Мерката со која Владата го поддржуваше растот на платите веќе нема да важи. Ова во изјава за „Блумберг Адрија“ го потврди министерката за труд и социјална политика Јована Тренчевска. Според неa, секако, до крајот на годината на работодавците на располагање им стои мерката за раст на минималната плата.
„Освен тоа, работодавците имаат на располагање повеќе мерки преку Оперативниот план за вработување. Предвидени се пари и за поддршка на енергетски проекти. Тие имаат повеќе опции“, вели министерката за „Блумберг Адрија“.
Законот со кој Владата ги плаќаше придонесите за износот за кој се зголемува платата (не помалку од 600, а не повеќе од 6.000 денари) важеше три години, од ноември 2019 до 31 октомври годинава.
Работодавците, пак, велат дека во услови на најтешка криза по Втората светска војна, оваа мерка им е многу потребна. Без неа, растот на платите нема да продолжи.
Некои од фирмите ќе ги намалат платите
Законот за субвенционирање на придонесите од задолжително социјално осигурување поради зголемување плата имаше цел да го поддржи растот на приходите, а со тоа и животниот стандард на работниците.
Во ноември 2019 година просечната плата во земјава изнесуваше 25.787 денари, а во август годинава, за кога има последни статистички податоци, изнесуваше 31.871 денар.
Од Организацијата на работодавци на Македонија (ОРМ) велат дека сега трендот на раст ќе запре.
„Повеќето од фирмите ќе можат да издржат да ги исплаќаат сегашните плати, но ќе го стопираат идниот раст на платите. Сепак, мал број фирми можеби ќе бидат доведени во ситуација и да ги намалат платите“, вели во изјава за „Блумберг Адрија“ Ангел Димитров од ОРМ.
Владата не ја продолжи важноста на мерката за поддршка на растот на платите во услови на раст на инфлацијата и пад на реалната плата. И покрај номиналниот раст од 11,3 отсто до август, споредено со август лани, реално примањата годинава се помали за 4,7 отсто.
Минималецот по закон мора да расте
„Блумберг Адрија“ вчера се обрати и до Владата и до Управата за јавни приходи со прашање колку фирми користеа ваква поддршка и на колку работници преку неа им беше зголемена платата. Одговор не добивме.
Димитров вели дека од 2019 година досега нема компанија во земјава што не ги исполнила условите од законот за да добие помош од државата.
„Платите одамна се зголемија над 600 денари, што значи сите компании можеа да конкурираат за субвенциите. Според моите процени, преку оваа мерка, Владата покриваше околу пет отсто од трошоците за бруто-платата. Сега ова ќе биде голем товар за стопанството“, вели Димитров.
„Блумберг Адрија“ веќе пишуваше дека од март следната година ќе расте минималната плата. Според процените на ОРМ, во согласност со новата формула, која зема предвид 50 отсто од растот на инфлацијата и 50 отсто од растот на просечната плата, минималецот ќе се зголеми меѓу 13 и 15 отсто и ќе изнесува близу 21.000 денари. Министерот за финансии Фатмир Бесими вчера рече дека растот ќе изнесува најмалку 10 отсто.
.webp){kind=icon}
Во моментов нема коментари за веста. Биди прв да коментира...