Норвешка може да го ограничи извозот, нов струен удар за Европа

Норвешка се подготвува да го ограничи извозот на електрична енергија, што е ран тест за прекуграничната солидарност на Европа оваа зима додека се продлабочува енергетската криза.

Полнењето на резервоарите ќе има приоритет пред производството на енергија кога нивото на реките ќе падне под сезонските просеци, рече во понеделникот министерот за енергетика Терје Асланд.

Земјата е еден од водечките европски извозници на електрична енергија и испраќа околу една петтина од своето производство на своите соседи, но ниското ниво на вода во јужна Норвешка ја принуди Владата да дејствува сега за да го спречи домашниот недостиг оваа зима.

„Ова во пракса ќе вклучи контролни механизми кои ја ограничуваат можноста за извоз во случај на ниско ниво резервоарите“, рече министерот во текстот на брифингот за лидерите на парламентарните партии.

Министерството оваа недела ќе работи на поставување на рамката за да може механизмот да се постави што е можно побрзо.

Како што се влошува енергетската криза во Европа, секое ограничување ќе биде уште еден удар за нациите на континентот кои се потпираат на евтината норвешка хидроенергија за да имаат осветлување. Велика Британија е меѓу нациите кои најмногу зависат од норвешкиот извоз и какви било ограничувања би ги зголемиле веќе покачените цени и може да ја принудат National Grid Plc да ја искористи својата стратешка резерва за производство на јаглен, се вели во белешката на Aurora Energy Research.

Асланд и премиерот Јонас Гар Сторе се состанаа со парламентарните водачи во понеделникот наутро за да ги информираат за ситуацијата на пазарот на електрична енергија и парламентот може да биде повикан назад од летниот распуст за да го реши проблемот.

Норвешка не е членка на Европската унија, но е дел од единствениот европски енергетски пазар. Според правилата, на земјите не им е дозволено да го ограничат протокот кон соседите на подолги периоди. Кратењата би биле дозволени само доколку се прогласи вонредна ситуација. И лоби групата за националните комунални претпријатија рече дека сите потенцијални ограничувања на норвешкиот извоз на електрична енергија треба да ги следат правилата на пазарот на електрична енергија на ЕУ.

„Ако има нешто што не ни треба во тешко време, тоа е да се поткопа соработката и предвидливоста на трговијата и протокот на електрична енергија од која зависи европската енергетска транзиција, или посветеноста на Норвешка на таа соработка и правилата за размена“, изјави Тоини Ловсет, извршен директор за пазари и клиенти во индустриската групација EnergiNorge.

Норвешка ја добива речиси целата своја електрична енергија од огромните хидро ресурси. Историски гледано, таа можеше да извезе голем вишок и сè уште има меѓу најниските цени во Европа. Но, по сувата пролет, хидроакумулациите во најпогодената област изнесуваат 49,3 проценти, во споредба со средната вредност од 74,9 проценти за периодот 2000-2019 година.

Во моментов нема коментари за веста. Биди прв да коментира...

Остави коментар