Збогум на топлата вода и уличните светилки - како ЕУ штеди енергија

Европејците се тушираат со поладна вода, во канцелариите се намалуваат термостатите, а продавниците ги пригушуваат светлата за да се избегне ситуација во која домовите би биле темни и ладни оваа зима поради последиците од руската војна во Украина.

Додека Кремљ го намалува снабдувањето со гас, а прекините во работењето на електраните го интензивираат притисокот врз снабдувањето, Европа нема друга опција освен да ја намали потрошувачката. Мерките досега беа нерамномерни, но итноста расте бидејќи цените на големо продолжуваат да растат.

Додека некои земји како Германија, каде речиси половина од домовите се потпираат на гас за греење, се поизложени од другите, Европската унија се обидува да се воздржи. Земјите-членки на блокот имаат за цел да ја намалат употребата на гас за 15 отсто оваа зима, ако Русија, која историски покрива околу 40 отсто од побарувачката во ЕУ, ги затвори вентилите.  

Во продолжение, ова е преглед на некои од клучните иницијативи за намалување на потрошувачката на енергија во европските земји:

Германија

Кабинетот на канцеларот Олаф Шолц, неделава одобри серија мерки за намалување на потрошувачката на гас за една петтина наесен и во текот на зимата. Националните мерки, кои се во прилог на чекорите што ги преземаат покраините, како што е исклучувањето на топлата вода во јавните базени, имаат за цел да ја намалат употребата на гас за околу два отсто и вклучуваат: забрана за загревање на приватните базени, веќе не се загреваат некои простори во јавните згради, намалување на минималната температура во канцелариите на 19 Целзиусови степени, забрана за најголем дел од надворешното осветлување на зградите и спомениците и зголемување на енергетската ефикасност во јавните и приватните згради.

Bloomberg

Претседателот Емануел Макрон постави цел за намалување на потрошувачката на енергија за 10 отсто до 2024 година во споредба со нивото од 2019 година. Неговата администрација минатиот месец воспостави серија работни групи фокусирани на владините операции, недвижниот имот, технологијата и телекомуникациите, како и трговските центри и други јавни места. Целта е до крајот на септември да има конкретни предлози. Иако досега имаше само неколку конкретни чекори, постојат неколку иницијативи. До октомври, француските синџири на супермаркети ќе треба да ги исклучат светлечките табли на продавниците по затворањето, а малопродажните простори ќе го намалат осветлувањето за 30 отсто и ќе ги намалат температурите до 17 Целзиусови степени за време на најголемата фреквентност, доколку има владини упатства за тоа.

Како пример, Министерството за финансии на земјата посочи дека ќе го вклучува греењето само кога температурите во канцелариите ќе паднат под 19 Целзиусови степени и нема да се ладат освен ако температурата не се искачи над 26 степени.

Bloomberg

Италија

Новиот план за намалување на потрошувачката во Италија би можел да биде одобрен на состанок на Владата веќе следната недела. Цените на енергијата станаа клучно прашање во кампањата пред вонредните избори на 25 септември на кои ќе се бара наследникот на премиерот Марио Драги. Левиот центар предлага контрола на цените на електричната енергија, потег што беше критикуван од десничарската лидерка Џорџија Мелони, која наместо тоа сака иницијатива која ќе ја опфати целата ЕУ.

Според италијанските медиуми, државниот план за штедење може да вклучува: намалување на температурите и скратување на часовите за греење во домовите и канцелариите во текот на зимата, за да се намали потрошувачката на гас за греење за повеќе од 10 проценти, намалување на јавното и осветлувањето на маркетите во текот на ноќта, продолжување на животниот век на постројките на јаглен со цел да се намали употребата на гас за производство на електрична енергија. Затворање на фабрики може да е дел од планот, а неколку енергетски интензивни индустрии веќе ги намалуваат операциите поради зголемените трошоци.

Шпанија

Во редок потег законски да се наложи пониска потрошувачка, шпанските пратеници во четвртокот ги усвоија правилата што беа воведени со декрет на почетокот на август. Чекорите вклучуваат: ограничување на климатизацијата на 27 Целзиусови степени во јавните згради и повеќето бизниси, како и аеродромите и железничките станици, поставување на греењето на не повеќе од 19 Целзиусови степени во зима, со исклучоци за хотелски соби, кујни во ресторани, фризерски салони, вежбалници, училишта и болници, забрана за ноќно осветлување на споменици и излози, со барање вратите на продавниците да се затвораат секогаш кога се вклучени системите за греење или ладење.

Bloomberg

Швајцарија

Во согласност со целта на ЕУ, Швајцарија ќе побара, но нема да ги принуди домаќинствата и деловните субјекти да ја намалат потрошувачката на гас за 15 отсто од октомври до март, со преземање чекори како што се намалување на температурите за греење во затворените простории. Владата ја поставува истата цел за сопствената администрација за да даде „добар пример“.

Ако доброволниот пристап не успее, Владата ќе се консултира за присилни мерки, вклучително и принудување на индустриските постројки на гас да се префрлат на нафта и да се намали снабдувањето на јавниот сектор. Засега, Швајцарија вели дека приватните домаќинства ќе бидат ослободени од какво било задолжително рационирање.

Финска

Владата на премиерката Сана Марин најави кампања со која ги повикува потрошувачите и домаќинствата, како и компаниите и организациите да ја намалат потрошувачката, со цел учество на 75 отсто од популацијата. Заедничката кампања на Министерството за економија и други организации беше најавена в четврток и има долгорочна цел трајно да ја намали потрошувачката на енергија. Кампањата официјално ќе започне во октомври и предлага: намалување на внатрешните температури, зголемување на употребата на јавниот превоз, пократко туширање, намалување на времето поминато на дигитални уреди.

Bloomberg

Холандија

Холандската влада не спроведува мерки конкретно за оваа зима, а државната компанија за гас соопшти дека земјата ќе има доволно резерви за зимската сезона. Но, кампањата „Заштедете енергија сега!“ ги охрабрува луѓето да ги направат своите домови поефикасни со топлински пумпи, вентилација со функција за поврат на топлина, соларно загревање на водата и подобра изолација на покривите, подовите и прозорците.

Австрија

Виена вети дека ќе заштеди некои трошоци со одложување на почетокот на зимското осветлување за божиќните пазари, додека скијачките одморалишта исто така би можеле да ја намалат потрошувачката со ограничување на ноќните операции. Националната влада допрва треба да воведе задолжителни мерки бидејќи земјата е на пат да пополни една од најголемите мрежи за складирање гас на континентот до 80 отсто капацитет.

Грција

Во јуни, владата на премиерот Киријакос Мицотакис најави мерки за намалување на потрошувачката на енергија во јавниот сектор за 10 отсто во блиска иднина и за 30 отсто до крајот на деценијата. Властите ќе понудат финансиски стимулации на организациите кои штедат енергија, а ќе создадат и дигитален систем за следење на потрошувачката. Мерките вклучуваат: регулирање на температурата во зградите, исклучување на светилките и компјутерите, промени во уличното осветлување.

Ирска

Ирска е изземена од целта на ЕУ затоа што најголемиот дел од својот гас го добива од Велика Британија, но земјата сè уште ги охрабрува луѓето да ја намалат употребата на енергија оваа зима преку кампањата „Намали ја потрошувачката“.

Во моментов нема коментари за веста. Биди прв да коментира...

Остави коментар