донец, економист во Renaissance Capital, која додаде: „Владините трошоци придонесоа многу, и во тешката и во лесната индустрија“.
Bloomberg Mercury
Индустријата е еден од најотпорните делови на економијата од почетокот на војната, во услови на пад на продажбата на мало и товарниот сообраќај и севкупниот пад на економијата за околу два отсто. Рекордните цени за рускиот извоз на енергија, кои не беа погодени од американските и европските санкции до крајот на минатата година, како и големиот скок на владините трошоци помогнаа да се ублажат економската штета.
„Војната во Украина дополнително ќе го зголеми индустриското производство за оваа година, дури два отсто повеќе отколку во 2022 година, но по цена на пад на животниот стандард и стагнирачка потрошувачка“, изјави Александар Исаков од „Блумберг економикс“.
Рускиот претседател Владимир Путин минатиот месец го пофали економскиот придонес на воената индустрија. „Навистина полета минатата година и продолжува да се шири“, рече Путин, додавајќи: „Фабриките работат во повеќе смени, некои практично без престан“. Русија не открива детали за производството поврзано со војната, но некои сегменти од официјалните податоци вклучуваат воени производи и забележаа силни резултати од 24 февруари, кога Путин ја нападна Украина.
Готови метални производи, кои вклучуваат оружје, бомби и муниција, се зголемени за пет проценти за 11 месеци од минатата година. Производството на компјутери, електроника и оптички производи, за кои економистите велат дека најверојатно ќе вклучуваат делови за авиони и ракетни мотори и оптички нишани и други системи, се зголеми за четири отсто. Останатите возила и опрема, кои вклучуваат воени бродови, авиони и возила, меѓу другото, благо паднаа и покрај растот забележан на крајот на годината.
Bloomberg Mercury
„Русија успеа да го одржи индустриското производство со помош на големи попусти наместо со намалување на производството на нафта, со зголемување на производството на одбранбена опрема и со големи инвестиции во домашната мрежа на нафтоводи“, објасни Исаков.
Овие резултати се во остар контраст со забележаниот пад на производството во основните цивилни сектори. Производството на автомобили забележа пад од речиси 50 отсто, додека текстилната и дрвната индустрија паднаа за повеќе од 10, а хемиското производство за четири отсто.
Неколку сектори имаа корист од влијанието на санкциите и другите ограничувања на увозот. Меѓу другото, беа зајакнати локалното фармацевтско производство и печатарските производи.
Економистите од Одделот за истражување на централната банка во вторникот го истакнаа производството како веројатна светла точка во 2023 година, но предупредија дека растечкиот недостиг на работна сила може да започне да ја ограничува веројатноста за раст во втората половина на оваа година. Во извештајот на банката не се споменува војната што доведе до мобилизација на 300 илјади луѓе, додека повеќе од 600 илјади од нив ја напуштија земјата, што предизвика недостиг на работници.
.webp){kind=icon}
