ЕК ќе препорача борбата против инфлацијата да остане приоритет

Земјите од Европската унија треба да се погрижат да нема попуштање во борбата против инфлацијата во време на висока економска несигурност. Во препораките за политиките што денеска треба да им бидат предадени на земјите-членки, а кои ги виде „Блумберг Њуз“ (Bloomberg News), Европската комисија, извршната власт на ЕУ,  им укажува на националните влади дека „ќе биде потребно време за да исчезне притисокот врз цените“, така што „борбата против инфлацијата останува клучен приоритет за политиките во наредниот период“.

Официјалните лица повторуваат дека фискалните мерки преземени за помош на потрошувачите и бизнисите за време на енергетската криза треба постепено да се укинат оваа година и дека тие треба да се вратат на претпазливи политики кај јавните финансии за да обезбедат долгорочна одржливост на долгот.

Годинешните препораки до главните градови низ регионот се разликуваат од минатогодишните со тоа што зголемувањето на инфлацијата е клучен предизвик со кој владите треба да се справат. Турбулентниот геополитички контекст, доаѓањето на нова енергетска криза и имплементацијата на фондот за обновување на ЕУ од 800 милијарди евра се доминантни теми од последниот извештај.

Нацртот вели дека економијата на ЕУ покажала „извонредна отпорност во предизвикувачко опкружување предизвикано од руската неиспровоцирана инвазија на Украина“.

„Се предвидува дека инфлацијата ќе продолжи да се намалува, но притисоците на базичните цени се покажуваат поупорни, што влијае на бизнисите и ја намалува куповната моќ на домаќинствата“, напиша Комисијата. Покрај тоа, „неодамнешните зголемувања на каматните стапки ја зголемија загриженоста за ранливоста во финансискиот сектор, што треба внимателно да се следи“.

Комисијата забележа дека високата инфлација, сега на седум проценти е во позадината на фискалната и макроекономската нерамнотежа што  се развива. Дополнително, „дивергенцијата на инфлацијата меѓу земјите-членки е на историски високи нивоа“, што претставува ризик за еврозоната.

„Диференцијалите на инфлацијата носат засилена загриженост во рамките на монетарната унија и тоа бара посебно внимание“, се вели во нацрт-документот, кој сè уште може да претрпи промени пред да биде усвоен.

Комисијата, исто така, спроведе длабинска проценка на мнозинството национални економии, вклучувајќи ги и најголемите.

Официјалните лица открија дека Германија, Шпанија, Франција и Италија, меѓу другите, не ја почитуваат границата на дефицитот од 3 проценти од бруто домашниот производ. Со оглед на притисоците од војната во Украина и последиците од пандемијата, Комисијата не предлага преземање мерки за овие земји.

Официјалните лица ги повикуваат земјите-членки да продолжат со спроведувањето на реформските и инвестициските планови договорени за отклучување на средствата за обновување, имајќи предвид дека некои земји-членки се соочуваат со тешкотии да се придржуваат до договорениот календар.

Додека имплементацијата на плановите „во голема мера беше на вистинскиот пат до крајот на 2022 година, некои земји-членки се соочуваат со предизвици во администрирањето на средствата, делумно поради ограничениот административен капацитет или инвестициските тесни грла“.

Иако тековната ревизија на плановите може да претставува можност за решавање на некои од прашањата, институцијата исто така предупредува дека процесот ќе има влијание врз распоредот за исплати од фондот за обнова во 2023 година и понатаму.

Во моментов нема коментари за веста. Биди прв да коментира...

Остави коментар