Државната француска енергетска компанија Electricite de France SA (ЕДФ) соопшти дека наверојатно ќе продолжи со намалување на нуклеарното производство затоа што високите температури ги загреваат реките. Со тоа, енергетската криза во втората по големина економија во Европа, се заострува.
Најголемиот производител на атомска енергија, вообичаено нето извозник на струја во поголем дел од годината, сега увезува. Нуклеарните проблеми не се проблем само за Франција, туку и за соседните земји, како Германија, која ќе мора да троши повеќе гас за да ја одржи светлината наместо да го чува горивото во складиштата како залиха за зимата.
Француското електростопанство синоќа соопшти дека електраните на реките Рона и Гарона најверојатно ќе произвдуваат помалку струја во следните денови, но минимлано производство ќе биде одржано за мрежата да се чува во стабилна состојба. Топлотниот бран ги подига температурите на реките и тоа ја ограничува способноста на компанијата да ги разладува постројките.
Намалувањата се закана дека цените на струјата ќе продолжат да растат, иако во моментов се на рекордно ниво и во Франција и во Германија. Европа ја живее најтешката енергетска криза во последните децении затоа што намалувањето на дотокот на гас од руска страна како одмазда за санкциите доведе до скок на цените.
Француските реки се дел од поширокиот проблем на Европа во последните недели заради сувото и топло време. Во Германија, Рајна е речиси пред затворање за комерцијален сообраќај затоа што е преплитка за бродовите да можат да пловат. Тоа го спречува испорачувањето на јаглен кој е се попотребен за производство на струја откако Русија го намали дотокот на гас преку Северен Поток.
Пловидбата станува тешка и по Дунав, додека најдолгата итлајанска река, По, е прениска за да ги наводнува земјоделските посеви.
Температурите во Париз достигнуваат до 36 степени, а топлото време ќе се задржи во Франција и Германија во следните пет дена. Темпертурите ќе бидат над просекот уште две недели покажува прогнозата на Блумберг.
Според француските правила, ЕДФ мора да го намали или прекине нуклеарното производство ако температурата на водите во реките достигне определено ниво за да се гарантира дека водата која се користи за ладење на постројките нема да штети на околината кога ќе се врати во речните корита.
Ограничувањата се на сила во различни летни периоди. Најновите предупредувања се однесуваат на постројката Албан. Таа ќе работи со минимална сила од 700 мегавати, во споредба со вкупниот капацитет од 2.600 мегавати. Намалување се можни и во постројката Трикастин каде производството ќе се одржува на најмалку 400 мегавати.
Компанијата која има проблеми во работењето, проценува дека производството годинава ќе биде најниско во последните три децении со оглед на тоа дека повеќе постројки се затворени заради одржување. Компаниските проблеми ја принудуваат земјата, традиоционална извозничка, да се потпира на увоз од соседните земји, вклучувајќи ја и Велика Британија, која исто така се соочува со енергетска криза.
Пазарот денеска доживеа мало олеснување затоа што нуклеарниот капацитет на Франција порасна на 49 отсто, од 44 отсто во понеделникот, откако два реактори повторно се ставени во погон, пресмета Блумберг.
Цените на струјата за следната година за Германија, по ова, полека се повлекоа од вчерашните рекордни 405 евра на 398 евра за мегават на час.
.webp){kind=icon}
