Хабек: Реформа на пазарот на струја е лек за високите цени

Германскиот министер за економија, Роберт Хабек, смета дека растечките цени на електричната енергија на долг рок може да се надминат со реформи на пазарот на тој начин што цените веќе нема да се врзуваат за најскапиот добавувач.

Според сегашниот систем, произведувачите со пониски трошоци, кои енергијата ја создаваат од ветер или соларна енергија, се плаќаат исто како и тие со повисоки трошоци, на пример, елекраните на природен гас.

„Фактот дека највисоката цена секогаш ја одредува цената за сите други извори на енергија би можел да се промени“, рече министерот Хабек, кој е и вицепремиер во владејачката коалиција во Берлин, во интервју за Блумберг.

„Напорно работиме на пронаоѓање на нов модел на функционирање на пазарот“, рече тој, додавајќи дека владата мора да води сметка да не интервенира премногу. „Потребни ни се функционални пазари и во исто време мора да поставиме правила за да не се злоупотребуваат позициите на пазарот“, додаде Хабек.

Bloomberg

Европската комисија веќе работи на предлозите за реформа на пазарот на електрична енергија но, за какви било промени би биле потребни месеци за да се одобрат и спроведат.

Германскиот министер за финансии, Кристијан Линднер, рече дека владата треба „најитно“ да се позанимава со растечката цена на електричната енергија, додека Германија предупредува дека на европската економија и се заканува „гигантски шок“.

Европската енергетска криза ќе биде меѓу приоритетите на дневниот ред кога канцеларот Олаф Шолц и неговите министри ќе се сретнат на дводневен состанок, кој што почнува веќе утре.

Владејачката коалиција размислува и за воведување на нови даноци за неочекувани приходи на енергетските компании, рекоа официјални лица за Блумберг во текот на минатата недела. Исто така, се подготвува и трет пакет мерки за ублажување на товарот на домаќинствата, покрај помошта вредна околу 30 милијарди евра, што веќе е договорена.

„Тврдам дека вонредните профити, на кои компаниите никогаш не сметаа, може да се оданочат малку повеќе и тие пари да им се вратат на луѓето“, изјави Хабек за Блумберг.

„Моментално сме ангажираи во интензивни внатрекоалициски разговори за мерките за помош, бидејќи итно ни се потреби“, додаде Хабек.

Владејачката коалиција, исто така, е под притисок и во однос на тоа дали да го продолжи работниот век на трите преостанати германски нуклеарни електрани. Владата ги чека резултатите од својот „стрес тест“ за германското снабдување со енергија пред да ја донесе таа одлука. Хабек рече дека резултатите наскоро ќе бидат објавени но, го повтори ставот дека нуклеарната енергија „не е сигурен извор на енергија“, наведувајќи ги потешкотиите што Франција ги има со неколку од реакторите.

„Нуклеарната енергија не е решение, таа е проблем“, изјави Хабек. „А и фактот дека некои луѓе сега ја претставуваат нуклеарната енергија како наш спас и како решение за сите проблеми е, исто така, смешен“, додаде тој, најавувајќи дека сепак ќе ја разгледа стабилноста на енергетскиот систем.

Германско-данскиот парк на ветерници ќе помогне да се замени рускиот гас

Според соопштението од германската и данската влада, ќе се издвојат 9 милијарди евра за експлоатационен центар за енергија на ветер, чија изградба е планирана на Балтикот и ќе претставува значаен чекор во процесот на одвикнување на Европа од рускиот гас.

Т.н. енергетски остров, Борнхолм, во Балтичкото море, ќе поврзе неколку паркови на ветерници и ќе ја дистрибуира енергијата што ќе се произведува меѓу двете земји. Откако според планот ќе почне со работа во 2030 година, проектот ќе произведува повеќе од 3 гигават часови електрична енергија, што е доволно за 4,1 милион домаќинства.

„Тоа е прв пат во Европа две држави да соработуваат на таков проект“, рече Хабек. „Енергетскиот остров“ ќе се наоѓа близу до големите гасоводи што го канализираат рускиот гас до Европа но, тоа според Хабек, сепак ќе биде сопствена енергија, а не руски гас.

Bloomberg

„Потребна е голема доверба и волја од двете држави за да може да се реализира проект од толкава големина“, изјави Дан Јоргенсен, министер за енергетика во Данска.

Откако ќе почне со работа, во проектот ќе може да се приклучат и други балтички држави и Полска.

Целта на Европската Комисија е до 2050 година да го зголеми европскиот капацитет на ветерници на море од моменталното ниво од 12 гигавати на 300 гигавати производство на електрична енергија.

Во моментов нема коментари за веста. Биди прв да коментира...

Остави коментар