.webp){kind=icon}
Европската Унија (ЕУ) ги минимизира шансите наскоро да се случи договор со Обединетото Кралство (ОК) во врска со правилата на фабриките за автомобили. Неколку функционери на ЕУ, кои се запознаени со разговорите, рекоа дека немало голем напредок и дека немале причина да мислат дека решението за ова прашање е неизбежно.
Британската влада има рок до крајот на годината да договори начин за заобиколување на обврската во нејзината трговија со ЕУ по брегзит, според која се бара 45 проценти од компонентите во електричните автомобили да се набавуваат или во ОК или во ЕУ за производителите да го задржат бесцаринскиот пристап до пазарот на ЕУ.
„Стелантис“ (Stellantis NV), која ја преуредува својата фабрика на пристаништето Елесмер во северна Англија за да произведува електрични комбиња, рече дека не може да ги исполни тие барања, додека јапонската „Нисан“ (Nissan Motor Co) рече дека склопувањето автомобили во Британија може да стане прескапо по започнувањето на новите правила.
Британската секретарка за бизнис и трговија Кеми Баденох претходно оваа недела сугерираше дека решението можеби е на дофат.
„Треба да видиме одговор наскоро“, рече таа во разговор за „Блумберг њуз“ (Bloomberg News) во рамките на Катарскиот економски форум, кој се одржува во Доха.
Официјалните претставници на ЕУ рекоа дека не е јасно што ги поттикнало коментарите на Баденох. Официјален претставник на Обединетото Кралство рече дека двете страни разговараат за ова прашање и се надеваат дека ќе се реши.
„Блумберг“ претходно објави дека Обединетото Кралство лобира во ЕУ да го одложи воведувањето на барањата за локално производство, кое треба да започне како обврска следната година, што подоцна беше потврдено и од британскиот премиер Риши Сунак.
Без договор, производителите на автомобили што работат во Обединетото Кралство ќе се соочат со извозни тарифи од 10 проценти за секое возило што ќе го испорачаат на пазарот на ЕУ.
