Кредитната агенција Мудис (Moody's) се стави во непријатна позиција со тоа што ја смести Италија на работ од тоа да ја прогласи за ѓубре (junk) во својот рејтинг, истакнува еден од водечките поранешни аналитичари за кредитните агенции.
Мориц Крајмер работеше за агенцијата S&P Global Ratings 17 години и беше шеф на одделот за проценка на рејтингот на земјите. Според него, малку е веројатно дека „Мудис“ ќе го намали рејтингот на Италија на неинвестициска оценка.
„Мудис“ најави можна ревизија на рејтингот на Италија за в петок.
„Сликата за Италија не е розова во моментов, но сè уште не е ситуација во која би заклучиле дека тие заслужуваат да се спуштат на неинвестициска оценка. Не верувам дека 'Мудис' ќе го стори тоа бидејќи навистина нема причина“, рече Крајмер, кој сега работи како главен економист во банката ЛББВ (LBBW) во Штутгарт.
Објавата на „Мудис“ би била првото оттчитување на агенцијата откако премиерката Џорџа Мелони ги претстави буџетските планови во септември, најавувајќи полабава фискална политика. Ова предизвика ширење на разликата меѓу приносот на италијанските и германските обврзници на 210 базични поени за првпат од јануари.
Џорџа Мелони
Bloomberg Mercury
И покрај ова, „Фич“ (Fitch) и S&P ја задржаа Италија на повисоко ниво од „Мудис“, кој има негативна перспектива за Италија со најниска инвестициска оценка. Сè под тоа би ја опишало Италија како земја со „значаен кредитен ризик“.
„Не знам како се доведоа во таа ситуација. Си ископаа дупка“, смета Крајмер, чиј став се базира на искуството што го имал по европската должничка криза пред повеќе од една деценија.
„Сите од искуство знаеме дека работите се менуваат ако туркаш некого под нивото на инвестиции. Тоа го видовме со Грција, затоа треба добро да размислите пред да реагирате. Но Грција е една работа, а Италија е сосема поинаква, само ако погледнете колкави се долгот и економијата“, вели Крајмер.
Во споредба со другите две глобални кредитни агенции, „Мудис“ ги држи земјите од Групата седум во највисоко ниво на рејтинг. САД сè уште имаат највисок рејтинг и покрај негативните изгледи, а рејтингот ААА сега е под притисок поради растечкиот буџетски дефицит и политичките поделби.
Крајмер, кој работеше за S&P во 2011 година, кога агенцијата прва го отстрани највисокиот рејтинг од САД, смета дека споредбата со Италија е значајна.
Кредитен рејтинг на Италија
Bloomberg Mercury
„Ставот на 'Мудис' е уште поизненадувачки бидејќи тие беа многу толерантни кон развиените економии, особено ако ги погледнеме САД“, вели тој.
Иако е малку веројатно намалување на рејтингот оваа недела, Крајмер гледа една причина зошто рангирањето на Италија може да има смисла.
„Ако навистина верувате дека Италија е на пат кон неинвестициска оценка, тогаш треба да бидете првиот што ќе направи чекор назад. Проблемите и притисокот започнуваат од следната рејтинг агенција“, објаснува Крајмер.
„Мудис“ ја стави Италија на Баа3 (Baa3) со негативна перспектива во август 2022 година, наведувајќи ги акумулираните ризици. Тие вклучуваат зголемен ризик дека политичкото опкружување ќе го оневозможи спроведувањето на структурните реформи, вклучително и оние кои се дел од планот за закрепнување и отпорност на Италија.
Згора на тоа, постои зголемен ризик дека предизвиците во снабдувањето со енергија ќе ја ослабат економската перспектива, како и ризикот дополнително да ослабне фискалната позиција на Италија поради слабиот раст, повисоките трошоци за задолжување и можеби послабата фискална дисциплина.
Инвеститорите го споделуваат мислењето на Крајмер дека намалувањето оваа недела е малку веројатно. Распонот меѓу италијанските и германските обврзници беше 183 базични поени во вторникот наутро.
Крајмер признава дека Италија не треба да биде самозадоволна и дека Владата предводена од Мелони не треба да го тестира трпението на пазарот.
Притоа, тој го наведува искуството на Велика Британија минатата година за време на премиерката Лиз Трас.
.webp){kind=icon}
