ЕУ постигна договор за намалување на потрошувачката на гас

Земјите од Европската унија постигнаа политички договор да ја намалат употребата на гас за 15 отсто во текот на следната зима, бидејќи изгледите за целосно прекинување на руските испораки стануваат сè поизвесни.

Министрите за енергетика на состанокот во Брисел дадоа зелено светло на предлогот за доброволно намалување на употребата на гас во следните месеци, соопшти чешкото претседателство со ЕУ во објава на „Твитер“. Планот ја прави целта од 15 отстсо задолжителна при вонредна ситуација, како што е сериозно нарушување на протокот од Русија, со одредени исклучоци за особено ранливите нации или оние кои се составен дел на мрежата на блокот како целина.

Унгарија беше единствената земја што гласаше против правилата, твитна луксембуршкиот министер за енергија, Клод Турмес.

„Можеме да бидеме господари на нашата сопствена енергетска безбедност оваа зима“, порача Франс Тимерманс, шеф на ЕУ за климата. „Ќе останеме на курсот додека Украина целосно не се ослободи од руска агресија“, нагласи тој.

Брзото темпо на договорот, откако Европската комисија првпат ја предложи регулативата минатата недела, го одразува наглото влошување на протокот на гас од Русија. Снабдувањето преку клучниот гасовод „Северен тек 1“ ќе се намали на околу 20 отсто од капацитетот од среда, при што „Гаспром“ соопшти дека уште една турбина треба да оди на одржување и дека ќе биде надвор од употреба.

Тоа ги прави уште поневеројатни шансите земјите од ЕУ да ја достигнат целта за полнење на 80 отсто од капацитетите за складирање на гас. По договорот, правилата треба да влезат во легислативта на ЕУ во текот на следните денови.

„Новите правила се чекор без преседан во европската солидарност“, рече Свен Гиголд, заменик германски министер за економија. „Земјите членки кои не увезуваат никаков руски гас покажуваат поддршка и се обврзаа да ја намалат потрошувачката. Ова никогаш порано не се случило“, подвлече тој.

Во пресрет на состанокот, голем број земји, вклучувајќи ги Италија, Унгарија, Полска, Португалија и Шпанија, изразија загриженост во врска со целите за намалување, наведувајќи ги веќе постигнатите намалувања на побарувачката, недостатокот на приклучоци за гас со други земји и фактот дека одлуките за енергијата обично се национална надлежност.

Чешка, која претседава со ЕУ, во последните денови предложи голем број промени на предлогот на Комисијата од минатата недела, во обид да ги донесе нациите до согласност.

Во моментов нема коментари за веста. Биди прв да коментира...

Остави коментар